Matthew 26

Juda kasel imi kamogimal imi weng telela ko-nilip, “Yesus angkolum o,” agesip uta ko

Mak 14:1-2, Luk 22:1-2, Jon 11:45-53

Kale Yesus ilami okumop man ninggil imi ko kafale-be boyo alugum binimanu e, kota bogobe-nala e, “Nugumal ibaa. Am alop maak binimanan-temu kota, Juda kasel numi iman ko age Pasova uyo tigiman-temup kalaa age utabip kale, kota Mo Tibil imi Man niyo Juda kasel imi kamogimal tebe nimdalip yak waasi imi sagaal diim abelita, nimdep yak at diim daa nangkolip kaanan-temi o,” agela ko.

Kale kota tinum amem ko age pris imi kamogimal sino Juda kasel imi kamok kamok sino iyo no tinum amem imi kamok miton ko age hetpris Kayafas imi am afek kutam kal angge ko-nilipta, weng en-bom-nilip e, kanube-nulupta, Yesus iyo maagalo bantap aafuta angkolup kaanak o age-nilip e, bogolip, “Nugol unang tinum imi tala tala ke iman tigi-bom unan-kalon-temip umi tem kwegal angkolan-temup uyo, unang tinum kwiin tagang iyo, buuk o age-nilip e, tebe nuyo yan-togon-bom ye-bom keman-temip kale, dupkalup siit iman uyo alugum unelip binimanu daagina tala kelip kalaa age-nulupta, kota angkolum o,” age weng uyo de kolip ko.

Unang maak tebe tang tambal kuunin ok kulep tam Yesus imi dubom diim kal sing daabesu uta ko

Mak 14:3-9, Jon 12:1-8

Yesus ninggil iyo Oliv Tigiin uyo kupka-nilip e, no abiip Betani kutam iinip ko. Siin uyo Yesus iyo tebe Betani kutam tinum maak kaal mafak kesa Saimon iyo telela do-se kale, beta tal Yesus ninggil imi bogobe-nala e, “Tilipta, nimi am kal ton-bomta iman unelum o,” agelata, no imi am kal ton-bom iman un-silip e, unang maak tebe tang tambal kuunin ok uyo kwep tal Yesus imi dubom diim kal sing daabelu kale, ok boyo tuum alabasta tet tem kalo kolin kulaak umi tem abu kosip kale, unang boyo mani kiim ku mo kwep tal daabu kale, Yesus imi okumop man iyo utamipta e, unang boyo kanu-bo kalaa age-nilipta, olsak tebebeluta, tam unang uyo daga-nilip e, “Intaben nulan o age-nalapta, tang tambal kuunin ok boyo tugup daalap binimanu a? Tang tambal kuunin ok boyo kwep no kapkumal iyo kobelap iyo molipta, mani kiim uyo kulu-nalapta, mufekmufek binim unang tinum imi kobelan agin kuta, kupka-nalapta, tugup daalap binimanu o,” agelip ko.

10 Kale Yesus iyo utamata e, kanupmin weng boyo unang bomi kupka-e-bilip kalaa age-nala e, imi okumop man iyo bogobe-nala e, “Intaben o ageta weng mafak bo unang boyo kupka-e-bilip aget afek fugun-bo a? Boyo kuguup tambal uta nimi kanupnelu kale, kupkalin a. 11 Unang tinum mufekmufek binim iyo ipsino suun kup bomip kale, ibo tii dong daga-em-nimip kuta, niyo suun kup kagal ipsino nan-temaali kale, 12 unang boyo utamuta, Yesus iyo mep so angkolip kaana dep no tuum tem kal dubalan-temip kalaa age-nuluta, Juda kasel numi at kulu telela dep no dubamin kuguup uta ku-nuluta, tang tambal kuunin ok uyo nimi dubom diim kal sing daapnelu ko. 13 Kale koyo dam weng kup bogobelan-temi kale, son-temu nala unang tinum imi tebe kafin kaa kutufosu komi tiine-bom nimi weng tambal kupka-em tiineman-temip uyo, unang bomi kuguup tambal ko kopnelu bomi sang uyo baga-em tiine-bom-nilipta, bomi win uyo suun kufu-eman-temip o,” age Yesus iyo baga-ema ko.

