Wis 15

Laip bilong i stap gut oltaim i save stap insait long man i luksave long God

Tasol yu, God bilong mipela, yu man bilong belgut na yu save bihainim stretpela pasin. Yu no save belhat kwik. Yu bosim olgeta samting long marimari bilong yu. Maski mipela i mekim sin, mipela i bilong yu yet, long wanem, mipela i save long strong bilong yu. Tasol mipela i no laik mekim sin, long wanem, yu makim mipela i bilong yu stret. Man i save tru long yu em i stret olgeta. Na laip bilong i stap gut oltaim i stap pinis insait long man i luksave long pawa na strong bilong yu. Ol dispela samting ol man i bin wokim long save bilong ol, i no gat wanpela bilong ol inap paulim mipela. I no gat wanpela kaving nating wanpela man i bin sapim o wanpela piksa i gat kain kain kala long en, em inap long pulim mipela i go longwe long God. Ol longlong manmeri tasol i save lukim ol dispela kain samting na bel bilong ol i kirap, na ol i save lotu long wanpela piksa nating i no gat laip. Ol manmeri i wokim o mangalim kain piksa olsem o ol i lotu long em, ol dispela manmeri i laikim samting nogut. Bihain ol bai i kisim bekim na pe nogut inap long dispela rabis pasin bilong bilip bilong ol.

Wanpela man i kisim graun na wokim giaman god na i lotu long em

Man bilong wokim sospen, em i kisim graun malumalum na em i tanim tanim nabaut long han bilong em, na em i wokim ol kain kain plet na sospen samting. Sampela em i wokim bilong mekim gutpela wok, na sampela bilong mekim ol wok nabaut. Na olgeta sospen em i wokim, em i wokim long wankain graun tasol, na long wankain pasin. Man i wokim sospen, em yet i makim wok bilong wan wan sospen. Orait nau dispela man i kisim wankain graun na wokim wanpela giaman god. Em i lusim nating taim bilong em, long wanem, em yet i man na i no longtaim i go pinis em yet i bin kamap long graun. Na i no longtaim gen na em i mas i dai na tanim graun gen. Laip bilong em, em i bin kisim olsem dinau tasol, na em i mas givim bek.

Laip bilong dispela man bai i sotpela, na liklik taim na bai em i mas i dai, tasol em i no wari long dispela samting. Em i laik kisim biknem, olsem na em i laik resis wantaim ol man bilong wokim olkain samting long gol na silva. Em i laik mekim wankain wok olsem ol man i save wokim ol samting long bras. Ol samting em i wokim i luk olsem gol na silva na bras, tasol nogat. Em i giaman tasol, na em i wokim long graun nating. 10 Lewa bilong dispela man i olsem pipia bilong paia. Bilip bilong em i olsem graun nating, na pe bilong laip bilong en i olsem samting nating tru. Em i no inap long pe bilong graun bilong wokim sospen. 11 Em i no bin kisim save liklik long dispela God i bin wokim em. Na em i no save tru olsem God i bin winim win bilong laip i go insait long bodi bilong em, na God i bin mekim em i kamap man i gat laip. 12 Em i ting, laip bilong yumi i olsem wanpela samting bilong pilai tasol, o wanpela bisnis bilong winim profit. Em i ting olsem em i mas painim ol kain kain rot bilong winim mani, maski ol dispela rot i gutpela o i nogut. 13 Na em i save kisim graun na wokim ol giaman god na ol sospen i save bruk kwik. Dispela kain man i save gut tru olsem em i mekim rong.

God i bin mekim gut long ol Israel na em i mekim save long ol Isip

(Sapta 15.14—19.22)

God i mekim save long ol manmeri i lotu long ol giaman god

14 Planti man i save mekim ol longlong pasin, tasol olgeta birua i bin daunim ol manmeri bilong yu ol i longlong tru. Ol i no gat tingting olgeta. Ating tingting bilong ol liklik pikinini i winim ol, 15 long wanem, ol i ting olgeta piksa bilong ol, ol i God. Maski ol dispela piksa i gat ai, tasol ol i no inap lukluk. Ol i gat nus, tasol ol i no inap pulim win. Ol i gat yau, tasol ol i no inap harim toktok. Ol i gat pinga, tasol ol i no inap pilim samting. Ol i gat lek, tasol ol i no inap wokabaut. 16 Dispela man i bin kisim laip olsem dinau tasol, na em i wokim ol haiden piksa. I no gat wanpela man inap wokim wanpela god i olsem em yet. 17 Olgeta man i gat taim bilong em i mas i dai. Na ol samting ol i bin wokim long pasin nogut, ol dispela samting i no gat laip. Man yet i winim ol dispela samting em i save lotu long en, long wanem, em yet i gat laip, tasol ol i no gat. 18 God, ol birua bilong ol manmeri bilong yu,
15.18I luk olsem dispela i tok gen long ol Isip.
ol i save lotu long ol kain kain animal i nogut tru. Ol arapela animal i gutpela liklik na i winim tru ol dispela animal nogut ol i save lotu long en, long wanem, ol dispela animal i no gat liklik tingting tru i stap long ol.
19 Na tu ol dispela animal i no luk nais tumas, bai ol man i ken laikim ol. Taim God i lukim ol samting em i bin wokim na em i amamas na i blesim ol, em i abrusim ol dispela animal nogut na em i no blesim ol.

Copyright information for `TPI