Psalms 141

Wanpela man i prea long nait

Devit i raitim dispela song.

Bikpela, nau mi prea
long yu.
Mi laik yu helpim mi kwiktaim.
Mi singaut long yu,
na mi laik bai yu harim
beten bilong mi.
Mi a  laik yu kisim prea bilong mi
olsem smok i gat gutpela smel
i go long yu,
na olsem ofa mi mekim long nait.

Bikpela, b  yu mas was gut
long maus bilong mi,
na bosim gut toktok bilong mi.
Yu c  no ken larim bel bilong mi
i kirap long mekim pasin nogut.
Na nogut yu larim mi
i bung wantaim ol man nogut
na mekim sampela rong.
Yu no ken larim mi
i sindaun wantaim ol
long pati bilong ol.

Gutpela man i ken sori long mi
na mekim save long mi
na krosim mi.
Tasol mi no ken pren
wantaim ol man nogut.
Long wanem, oltaim mi save beten
long God
long em i ken bekim
pasin nogut bilong ol.
Taim sampela man i kisim
ol dispela man nogut
na bagarapim ol,
orait ol bai i save olsem,
tok bilong Bikpela i tru olgeta.
Na bai ol i tromoi bun
bilong ol dispela man
i go long ples matmat,
olsem man i brukim hap diwai
i go liklik liklik
na tromoi nabaut.

Tasol d  God, Bikpela,
mi save bilip long yu.
Lukautim mi gut,
yu no ken larim mi i dai.
Banisim mi
bai mi no ken pas long ol umben
ol man nogut i haitim i stap.
10 Mekim ol man nogut i pas tru
long ol umben ol yet i taitim.
Tasol mi nogat.
Mi ken wokabaut gut
na i no gat wanpela samting
i ken bagarapim mi.
Copyright information for `TPI