Judas tebe kamogimal imi bogobe-nala, “Niyo Yesus iyo daali yak ipmi sagaal diim abon-tema o,” agesa uta ko

Mak 14:1O-11, Luk 22:3-6

14 Kale Yesus imi okumop man tuluun kal kale, maak iyo abiip Keriot kayaak Judas ita kale, beyo no tinum amem ko age pris imi kamogimal iyo itam-nala e, 15 dagala, “Ibaa. Kanube niyo tebe Yesus iyo daali yak ipmi sagaal diim abela umdii, mani uyo intap kal kopnelan-temip o?” agela e, imi weng bogola uyo tinangku deng kup tebe-bom-nilip e, tuumon kiim ulumi kup 30 kota kobelip e, 16 Judas iyo tuumon uyo kulu-nala e, dogobeta dupkem daalan o age-nalata, ilep uyo fena ko.

Yesus imi okumop man sino Pasova umi iman unesip umi sang uta ko

Mak 14:12-21, Luk 22:7-14,21-23, Jon 13:21-30

17 Kale bret fitimin binim umi unan-kalin am kakat diim ko age ifin am uyo daanu e, Yesus imi okumop man iyo tal Yesus iyo daga-nilip e, “Kabo nuyo, no dogap kal iman ko age Pasova uyo telela kolin o agan-balap o?” agelip e, 18 Yesus isiik bogobe-nala e, “Siin uyo Jerusalam kayaak tinum maak ipmi kafalebe-sii kale, ibo kamano koyo no Jerusalam kal tinum be atamip uyo, bogobe-nilip, ‘Kabaa. Numi kafalemin tinum imi weng kobela kwep tulup uyo bogo-nala e, “Nimi nugum kabaa. Nimi kaanan-temi uyo mep so tulu kale, nimi okumop man sino ninggil nuta tal kapmi am kal iman ko age Pasova boyo unan-bom deng tebe-bomta o,” age Yesus iyo bogop-kama o,’ agelin o,” age Yesus iyo weng kem uyo bogobe-nalata, okumop man iyo imdala 19 no-nilip e, imi weng kup tinangku-nilipta, iman uyo kan kelip ko.

20 Kale ataan uyo te yak tem iinu e, Yesus sino imi okumop man tuluun kal sino iyo tal am ugaa kubip kutam kal ton-bom 21 iman uyo unan-bom-nilip e, Yesus iyo ilami okumop man imi bogobe-nala e, “Niyo dam weng bogobelan-temi kale, ninggil ipmi tinum maak ita tebe-nalata, nimkem daala nangkolan-temip o,” agela e, 22 kota okumop man iyo Yesus imi weng bogola boyo tinangku aget yamyam fugun-bom du-filin-bom-nilip e, maak isiik Yesus imi dagala dagala ke-bom-nilip e, “Kamogim kabaa. Nita bele ki, naga ba o?” agan-bom aget yamyam fugunip e, 23 Yesus isiik bogobe-nala e, “Tinum maak nisino sagaal kwep yak dis tem kulagal dufala ko unela beta tebe nimkem daalata, nangkolan-temip ko. 24 Sugayok uyo God imi suuk kon tem uyo nimi kanube kaanan-temi bomi sang uyo bogosu kale, kamano kogal mungkup bomi sang uyo mitam tuluta, Mo Tibil imi Man niyo nangkolip kaanan-temi kuta, tinum nimi nimkem daalan-tema beyo atin kaal fuyap kup misamanan-tema kale, intaben o ageta ogen uyo beyo do-suu ee?” agela e, 25 imi dupkem daalan o agan-be tinum Judas beyo Yesus imi bogobe-nala e, “Numi kafalemin kabaa. Kabo nimi sang bagane-balap bele ki, tinum migik imi sang baga-e-balap o?” agela e, Yesus isiik imi weng uyo yan kebe-nala e, “Dam bogolap kale, kapkal o,” agela ko.

