Mark 9

“A ririwana dumemi, ghehaumi we o mahimahiri yana apo yohora ona ma'ama'ae ma Maimaituwa a vitaniwaga vouna* ma a kajijira ana rava auwarihi e nene'i ona inanai.”

Yesu Inanana i Wanavirai

(Matthew 17:1-13; Luke 9:28-36)

Maratom 6 aumurina, yana Yesu, Peter, James ma John tau'avahi i rautayahahi ma oya davodavona hi ghaini, ma au matahi inanana i wanavirai. Ana gara wakekena i vimata'am. Apo egha rava ghehauna gara ina oghai, po ina wakeke we au dobuna nana'arena. Anima peroveta Elijah ma Moses hi raughe'etehi po Yesu maiteni hi babani.

Aubaina po Peter ana rava ruwagha maitehi hi rovo duma, ma egha hita haramanei po aiwa hina yatoni yamna aubaina Peter ipa, “Tauvihanahanapu, i ahi po tauta wehidana. Ma kape tonugha a vowahi, emosi yana aubaim, emosi Moses aubaina ma emosi yana Elijah aubaina.”

Nahidana hapau i hopu'i po atapuhi i puruyaghohihi, ma Maimaituwa hapauna auhinenina i vibabani ipa, “We'i yana natu'u a'u rauhoghara. Ona viponavowei!” Anima hipa hina rau'iyaume yana egha aiya hita inanai ma Yesu tau'avana.

Yesu ma a tauvotagho tonugha maitehi oya hi gha'igha'irini, ma i vigha'ehi da au oya aiwa hi ina'inanaiya havena da aiya hina riwei. Da Tauna Rava Natuna apo ina hiraghe ma ina vomahirime, ma aumurina yana rava hina pariverehi.

10 Po Yesu aiwa i ririweiya hi nuwada'wai ma tauhi'ava aupouhi hi babani yana hipa, “Aiwa anona ma Yesu hiraghei vomahirina ei babaniyei?”

11 Ma hi raubayadei hipa, “Aiwa aubaina raugagayo tauvihanahanapuweina he ririwa da Elijah apo ina ai nememe'i?”
9:11Mai Judea* ahi vitumaghana yana Elijah ina ai nememe'i au dobu ma muriyai Maimaituwa a Vinevine* ina ne'i. Ma egha hita vitumaghana da Elijah apo viuva ina vi'aroni maranai ina nememe'i. Ma boiboghi i ne po hi vihiragheni. (Ona inana au Malachi 3:1, 4:5-6, Mark 6:17-28).


12 Ma Yesu ipa, “Yamna moina, Elijah apo ina nememe'i po ginauri atapuna ina nonoghei. Ma we ona notai da Maimaituwa tuyeghana i riwa da Ta'u Rava Natuna apo viuva a vi'aroni ma hina gedu'aiye'u.
9:12Isaiah 52:13-53:12; Psalm 22
13 Riwa moina a ririwemi, Elijah boiboghi i ne'i ma rava aiwa hi ghoheghoheiya auwarina hi dewai. Me peroveta i amgirumanei, nana'arena i tupuwa.”
9:13Yesu wehidana i babani John Taubabataito* aubaina yana tauna me Elijah. (Ona inana au Matthew 11:13-14, 17:10-13)


Yesu, Tevera Orotona Auwarina Aruwa Apo'apoena* i Raukaiweni

(Matthew 17:14-21; Luke 9:37-43a)

14 Yesu, a tauvotagho maitehi oyei hi wanavirahi, po hi hopume ahi rava auwarihi, ma rava maghamaghauhi ma raugagayo tauvihanahanapuweina hi inanai yana a tauvotagho hi gari kwavivirohi, ma maitehi hi gamo gahigahi. 15 Maranai Yesu, rava hi inanai yana hi hauhepahi, ma hi ruba po hi vokaokaohei.

