Revelation of John 15

Isoiso Talai Tavera La Lo Mai

Hitahun haratu na kilau sahe na tuka, na mele hite na matamata tinapua matea, enia hina mar̃urahi tavera matea, ale angelo mo limaravrua la lo lavi la isoiso rongohaji sasati tavera atu mo limaravrua, ale enira mo isoiso talai lolokoru non God mata hehe.

Ale na hite na hinau matea mo sohena tasi mata glas mo hoi peresi na hapu, ale la tamlohi atu sei la jeu na suihan maji jala sasati atu peresi na tamasina peresi na evi hijana, la lo turu na pahisan tasi mata glas atu. La lo tauri na pue tangtangi non God, ale la lo lalavete na vete non Moses volitusi non God peresi na vete non Natu Sipsip lara,

“Moli God engko suiha aulu atu mo tavera jea,
nom vavahinau la tavera jea,
ale la r̃uhur̃uhu jea,
nom vavahinau la tataholo,
ale la varar̃uhu,

engko ko Supe nona vao tamlohi jara tinatinapua tari na varama!
Moli, hare natu, i sopo er̃i sile na oloolo tavera isam,
teni i tahe na hijam aulu?
Matan engko hasem ko tapu,
ale mara jara tinatinapua tari
la pa mai la pa lotuho
matan ko vujangi nom aria sei,
mo tataholo mo r̃uhu.”
Hitahun haratu, na mele kilau, ale na hite na jara tapu na lolo Temple na tuka mo roi. Ale na hite na angelo mo limaravrua sei la lo tauri na jilivi talai mata rongohaji sasati atu mo limaravrua la malue na lolo Temple. La ru na ruru lulu peravu, la eve na r̃umara na oti la vaia na gold. Ale vonan pa la hinau mauri atu matea mo sile na jilivi talai mo limaravrua la vaira na gold matematea isan la angelo atu mo limaravrua, jilivi talai atu la lavi na talai lolokoru non God mata hehe sei mo mauri mata rani tui tui, ale Temple mo mar̃ivi na asu memeran God mata suihana, ale tea i sopo er̃i unu na Temple vavano la hinau rongohaji sasati tavera sei la angelo atu mo limaravrua la lo lavira, la pa vaira i isoiso.

Copyright information for `TGP