Yesus imi bret sino sok dum ok sino uyo ilami okumop man kobela unesip uta ko

Mak 14:22-26, Luk 22:15-20, 1 Kor 11:23-25, (1 Kor 10:16-21)

26 Kale Yesus ninggil iyo iman unan-bilip e, Yesus iyo bret maagup maak ku-nala e, God iyo, “Misam o,” age kupkaa fegela ko imi okumop man iyo ife-bom-nala e, bogola, “Koyo nimi dam kale, ku-nilipta, unelin o,” agela e, ku-nilip e, unelip ko. 27 Unelip e, tam sok dum ok maak ilu ko-nala e, God iyo, “Misam o,” age-nala e, imi okumop man iyo ife-bom-nala e, bogobela, “Ibaa. Ninggil alugum ibo koyo ku-nilipta, unelin a. 28 Koyo nimi isak kale, nimi nangkolan-temip uyo, nimi isak uyo singkam daa-nulu God imi kamaa weng umi de koluta, ibo isak boyo utamta, boyo aafentap God iyo tebe unang tinum kwiin tagang numi fengmin uyo kupkan kebe-se kalaa agelan-temip ko. 29 Kale niyo weng migik maak bogopman-temi kale, asok niyo sok dum ok boyo maak so unelan-temaali kale, kupkaa bom-bili bii, no nimi Aatum God imi abiip kugol ipsino bomta, alugum maagup nuyo sok dum umi kamaa ok uta unan-kalon-temup o,” agela ko.

30 Kale ninggil unelip binimanu e, alugum iyo God imi suuk kon tem aseng maak kulu kupka-nilip e, abiip uyo kupkaa yak abe Oliv Tigiin unip ko.

Yesus imi Fita bogobe-nala, “Kabo bogo-nalap e, ‘Beyo nimi duup ba o,’ agelan-temap o,” agesa uta ko

Mak 14:27-31, Luk 22:31-34, Jon 13:36-38

(Mat 26:56, Jon 16:32, 21:15)

31 Kale Yesus ninggil iyo ilep abe-bom-nilip e, Yesus iyo bogobela, “Kamano mililep uyo alugum ibo nimka-nilipta, bilii daaginon-temip kale, God imi suuk kon tem weng sugayok dola kosip uyo bomi sang uyo bogo-nulu e,

  • ‘God nita waasi iyo imkalita, tebe sipsip tiin molin tinum iyo angkolipta, sipsip iyo alugum bilii daagine-bala tele-bala keman-temip o,’
agesu kale mungkup, ipta ko kanubelan-temip ko.
32 Nita kanube kaani namalip siit-nilita, asok fen-nilita, no Provins Galili unon-temi kale, kota ibo nota kugol nitamin o,” agela ko. 33 Kale Fita iyo boyo tinangku-nala e, Yesus iyo fomtuup bogobe-nala e, “Kamogim kabaa. Kapmi okumop man ninggil nuyo, alugum nugumal bilip ita kamkaa bilii unon-temip kale minte, niyo fen kamkaa bilii unon-temaali o,” agela e, 34 minte Yesus isiik Fita iyo bogobe-nala e, “Nugum kabaa. Nimi weng kaa bogopkelan-temi komi aget uyo fugun-bom bom-salapta. Kamano mililep kota uun kakaluk aalap iyo olalin-tem bom-salata, kabo nimi sang uyo bogopne-nalap e, ‘Beyo nimi duup ba o,’ nage yakyak bii, ilep asuno fagalan-temap o,” agela e, 35 Fita iyo bogola, “Umbae. Boyo kanubelan-temaali kuba. Minte tam kapsino niso inolum o agelip uyo ki, niyo bogo-nilita, ‘Beyo nimi duup ba o,’ kagelan-temaali o,” agela e minte, alugum Yesus imi okumop man iyo Fita imi weng ko bogola uta asok ku-nilip e, Yesus iyo bogobelip ko.

