Psalms 103

God i laikim yumi tumas

Devit i raitim dispela song.

Mi mas litimapim
nem bilong Bikpela.
Yes, bodi na tingting
na olgeta samting
i stap insait long mi
i mas litimapim
gutpela nem bilong Bikpela.
Mi mas litimapim
nem bilong Bikpela,
na mi no ken lusim tingting
long ol gutpela samting
em i bin mekim long mi.
Em a  i save lusim olgeta sin bilong mi,
na em i save mekim orait
olgeta sik bilong mi.

Bikpela b  i kisim bek mi
na mi no i dai.
Em i save marimari
na sori moa yet long mi.
Olgeta c  taim mi stap long graun
Bikpela i save givim
ol gutpela samting long mi
na inapim mi.
Em i mekim olsem
na mi kamap yangpela gen
na mi stap strong olsem tarangau.

Bikpela i mekim stretpela wok
bilong helpim ol manmeri
taim ol i stap aninit
long pasin nogut
bilong ol arapela man.
Na em i kirapim ol bek gen
na ol i stap gut.
Bipo em i tokim Moses
long ol samting em i laik mekim.
Na em i larim
ol manmeri bilong Israel i lukim
ol strongpela wok em i mekim.
Bikpela d  i save sori moa yet
long yumi
na oltaim em i marimari
long yumi.
Em i no save belhat kwiktaim,
na em i save laikim tru yumi.
Em i no save kros nating long yumi.
Na belhat bilong en
i no save stap longpela taim.
10 Yumi e  inap kisim pe nogut
bilong sin bilong yumi,
tasol em i no save givim
dispela pe nogut long yumi.
Yumi bin mekim planti pasin nogut,
na em inap bekim
bikpela hevi long yumi,
tasol em i no save mekim olsem.

11 Em f  i save laikim tru ol manmeri
i save pret long em.
Em i gat bikpela laik tru long ol,
olsem skai i antap tru long graun.
12 Hap g  bilong sankamap
em i no klostu
long hap bilong san i go daun.
Em i longwe tru.
Olsem tasol God i save rausim
sin bilong yumi
na sin i stap longwe tumas.
13 Papa h  i save sori
long ol pikinini bilong en.
Olsem tasol Bikpela i save sori
long ol manmeri i pret long em.
14 Em i  i save olsem
em i bin kisim graun
na wokim yumi
na em i tingim yumi
i olsem das tasol.

15 Laip j  bilong yumi manmeri
i sotpela tru olsem gras.
Yumi stap sotpela taim
olsem plaua bilong gras
na yumi dai.
16 Win i naisim plaua na em i pundaun
na ol man i no moa lukim
plaua i stap.
17 Tasol k  Bikpela i save marimari
oltaim oltaim
long ol manmeri i aninit long en.
Na em i mekim gutpela pasin
long ol lain tumbuna
i kamap bihain tu.
18 Na sapos ol i bihainim
kontrak bilong Bikpela,
na ol i bihainim
olgeta lo bilong em,
orait em i save kolim ol
stretpela manmeri.

19 Bikpela i stap king long heven,
na em i bos bilong olgeta samting.
20 Yupela olgeta ensel bilong Bikpela,
yupela i gat bikpela strong.
Yupela i save bihainim
tok bilong en,
yupela i save putim yau gut
long tok bilong en.
Orait yupela i mas litimapim
nem bilong Bikpela.
21 Yupela ol wokman bilong Bikpela,
yupela i stap long heven
na i save bihainim laik bilong em,
yupela litimapim nem bilong em.
22 Yupela olgeta samting
Bikpela i bin wokim
na i stap long olgeta hap,
na em yet i stap king
bilong yupela,
litimapim nem bilong Bikpela.
Na mi tu mi mas
litimapim nem bilong em.
Copyright information for `TPI