1 Timothy 1

Timoti kabo nuubap aga? Niyo Yesus Krais imi kalaan tinum Fol nita kale, numi ilim bomin God so minte numi fen-bulup tolon-tema Yesus Krais so ulim igil ulaa nimdu-nilipta, ogok koyo kopne-silip ko.

Kabaa. God imi weng bogopkeli fomtuup tinangku-nalap yak Krais imi ilak do-salap bota, nalami man ilatap ke-salap kale, suuk kon koyo dola kopkelan o age-nilita, dolke-bii ko.

Niyo Aatum God so numi Kamogim Yesus Krais so dagaga-bilita, ulim iyo tebe kabo ka-filin-bom telelke-bilipta, kapmi aget tem uyo bilili age-bom-nalapta o agan-bii ko.

Tinum iyo tebe bisop weng bogo kafalemip kalaa age fot tebemin uta ko

(1 Tim 4:1-5, 6:3-10, 2 Tim 2:14-19, 3:12-13, 4:3-5, Tat 1:10-16, 2 Fit 2:1-22, 1 Jon 2:18-29, Jut 3-16)

Kale siin uyo Provins Masedonia unon o agan-som-nili bogopke-sii uta asok bogopkelan-temi kale, abiip Efesis kugol nin kup bom-nalap e, tinum iyo dogap ita bisop weng uyo unang tinum imi kafale-bom min, sugamiyok umi sang uyo bisop weng kup bagan kutop kutop ke-bom min, yak ilimi olal imi win uyo bagan kwep kutop kutop ke-bom kemip umdii, bogobelapta, kupkalin o ageta ko. Kanupmin weng boyo tebe unang tinum iyo dong dogobeluta, bilip imi God imi ilak dugamin uyo titil fagalan-temaalu kale, boyo tebe unang tinum imi aget uyo kufak daapmuta, wengaal digin-kalon-temip kuta, nimi weng ko bogopke-nili, “Bogobelapta, kupkalin o,” ageli bota tinangku waafulip umdii, kuguup tambal uta kup kanumum o age aget maagup bota kup fugun-bom-nilip e, siin fengmin God tebe kupkabe-se umi aget uyo maak so fugun-bom-nilip, e, “Nuyo yuum sino o,” agan-kalomip kale, bilili age-nilip e, atin Yesus Krais imi ilak uyo do no kelan-temip bota ipkumal imi ilak dugamin umi kuguup umdii mitam senganan-temu ko. Kale unang tinum iip maak maak iyo kanupmin kuguup boyo kupka-bom-nilipta, bisop weng uta tegen-bom-nilipta, bilip iyo ki, God imi ulo kafalemin tinum kelum o agan-bom-nilip e, tam bogolip, “Numi weng boyo atin ki fen o,” agan-nuubip kuta, imi weng bagan-bilip kuso mufekmufek sang bagan-bilip kuso bomi magam uyo tele utam-nilipta ba kale, bisop weng uta amon amon ke-bomta bagan-nuubip ko.

Nugol utamsup kale, tinum iyo dok ita God imi ulo uyo tol waafula umdii, bota tebe dong dogobelan-temu kale, maak ugol mungkup utam no ke-nulupta o ageta kale, God imi ulo kwep daasa boyo tinum fengmin binim igi ba kale, boyo alugum fengmin tinum imi yege-bom kafalemin uyo kulbu kale, ulo boyo tebe

tinum fuut tebe-bom ulo ilo kupka-bom kemin tinum sino, God iyo umik ugobe fengmin kuguup waafulin so,

“God bega ba kale, nalami titil diim albi o,” agan-kalin tinum so,

ogen aalap anolip kaanamin tinum so,

ipkumal anolip kaanamin tinum so,

sa dagamin unang tinum so,

ipkum tebe unang kela sa dagamin tinum so,

tinum tebe tinum migik imi man yuguut kulep unemin tinum so,

bisop weng bagamin tinum so,

tinum iyo bisop weng bota, “Atin aafen o,” agan-kalin tinum so,

God imi fen tuluun weng uyo kupkaa yak kuguup migik migik waafulin tinum so

alugum bilip imi yege-bom kafalemin uyo kulbu ko.
11 Kale fen tuluun weng ko bogopkeli boyo God imi weng tambal umi atuk uta kale, God imi aget fugunin uyo, “Fol imi kobelita, ita ku-nalata, unang tinum iyo kupka-emak o,” age-nalata, kwaap-nama mek nimi diim abe-suu kale, God beyo atin tambal e minte, deng tebemin umi magam uyo kulba no kale, yagal tebe-nalata, ilami weng tambal boyo kopne-se ko.