Yesus imi no anang Getsemani kutam kal God imi aman duga-emsa uta ko

Mak 14:32-42, Luk 22:39-46

36 Kale tam Yesus sino ilami okumop man sino ninggil iyo mep ko daage yak anang maak bomi win uyo Getsemani o agan-nuubip kutam no-nilip e, Yesus iyo bogobe-nala e, “Niyo yang kagal God iyo aman duga-emi kale, ninggil ibo kagal ton-bom-silipta o,” age-nala e, 37 imkaa Yesus iyo Fita sino Sebedi imi man tinum alop Jems sino Jon sino ninggil asuno ita kup imdep yang una ko. Kale Yesus imi aget tem uyo atin mafaganebelu e, aget afek kup fugun-bom 38 ninggil imi bogobe-nala e, “Niyo utamita, kota nangkolip kaanan-temi kalaa ageta nimi aget tem uyo atin iluum afek kup tebepnelu kale, niyo yang kugol God imi beten ke-emi kale, ipkil kagal fen-bom-nilip e, telela bigi siin o,” age-nala e, 39 imkaa yagal yang so ke-nala e, katuun duung fegela daak ton suk mo kalaak fen-nala e, God imi beten ke-e-bom-nala e, bogola ko. “Aatum kabaa. Kuguup mafak uyo meng, nafak daalan o angbu kale, kabo, fegelebeli dupkaluk o nagelap uyo, titil fagata kanupne-namap kuta, nimi aget fugunin uyo, kabo nimi aget fugun-bom, ‘Bota kanupnelal o,’ agan-bii boga ba kale, kalapmi aget fugun-bom, bota kanubelan-temi kalaa agan-balap uta kup kanumin o,” agela ko.

40 Kale Yesus iyo beten kem siit-nala e, kupkaa meng abomu, tinum ninggil asuno iyo agaal unbip kalaa age-nala e, meng ifo imkaa Fita imi bogobe-nala e, “Ninggil ibo agaal unbip aga? Ibo titil fagaa kafan bom dong dagane-bom bigi siit ilugo-nimip binim kale, yuut agaal unbip aga? 41 Saatan iyo, ibo uget taga-bilita, yang fenga kolip kalaa agelan o age-nalata, ibo im-kugu-be kale, ipmi aget fugunin uyo, kuguup tambal uta kup kemum o agan-bilip kuta, ipmi titil uyo katip kale, yang kuguup mafak uyo keman-temip kale, ibo asok agaal unemin ba kale, kupkaa kafan bom God iyo dagaga-bilipta, dong daga-e-balata o,” agela ko.

42 Kale kam age imka-nala e, Yesus iyo asok daage yang olang yang-nala e, asok God imi beten uyo ke-e-bom-nala e, “Aatum kabaa. Boyo kalapmi san kale, kabo, waasi iyo imkali tebe kaal fuyap boyo kobelin o nagelap bole, niyo, ‘Waago o,’ agelan-temaali kale, niyo kapmi weng bogolap uyo, ‘O,’ agelan-temi o,” age beten kem siit kupkaa 43 asok meng abomu, imi okumop man iyo tiin ak tebebelu asok agaal unip kalaa age-nala e, 44 asok imkaa yang-nala e, kanube beten kem siit tala ulutap mungkup God iyo asok kanupmin beten ke-ema ko.

