Titus 3

Fol imi bogo-nala, “Utama-bom-nilipta, kuguup tambal kup telelmin o,” agesa uta ko

(Rom 13:1-7, Ef 4:1-3, Fpai 2:1-5, 1 Tim 2:1-4, 1 Fit 2:13-17)

Kale asok bilip iyo maak so bogobe-nalap e, “Ibo gavman sino e minte kiyap sino imi weng uyo tinangka-bom-nilip e minte, tambaliim kup alugum ogok tambal uyo telel-bom-nilip e minte, ipkumal imi tele baga-emin min, wengaal digin-bom waasi kebina tala ke-bom kemin ba kale ki, bal bal ke-bom-nilip e, suun kup dukmen biliit age-bom alugum ipkumal iyo alugum telele-bom no kemin o,” agan-bom-nalapta, baga-e-bom kemal o ageta ko.

Kale mungkup nugol siin uyo aget tambal fugunin binim ke-bom-nulup e minte,

weng kwaasul-bom-nulup e minte,

“Bisop bagan-bilip boyo fen ko,” agan-bom-nulup e minte, suun kup nuyo aget fuguno kanumin kanumin boyo fenga kolum o age tiginin kup kem som no kanumin uyo dogobeta bagang-kale kupka-numup binim ke-bom-nulup e minte,

nugumal iyo waasi ke-e-bom-nulup e,

imi mufekmufek umi mok uyo une-bulupta, am tiinu kayop tiinu ke-e-bulup e minte,

tinum asit kek kek iyo nuyo itafinon-bilip e minte,

mungkup nugol nugumal iyo atafinon una tala kem-nuubupta ko.

Kuta numi ilim bo-emin tinum God iyo alugum unang tinum imi aget uyo kupka-e-bom-nala e minte, kuguup tambal uyo kupka-e-bom no kem-nuuba kale, bomi kafalebela utam dagaa ku-silip kota, yagal numi ilim uyo bobe-se kale, boyo numi kuguup tambal uta utam-nalata ba kale, God yagal alugum numi i-filin daa-nalata, numi ilim uyo bobe-se ko. Kale boyo ki, nuyo diing daa imola mitam kamaa unang tinum kelup imka-nala e minte, ilami Sinik Tambal iyo daala tal dong dogobelata, siin umi kuguup mafak kanumsup uyo kupka-nulupta, kamaa kuguup uta ku no ke-sulup ko. Kale God ilami Sinik Tambal iyo daapma yak numi ilim bo-emin tinum Yesus Krais imi diim abelata, Yesus ita tebe-nalata, numi finang amiit daapma talta nuyo fomtuup dong daga-em-nuuba kale, God imi aget fugunin uyo, nalami Sinik Tambal iyo daali no unang tinum iyo telela imolata, nimi tiin diim uyo tol kup unang tinum kelin o age-nalata, ilami Sinik Tambal iyo numi daapma ti-se kale minte, numi God iso suun kup nan-temup o age fen-nuubup boyo, God yagal, kanubelita, bilip iyo niso maagup suun kup num o age-nalata, tagalim tebe-bom numi ilim uyo bobelata, suun nin unang tinum ke-sulup ko. Kale weng kaa bogobeli koyo fen dam weng bogobeli ko.

Niyo ki, bomi sang uyo kabo bilip iyo weng uyo fomtuup bogobe-nalap, “Unang tinum God imi ilak dolin ibo telel-bom-nilipta, kuguup tambal kup waafuu kwep tebe-bilipta o,” agan-bom-nalapta o agan-bii ko. Kale kanupmin weng kem baga-eman-temap boyo tambaliim kale, unang tinum iyo dong dogopman-temu kale,
mufekmufek katip kalan wengaal digin-bilip min,

tinum iyo ilami olal imi win kufu-bilip min,

waasi kebina tala ke-bilip min,

Moses imi ulo umi kalan uta dupkegina tala ke-bilip min bota tebe-nuluta, bagang-kale bilip iyo dong dogobeluta, kuguup tambal uyo waafulan-temaalip kale ki, kabo yang bomi mep so uyo yang unemin ba ko.

10 Kale kanube kabo utamapta, tinum iyo weng mafak umaak kufola Kristen tinum unang iyo wengaal digin-bom begela una tala kelum o angbip kalaa agelap umdii, weng kem uyo kobe yakyak ke-bii ilep alop min fagalapta, kwaasulala umdii, dupkaa yang iinemin ko. 11 Kale kapkal utamsap kale, kanupmin tinum bemi aget tem uyo atin mafaganebesu kale, fengmin kup ke-bom-nalata, ilami kuguup mafak boyo atin utam kulasa ko.

Fol imi bogo-nala, “Boyo kanumal o,” agesa uta ko

12 Kale niyo aget fugunolita, abiip Nikopolis kal nan-temi kalaa age fugunobi kale, wep so atii so kemin umi am daan mitam tulu kalaa agelan-temi uyo, niyo kugol bom-bili bii, kayop umaak dakan dakan kelan-temi kale, suuk nala Atemas ita e? Tikikus ita e? Daapkeli no tala umdii, kota kapkal nimi finang uyo yuut tiino ku talaal o ageta ko. 13 Kale kabo ulo utamsa tinum Senas so e minte Apolos so alop imi ilep unon-temip uyo telela imolapta, alop mufekmufek uyo duumatanamin binim, tambaliim kup unin o ageta ko.

14 Kale numi Kristen unang tinum bilip iyo kanube bisop kugol bom-nilip e, God imi kuguup uyo kupkabip kemin kale, bilip iyo titil fagaa ogok tambal kup ke-bom-nilipta, ipkumal mufekmufek duumatanip iyo bilip ita tebe dong daga-eman-temip bota kuguup tambal kale, bota tele dagaa kulin o ageta ko.

Weng umka-emin uta ko

15 Kale alugum niso albip iyo kabo weng umopkelip kale, kabo Kristen unang tinum numi aget kup kobelin iyo bogobe-nalap, “Fol so e minte isino nin so iyo ibo weng umobebip o,” agelal o ageta ko.

Kale alugum ibo God iyo tebe telele-bom tiin mola tambaliim kup bom-bilipta o ageta ko.

Copyright information for `TLF