Fol imi, God iyo tebe ni-filin daa-se kalaa age-nala, “Misam o,” agesa uta ko

(Ap 26:9-18, Gal 1:11-23, Fpai 3:4-9)

12 Siin uyo niyo numi Kamogim Yesus Krais imi win uyo kufak daga-e-bom-nili e, agan-bom-nili e, Kristen iyo waasi ke-e-bom kuguup mafak mafak uyo kupka-e-bom no ke-bii-sii kuta, Krais iyo titil uyo kopne-nalata, utamata e, Fol beyo tii nimi ogok boyo keman-tema kalaa age-nalata, nimdep daalata, ogok kem-nuubi kale, niyo, “Misam o,” agan-nuubi kale, kanu-bii-sii boyo ilep tambal uyo utamin-tem ke-nili e minte, imi ilak uyo dolin-tem ke no ke-bom kuguup mafak boyo kanu-bom bom-bilita, utamata e, kanu-be kalaa ageta ni-filin daa-nalata, 14 kuguup tambal uta kup misiim kopne dong dogopnelata, Yesus Krais ilami aget uyo kobe ilami ilak uyo do-sii ko.

15 Kristen numi weng baga-bom-nulup, “Yesus Krais iyo malaak kafin diim malaak-nalata, fengmin unang tinum numi ilim uta bolan o age-nalata, malaak ti-se o,” agan-nuubup boyo ki atin aafentap kale, unang tinum imi tinangku alugum kubaget daa waafunamin umi weng uyo kulbu kale, alugum nuyo fengmin kuta, niyo utamita e, nugumal imi fengmin uyo katip minte, nimi fengmin uyo kwiin kiim kalaa agan-bii kuta, 16 Yesus Krais iyo kanu-bii-sii niyo ni-filin daa-nala e, yuut olsak kopnesaala kale, fiyaap bilili age-bom fen-balata, imi ilak uyo dolita, telela namo-se kale, boyo dok uta ba kale, Krais imi aget fugunin uyo, “Fen-bilita, atin tinum mafak Fol iyo nimi ilak uyo dolata, kek kek iyo nimi kuguup uyo utam-nilipta, igil mungkup nimi ilak uyo dolipta, telela imolita, suun nin unang tinum kelin o,” age-nalata, fen-bom-nalata, kanube-se ko. 17 Kale beyo ki suun kup king ke-bom nin kup bom-nala e, beyo kaanamin binim e minte, tinum iyo dogobeta atam-nimip binim kale, maagup beta kup atin fen God umdii kulba kale, unang tinum iyo suun kup imi win afek uyo kufu-bom tok baga-bom ke-bilipta o ageta kale, bota kwa.

Timoti imi God imi ogok fomtuup ke-emin umi sang uta ko

18 Timoti kabaa. Kabo nimi man ilatap kale, siin uyo Kristen unang tinum imi kamogimal nuyo weng kem maak maak uyo kopke-sulup kale, kamano koyo ogok sang uyo asok ulutap bogopke-nili e, “Bo kanumal o,” age bagake-bii kale, numi weng kem boyo kubaget daa-nalapta, bomi titil diim ilep kabo waasi dinan-bom titil faga-bom dinbip ulutap ke-nalapta, kapmi Krais imi ogok waafusap boyo fomtuup ke-bom-nalap e minte, 19 kapmi Krais imi ilak dugamin uyo fomtuup waafu-nalap e minte, tam kuguup bo tol kup tebesu kalaa age utamsap uta kup fomtuup waafuu no ke-bom-nalapta o ageta ko. Kale tinum iip maak maak iyo utamipta, kuguup bo tol kup tebesu kalaa age utamsip kuta, umik ugobe kupka-nilipta, sip umi no yol ok kumun tem umi tuum afaligen diim sek mo fegela tebebu ulutap ke imi Krais imi ilak dugamin uyo mafaganu kupkabip kale, 20 tinum alop maak kulbip kale, itamal. Himeneus so Aleksanda so iyo bo mungkup kanubelipta, niyo, alop bilip iyo Kristen imi iibak tem kal fot tebe imdali tam iinipta, Saatan iyo tebe kaal fuyap uyo kopma asok meng God imi miit tem tal-nilipta, maak so God imi win uyo kufak daga-emin ba o age-nilita, fot tebe-sii ko.

Copyright information for `TLF