a(40)
bPsa 95.7–11
cPsa 95.7–8

Hebrews 3

Iesu Mo Aulu Mo Jeu Moses

Matan kamim ka vorai peresi na vevorai sei God mo tapuhir̃a matan na tuka, ha to r̃omr̃omi Iesu, enia Vahar̃ule, ale Pr̃is Aulu sei r̃a lo tau na nor̃a rasua hinia. Enia mo lo turu r̃ilangi na hinau tari God mo vir̃onia matana, sohen Moses mo lo turu r̃ilangi mata vao iman God. Matan mo tataholo vara Iesu i lavi na hasohaso tavera i jeu Moses, sohena tamlohi voro ima matea i pa lavi na hasohaso tavera i jeu ima atu mo lo voroa. Matan ima tari tamlohi matea mo vorora, pani God enia haratu sei mo voro na hinau tari.

Moses mo turu r̃ilangi na hinau tari God mo taua na limana vara i pa kilaura, pani enia volitusi matea purongo, ale sava mo lo vaira enira tovongi matea mata vujangi na hinau sei God i pa vuhesia hitahu. Pani Kr̃isto mo lo turu r̃ilangi jea na hinau tari God mo taua na limana vara i pa vaira, matan enia Natuna tataholo sei mo aulu na iman God. Ale enr̃a r̃a vao iman God, vara varar̃uhu vara r̃a lo turu r̃ilangi na r̃omr̃ilangi peresi na nor̃a r̃omtoho hin Kr̃isto.

Mapu Tataholo Non God

Matan hinau atu natu, Tanume Tapu mo verea matana mara:

‘Nohorihi vara ha rongo na leoku,
ha sopo vai na mapumim i r̃ilangi isaku sohen Israel la lo vaia hin rani atu la turuleji hiniau,
hin rani atu la lo vaihite na noku r̃omperavu na tano koru.
Hin jara atu tamamim la vaivaiau la vaihiteau,
hina purongo vara la lo hite
na noku hinau mar̃urahi tavera
mata tauni mo ngavulu vati moiso a .
10 Ale matana na lolokoru hinira, ale na verea nara:
Tarea mapura mo lo kaka,
ale la sopo levosahi na masaloku.
11 Ale na noku lolokoru tavera mata nora hehe,
na vai na retitauhi matea nara:
La pa sopo er̃i unu na noku mapu hin te rani.’ b 
12 Ale matana, la vorai peresi na vevorai r̃uhur̃uhu, ha lo kilau mamahu vara te vonamim i sopo lavi te r̃omr̃omi sati mata vai na mapuna i sopo mele rasu God sei mo mauri. 13 Pani ha retituetueni kamim hatehateahi na rani hatehateahi tari sei r̃a lo tovira ’nohorihi’, matan vara i pa sopo tea isamim i jovi na hehe, ale mapuna i mai i r̃ilangi isan God. 14 Matan r̃a mai r̃a tapala peresi Kr̃isto na nona vavahinau, vara varar̃uhu r̃a lo turu r̃ilangi hin nor̃a rasua atu tiroma i tikeli na isoisona. 15 Pani ha sopo r̃omaliho hin retir̃oar̃oahai nike hin te rani:

‘Ha tapurongo na sava mo lo verea nakerihi!
Ha sopo vai na mapumim i r̃ilangi isan God sohen Israel mo vaia hin rani atu la turuleji
hinia na jara tano koru.’ c 
16 Ale la tamlohi atu sei la lo turuleji hin God enira hare, hina purongo vara la rongo na leona? Enjora, enira pa la tamlohi atu sei Moses mo tiroma hinira la malue Egypt. 17 Ale hare natu mo vai God mo lolokoru mata tauni mo ngavulu vati? Enjora, enira pa la tamlohi atu sei la lo hehe ale la mate na tano koru. 18 Ale God mo retitauhi isan hare natu vara la pa sopo er̃i unu na nona mapu hin te rani? Mo lo retireti isan la haratu la sopo oloolo hinia. 19 Ale matana, r̃a levosahia vara la sopo er̃i unu na nona mapu matan la sopo rasua.

Copyright information for `TGP