45 Kale kem siit-nala e, asok tal ilami okumop man iyo ifo-nala e, bogobela, “Ibo asok agaal un-bomta fingkan-bilip aga? Fenta utamin a. Kota tinum maagup maak ita tebe Mo Tibil imi Man niyo nimkem daa nimdala yak tinum mafak ninggil imi sagaal diim abelita, ita tebe-nilipta, kaal fuyap kupkaneman-temip kale, uyo kaa mitam tulu kale, 46 tilipta, unum a. Tinum nimi nimkem daala nangkolan-temip iyo no, atam-nilita o ageta talan-be kale, no abu daalupta o,” agela ko.

Judas imi Yesus dupkem daala waasi tebe aafuu sok de dosip uta ko

Mak 14:43-50, Luk 22:47-53, Jon 18:3-12

47 Kale Yesus iyo weng bagam-sala e, Yesus ilami okumop man iyo tuluun kal kale, tuluun keta tala kale, beyo Judas ita ko. Kamaki uyo tinum amem ko age pris imi kamogimal sino Juda kasel imi kamogimal sino ita tebe-nilip e, tinum kwiin tagang iyo imdalip benat ko age un kong sino ulin sino uyo kulep-bilip e, Yesus dupkem daalan-tema tinum Judas sino tal-bom-nilip e, Judas iyo bogobe-nala e, “Ibaa. Ata-bom-silipta, no tinum beyo fet dobe duptal migili umdii, beta kale, aafuu de dolin o,” agela e, at kom fiko talan-bilip e, 49 Judas isiik Yesus iyo dek diibe yuut tal weng umobe-nala e, “Nimi kafalemin kabo albap aga o?” age-nala e, fet dobe duptal migim-kala e, 50 Yesus iyo bogobe-nala e, “Nugum kabo intaben nulan o age talap uyo yuut kelapta o,” agan-kala e, kota tinum iyo tal Yesus iyo sagaal togobe fomtuup aafulip e, 51 Yesus imi okumop man maak iyo ilami benat ko age un kong uyo kupdeta, tinum amem imi kamok miton ko age hetpris imi ogok ke-emin tinum maak iyo angko imi tuluun kaal milii uyo tagaa kwaapma daak abelu e, 52 Yesus iyo ilami okumop man ko kanubela beyo bogobe-nala e, “Tinum dok ita tebe benat ko age un kong uyo kulu tinum migik inolip kaanip umdii, kaanip imi duup isiik benat uyo kulu asok inolipta, kaanan-temip kale, dinan-kalin ba ko. Kapmi benat boyo asok ililap daak ulumi um tem unuk o ageta ko. 53 Kale niyo, nalami Aatum God iyo dagali yagal maak fagaa ilami ensel kwiin tagang iyo bogopma tal niyo dong dogopnelip waalanan o ageli uyo, niyo kanupmomi kale, kabo boyo utabaalap aga? 54 Kuta niyo Aatum iyo dagali boyo kanubelan-temaala ko. Sugamiyok uyo God yagal ilami suuk kon tem weng uyo kwep daa bogo-nala e, ‘Nimi Man iyo waasi iyo tebe angkolip kaanak o,’ age yagal ki bogosa kale, niyo nalami Aatum God iyo bogo-nili, ‘Aatum kabo dong dogopnelapta, waalanan o,’ agelan-temi uyo, kwek uyo imi weng kwep daasa boyo kwaasulepman-temi e minte, imi weng kwep daasa boyo mitam tol kelan-temaalu binim no kale, niyo boyo dagalan-temaali o,” age Yesus iyo okumop man imi bogopma ko.

55 Kota Yesus iyo tinum tal aafuu de duptamo unum o age tilip imi bogobe-nala e, “Niyo no ulotu am miton kugol ton-bom unang tinum iyo suun kup kafalem-nak-bii kale, ibo tii tal kugol naafuta de namo-nimip kale minte, intaben o age-nilipta, ibo kupkasipta, kamano kota ibo tinum ipkumal aa-bom mufekmufek daga-emin tinum imi aafuu de dupkabip kulutap ke-nilipta, benat so ulin so uyo kulep talta, de namolum o ageta tilip a? 56 Kale ipmi kuguup kanubelip boyo tambal kanubelaalip kuta, ipmi kanubelip boyo, God imi profet ko age weng kem baga-emin tinum bilip imi weng God imi suuk kon tem dola kosip uyo ko mitam felep unu o,” age Yesus iyo tinum ko tal aafuu de dolip bilip imi baga-ema ko.

