Mark 16

Yesu i Vomahirime

(Matthew 28:1-8; Luke 24:1-12; John 20:1-10)

Maranai viyagohina maratomna* i verauvira, yana Mary Magdalene ma Mary, James ayona,
16:1We Maryna yana au Mark 15:40 ma 15:47.
ma Salome, oyohi jimujimumuna hi gimarai po Yesu au tupuwana hita mutui.
16:1Mai Judea* ahi mumuga po oyohi jimujimumuna au tupuwa he mutui ma muriyai au kokowaga* he tereterei, ma waivinehi we mumugana hi votaghoi.
Ma Sande
16:2Sande yana mai Judea ahi maratom tayatayahana.
hubahubanai boiboghi yana hi naenae au kokowaga.*
Ma hi raubayadanameehi hipa, “Apo aiya gha'imana au mata'eta ina vitovira riyei aubaita?”

Ma hita rau'iyau ghae yana gha'imana ghaeghaenana boiboghi hi vitovira riyei. Eghabaine anima hi rui kokowaga auhinenina ma hewari vouna gara wakewakekena i oteni ma au aho'ohohihi i tughutughura ma hi tughohorei.

Ma nahidana i riwehi ipa, “Egha ona ghohoghohorimi! Taumi yana Yesu Nazarethei hi tupatuparatuiya o baibaihei. Tauna yana egha wehidana! Boiboghi i vomahirime. O inanai, wehidana tupuwana hi vi'enoi. Ma ona nae po a tauvotagho ma wate Peter maiteni ona riwehi onapa, “Tauna yana i aitayaha po e naenae au Galilee. Nahidana apo Yesu ona inanai me rorova i ririwemi nana'arena.”

Ma maranai we hi nonori yana kokowagei hi hopu, po hi rubaruba yana a tatavahi ma hi vinuwanaina, aubaina au tayaha egha aiya aiwa ghehauna hita riwei babana hi rovo.

MARK 16:9-20

Yesu, Mary Magdalene auwarina i Hegha

(Matthew 28:9-10; John 20:11-18)

[Sande hubahubana boiboghi maranai Yesu hiragheei i vomahirime, yana Mary Magdalene auwarina i ai hegha. Na Maryna yana aunaona auwarina aruwa apo'apoehi 7 i raukaiwenihi. 10 I nae po a tauvotagho hi nuwaboya ma hi toutou ma i pariverehi aiwa i tuputupuwa. 11 Ma maranai hi nonori da Yesu i vomahirime ma tauna i inanai, yana egha hita vitumaghanei.

Yesu, a Tauvotagho Ruwagha auwarihi i Hegha

(Luke 24:13-35)

12 Ma muriyai, Yesu a tauvotagho ruwagha Jerusalemei hi hopu po tayahei hi naenae, ma auwarihi ana hegha yana inana tapuna. Yamna aubaina ma egha hita inana tuhaghai. 13 Ma maranai hi inana tuhaghai yana hi wanavirahi po ahi rava ghehauhi hi pariverehi, wate egha hita vitumaghanehi.

Yesu, a Tauvotagho* 11 auwarihi i Hegha

(Matthew 28:16-20; Luke 24:36-49; John 20:19-23; Acts 1:6-8)

14 Ma muriya dumai, Yesu a tauvotagho 11 hi am'am ma auwarihi i hegha. Po i enihi babana a vomahirime aumurina tau'inanaina yana egha hita vitumaghanehi,* ma nuwanuwahi i toghara. 15 Ma i riwehi ipa, “Ona hopu po ona nae dobu atapuna auwarina, ma rava atapuhi auwarihi po tuyegha'u ahi'ahina ona rauguguyei. 16 Ma rava aiya i vitumaghana po i babataito* yana apo ina yawahana, ma aiya egha itai tumaghana yana raibahibahi ina vi'aroni. 17 Tauvitumaghana apo manini a verehi po matakiraha hina voghe'etehi. Ma wava'uwei apo aruwa apo'apoehi hina raugagihi,
16:17raukaiwenihi
ma apo pona vouhi hina vibabaniyehi.
18 Apo mota nimahiyei hina vohepai ma wa'iyawa ani hiraghe hina umai yana apo egha viuva ina verehi. Ma rava doridori'ahi hina votepanihi yana apo kamnahi ina ahi.”

Maimaituwa, Yesu i Ghaiyei au Mara

(Luke 24:50-53; Acts 1:9-11)

19 Bada Yesu, i vibabani a tauvotagho auwarihi po aumurina, ma i vohepa po i ghae au mara, po Maimaituwa au aho'ohohina i tughura. 20 Anima a tauvotagho dobu dobuwai hi nae ma tuyeghana ahi'ahina hi rauguguyei. Ma Bada maiteni i bagibagihi ma i vohaguhi po a maniniyei, dewa anivinuwanaina hi dewadewahi ma au ponahi rava hi inainana yana hipa moina.]
16:9-20Yesu tuyeghana ahi'ahina Mark i girugirumiya bukana 'wadubo dumana ruwagha, yana Mark 16:8 auwarina i tumahiri.


Copyright information for `TPA