Psalms 138

Man i tok tenkyu long God

Devit i raitim dispela song.

Bikpela, bel bilong mi
i strong tru
long tenkyu long yu.
Long ai bilong olgeta giaman god
bai mi mekim song
bilong litimapim nem bilong yu.
Mi brukim skru
long pes bilong haus bilong yu
na litimapim nem bilong yu.
Long wanem, oltaim
yu save laikim mi tru
na yu save lukautim mi gut.
Yu soim mipela pinis olsem,
yu wantaim tok bilong yu
i nambawan tru.
Taim mi singaut long yu,
yu bin harim prea bilong mi,
na yu givim strong bilong yu yet
long mi
na mi stap strong olgeta.

Olgeta king bilong graun
i harim pinis tok bilong yu,
olsem na bai ol i litimapim
nem bilong yu.
Na bai ol i singim song
long ol samting yu bin mekim,
na mekim song tu
long biknem bilong yu.
Bikpela, a  yu stap antap tru
na yu nambawan,
tasol yu save tingting
long ol manmeri i no bikhet.
Na ol bikhetman tu
i no inap hait long yu.
Taim b  planti hevi i kamap long mi,
yu save lukautim mi
na mi stap gut.
Ol birua i kros long mi,
tasol yu save pait long ol,
na long strong bilong yu tasol,
yu save kisim bek mi.
Bikpela, mi save
bai yu mekim olgeta samting
olsem yu promis pinis long mi.
Na yu save laikim mi oltaim oltaim.
Mi laik bai yu pinisim
olgeta wok yu bin kirapim.
Copyright information for `TPI