Kale kota Yesus ilami okumop man iyo tolong do-nilip e, Yesus iyo dupkaa yuut bilii daagina tala kelip ko.

Tinum amem imi kamok miton ko age hetpris tebe Yesus imi dup-kugu-bom dagagamsa uta ko

Mak 14:53-65, Luk 22:54-55,63-71, Jon 18:13-14,19-24

57 Kale Kayafas iyo tinum amem imi kamok miton ko age hetpris kale, ulo utamsip tinum sino minte Juda kasel imi kamogimal so iyo tal bemi am kal afeta-bilip kale, tinum Yesus aafuu de dolip bilip iyo tebe dep no Kayafas imi diim ku daalip ko. 58 Kale Fita iyo Yesus imi umik tem simanim so kugol tam tam yak abe tam hetpris imi am umi daam tem tam una kuta, am iinoma binim kale, abiip kagal bomta, utamita, kamogimal iyo Yesus iyo dogonubelip kalaa agelan o age-nalata, mitam daam tem kugol un tubulin sino ninggil tonip ko.

59 Kale tinum amem ko age pris imi kamogimal isino alugum kamok kamok migik so iyo, Yesus iyo angkolum o age-nilipta, tebe, tinum dogap ita Yesus iyo atama-bilip kuguup mafak umaak kanuma atabip kalaa age-nulupta, bilip ita kululupta, weng telelmin umi diim uyo bogolipta o age-nilipta, imi fen-bilip kuta, 60 maak atam-nimip binim kelip ko. Kale boyo ki, tinum kwiin tagang iyo kamogimal imi finang uyo tal Yesus imi sang uyo bisop baga-emip kuta, kamogimal iyo maak utamta, boyo mufekmufek afaligen fenga koba kale, bomi kalan uta angkolan-temup kalaa agelin-tem kemip e, kota tinum alop maak tal 61 bogo-nilip e, “Ibaa. Tinum beyo bogo-nala e, ‘Niyo tii kale, God imi ulotu am miton uyo dalata kulep toli bii, am alop keluta, am asuno diim kota asok delan-temi o,’ agela nulumi tolong alop uyo tolong dobup o,” age bogopmip ko.

62 Kale kota tinum amem imi kamok miton ko age hetpris Kayafas iyo fen mo Yesus iyo daga-nala e, “Tinum alop bilip imi weng bagake-bilip boyo, intaben o age-nalapta, yan kepmin-tem albap a? Bilip iyo intaben o kagan-bilip o?” agela e, 63 Yesus iyo atin sining agela e, hetpris iyo asok maak so bogobe-nala e, “Niyo weng maak dagalan o ageta kale, kabo bisop uyo baganemin ba kale, suun kup nin tinum God imi win kamkaam uyo kufo tol kup yan kepnelapta, utaman o ageta kale, kabo God imi Man ulaa kamdula kamok kesap tinum aga o?” agela e, 64 kota Yesus isiik yan kebe-nala e, “Dam bogolap kale, alugum ibo tolong do-silipta, nimi weng uyo bogolan. Son-temu kutop uyo ibo nitamipta, Mo Tibil imi Man niyo abiil tigiin kal bom titil kup tebesa tinum God imi sagaal ipkuk diim ko age kamok imi baan diim kal tonbi kalaa agelip suukta minte, aaltam uyo utamipta, abiil tigiin umi iip namaal umi tip diim kugol ton-nalata, tala kalaa age no ke nitaman-temip o,” age Yesus iyo kamok kamok imi baga-ema ko.