16 Ma i raubayadehi ipa, “Aiwa oi gamo gahigahiyei?”

17 Ma oroto na au boruna ipa, “Tauvihanahanapu, aruwa apo'apoena* natu'u i ruini ma i dewai po egha itai babani, aubaina po a neiya'i. 18 Maranai e verauhurui yana e dubari, po gamonei puropuro e hopuhopu, ma ivona e uta'uta ghirighiriyei ma e doodora. Ma am tauvotagho a vibaghahi po aruwana apo'apoena, hita raukaiweni ma egha emo'emosina hita dewai.”

19 Ma Yesu i paribeehi ipa, “Ahuu, mara aiwa ona vitumaghana! Maite'u ta ma'e duma! Ma mara habi'agha a vi'atataiyemi? Teverana ona neiya'i auwari'u!”

20 Po teverana hi neiyai Yesu auwarina. Ma me haugana aruwa apo'apoena Yesu i inanai, yana i dewai po opina i dodora ma i guhui yamoyamonei
9:20poro bo kiu dori'ana
po au dowa i pe'u, ma i vitovitovira po i nae ma puropuro gamonei i hopuhopu.
21 Yamna aubaina Yesu, teverana amana i raubayadei ipa, “Mara aiwa dori'ana i vikareni?”

Ma ipa, “Haburuna ma i vikareni.
22 Aruwa apo'apoena mara maghamaghauna ei pe'uni eyagi ara'aratana auwarina bo au waira, ipa ina vihiragheni. Ma inapa emo'emosim yana auwarina aiwa ma dewai ai bagham, po ma raunuwa apo'apoe'ai ma vohagu'ai.”

23 Ma Yesu i ipa, “Ma menana'arena ma upa, ‘Emo'emosina yana aiwa auwarina ma dewai?’ Rava aiya ina vitumaghana* yana Maimaituwa auwarina ginauri atapuna yana emo'emosina!”

24 Mara emosi teverana amana ponana i ra'ata ma ipa, “A vitumaghana. Ma a'u vitumaghana egha ita ra'ata, yamna aubaina ma vohagu'u po ina ra'ata!” 25 Yesu auwarina patara ghaeghaena hi nene'i, yamna aubaina po aruwa apo'apoena i autani ipa, “Tam aruwa apo'apoena rava e dewahi po hei vigumgum ma tanighahi he pupupu, a autanim po na teverana ma hopu aharei ma egha meyanai ma ruinameei!” 26 Aruwana i otu, ma teverana i dewai po i dodora ma i guhui yamoyamonei, ma i hopu aharei. Anima teverana i ani'inana me rava hirahiraghena, aubaina rava atapuhi hipa, “Aeta i hiraghe.”

27 Ma Yesu au nimana i vowa ma i vovaimahirini po i tumahiri.

28 Ma muriyai, yana Yesu au numa i rui ma a tauvotagho tauhi'ava ma hi riwei hipa, “Me nana'arena po tai'wai egha aruwana apo'apoenana ata himira hopunei?”

29 Ma i riwehi ipa, “Aruwa apo'apoehi me we tauna yana apegha ta himira yababai, da raupari'avei.”

Yesu a Hiraghe i Babaniyanameei

(Matthew 17:22-23; Luke 9:43b-45)

30 Yesu, a tauvotagho maitehi na dobuna hi voterei, ma Galilee hineninei hi nae. Ma Yesu egha ita ghoheghohei da aiya ina hanapuwei da tauhi me autupona, 31 babana a tauvotagho i hanahanapuhi. Ma i ririwehi ipa, “Ta'u, Rava Natuna, a'u ghaviya apo hina amverene'u, po rava ghehauhi hina vihiragheni'u, ma maratom tonugha aumurina ma apo a vomahirime.” 32 We nana'arena auwarihi i vibabani, ma egha hita hanapuwei, ma hi rovo po egha hita raubayadei.

Yesu, a Tauvotagho Vibada aubaina hi Vitarapiri

(Matthew 18:1-5; Luke 9:46-48)

33 Anima Yesu ma a tauvotagho maitehi au Caponiam hi raughe'eta po au numa hi rui, ma i raubayadehi ipa, “We au tayaha aiwa oi tarapiriyei?”

34 Ma hi vogenuwana babana au tayaha yana tauhi'ava hi tarapiri vivira, da aupouhi yana aiya apo ina vibada.

35 I tughura ma a tauvotagho vinevinehi* 12, i ghorehi po hi ne'i auwarina ma ipa, “Aiya vibada ina ghohei yana ina teregha'iranamei, ma ina vitaubagibagi ana rava auwarihi.”

36 Ma tevera i vaini po ausiporihi i vimahirini. Ma i tarahaghavui ma i riwehi ipa, 37 “Aiya wava'uwei tevera ina vokaokaohei, yana ta'u e vokaokaohe'u, ma aiya'i e vokaokaohe'u, yana egha tau'ava'u ma tauhimiri'u maiteni e vokaokaohei.”

Aiya Egha itai Ghaviyeta yana Turata

(Luke 9:49-50)

38 John, Yesu i riwei ipa, “Tauvihanahanapu, tai'wai rava ghehauna a inanai ma wavammei aruwa apo'apoehi i raukaiwenihi. Ma a vigha'ei po egha ina dewameei, babana tauna yana egha turata.”

39 Ma Yesu ipa, “Egha onai gha'ei. Egha emo'emosina po rava wava'uwei dewa anivinuwanaina, ina dewai ma aumurina wava'u inai apo'apoeni. 40 Aiya egha itai ghaviyeta yana turata. 41 Moina a riwa duma, inapa rava aiya waira ina veremi babana taumi tauvotagho'u, yana ana maiha apegha ina vinebo'ai, ma apo ina vaini.”

Raudadana Babanina

(Matthew 18:6-9; Luke 17:1-2)

42 Inapa tevera ei tumaghane'u ma aiya ravana aena ina taini po apo'apoe ina dewai, yana Maimaituwa apo kovogha ghaeghae dumana ina verei. Ma inapa au uwana gha'ima ghaeghaena hina raghihi ma au boga hina dubari, yana i ahi ma na kovoghana egha ita ra'ata vaimaiha. 43 Ma ona inana vaimaiha po egha ona dewadewabo'a. Inapa nimam ina dewam po apo'apoe ma dewai, yana ma tarautuina aharei. I ahi po nimam emosi'ava ma yawahana Maimaituwa auwarina ma nehaghai, ma apoma nimam ruwagha ma ma nae au gehena, mepa eyagi hauga davodavona e ara'aratayana. 45 Ma inapa aem ina dewam po apo'apoe u dewai, yana ma tarautuina aharei. I ahi po aem emosi'ava ma yawahana Maimaituwa auwarina, ma nehaghai ma apoma aem ruwagha ma au gehena hina dubara hopunem. 47 Inapa matam ina dewam po apo'apoe u dewai, yana ma vahi'aharei. I ahi po matam emosi ma Maimaituwa a anivitaniwaga vouna auwarina ma rui, ma apoma matam ruwagha ma au gehena hina dubarim. 48 Na au dobuna, yana ‘motamota rava he ani'anihi ma egha hita hirahiraghe, ma eyagi hauga davodavona e ara'arata, ma egha ita bohoboho.’
9:48Isaiah 66:24 We'i yana ampariruvaruva, hi vaini Hinom ghwaghwana yana Jerusalem augheregherena, mepa megu he apui po hauga davodavona e ara'arahi ma egha ita bohoboho.


49 Ma a'u tauvotagho atapuhi yana apo raudadana hina vi'aroni, mayana vainana yana me eyagi ara'aratana.

50 Niha yana ginauri ahi'ahina, ma inapa a viniha ina yababa, yana apo egha emo'emosina ta dewai po ina vinihame. Egha nana'arena ona dewadewa, ma ona viniha ma ami rava maitehi a nuwahubami ona ma'ae.

Copyright information for `TPA