65 Kale tinum amem imi kamok miton ko age hetpris iyo weng boyo tolong do-nala e, Juda kasel imi aget iluum tebemin umi kuguup uyo kanumin kale, ilami ilim migiba uyo fengela ko kupkaa tinum alugum tonbip iyo bogobe-nala e, “Ibaa. Bemi weng mafak bogola boyo God imi win uyo kufak daabela ibo tinangkulip kale, yagal ilami sang bogola kale, nuyo tinum maak fen-bom atamupta, beta Yesus imi sang uyo maak so bogolan-temaala binim ko. 66 Kale ipmi aget fugunin uyo, tinum keyo dogonubelum o agan-bilip o?” agela e, isiik bogobe-nilip e, “Beyo atin kuguup mafak uta ku-nalata, kanubela kale, beyo dupkalap angkolip kaanak o,” age-nilip e, 67 mok tuko kulupmip yak Yesus imi tibit kun diim abe-bulu e minte, kul mim ku saal daga-bom no ke-bilip e, minte iip maak maak iyo minte kul baang tuup saal daga-bom 68 titul weng fiil weng baga-e-bom-nilip e, “Kabo bogo-nalap, ‘Niyo God imi ulaa nimdula kamok kesi tinum kale, niyo alugum mufekmufek uyo utamsi o,’ agan-nuubap kale, kabo nitamta, beyo dok ita tebe nan-be kalaa agelap umdii, bogobelapta, tinangkulum o,” age titul weng baga-emip ko.

Fita imi bogo-nala, “Yesus beyo atamsaali o,” agesa uta ko

Mak 14:66-72, Luk 22:56-62, Jon 18:15-18,25-27

69 Kanu-bilip e, Fita iyo tam abiip daam tem kugol ton-bom-sala e, tinum amem imi kamok miton ko age hetpris imi ogok kemin unang maak uyo tal Fita imi bogobe-nulu e, “Kapkal mungkup Provins Galili kayaak Yesus so tiinan-nak-balap o,” agelu e, 70 tinum kwiin tagang imi tibit diim kugol Fita iyo bogobe-nala e, “Umbae. Niyo kupmi weng bagan-balap kwek uyo tele bam daalin-tem o,” age-nala e, 71 imkaa yang abiip daam umi amitung diim umi mep so kugol mo-bom-sala e minte, ogok kemin unang migik maak tal Fita iyo atam-nulu e, tinum migik maak kugol mobip imi bogobe-nulu e, “Ibaa. Tinum keyo Nasaret tinum Yesus so tiinan-nak-be o,” agelu e, 72 Fita iyo atin fulma-nala e, fomtuup weng uyo bogobela, “Umbae. Aafen ki niyo tinum beyo tele atamsaali binim o,” agela ko.

73 Kale siit ilugo-nilip e, tinum kugol mobip iyo tal Fita iyo asok bogobe-nilip e, “Nuyo tolong dolupta e, kabo Provins Galili kasel imi weng uyo bagan-balap kalaa agelup kale, mungkup kabo Provins Galili kayaak kale, kapkal mungkup Yesus imi tinum maak kalaa agan-bulup o,” agelip e, 74 Fita iyo fomtuup weng uyo bogobe-nala e, “E-e. Niyo beyo atin atamsaali binim kale, niyo weng bisop umaak bogobeli umdii, God iyo tebe niyo kaal fuyap kop-naman-tema o,” agan-sala e, kota uun kakaluk aalap umdii olala e, 75 Kota Fita umdii tolong do-nala e, asok aget fugunolata e, siin Yesus imi bogopne-nala, “Uun kakaluk aalap iyo olalin-tem bom-salata, kabo nimi sang uyo bogopne-nalap e, ‘Beyo nimi duup ba o,’ nage yakyak bii, ilep asuno fagalan-temap o,” ageba uyo fen ko kanubeli kalaa age-nala e, tinum ko ninggil mobip iyo imkaa tam abiip daam tem kutam iinom-nala e, fomtuup amema ko.

Copyright information for `TLF