aLev 11:45; 19:2; 20:7
bAis 40:6-8

1 Peter 1

A Soe Vakikis Po Teß Va Po Vaman To Kokon Kamis Ne

Eöß e Pitaß, e aposol pe Ieesuß Kristo.

To kiun ka nös neöm a napan ne Sosoenën to vateß voh a neöm, pan eöm se tavus a napan peß, ko teß va nem manih pa nap aun to teß nem pa ma muhin va Pontus, me Galesiaß, me Kapadosiaß, me pa muhin va Esiaß, me Bitiniaß.
E Sosoenën e Tamaara to kokoman keon moaan voh en, pa ö neß se kon hah a neöm, ko vateß a neöm a napan vivihan peß, eß a kiu pa Tuvuh peß. E Sosoenën to iu a no neöm se vavatet nem e Ieesuß Kristo, köm se tavus vavoon manih po eraß peß.

Eöß to hinhin noß pan, e Sosoenën se nok vavih, ko ururuan a neöm, me a taateß moomo peß se puh rakah non manih peöm.

Ea Se Anoeh No O Toßtoß Tamoaan

Ea se kë no a ëhnan e Sosoenën, eß e Taman e Sunön pea e Ieesuß Kristo. Manih po ururuan apuh pe Sosoenën, eß to heß hah a ra o toßtoß voon pa ö na to teß toßtoß no ko anoeh no, suk e Sosoenën to vatoß taneß hah e Ieesuß Kristo po vapeepe. Kuru ea to anoeh no a tapui ne Sosoenën to se heß manih pa ma koaß peß. A ma heß varih, to hikta se koa ne, me hikta se hat ne, ka ö epep vavih va pee hikta se hik ne, ee to teß ne manuh a vöön va kin to anoeh no maß ra. Manih po kikis pe Sosoenën, eß to matop e non peöm, suk eöm to vaman, ka matop peß se vatët en po poen neß se kon hah a neöm këh a hat pa ö neß se kiiki a napan.

Ivëh, ke eöm se teß vaeö rakah nem, ivëhpëhkëk, pa siß tëëm kökööt eöm se tamak pa ö nöm se taum a ma vu punis. A ma vu punis poë varih se tavus, marën a punöß o vaman peöm, pan eß to teß vivihan e non. O vaman vivihan pamëh to teß vih oah e non pa gol. Ee se kon a gol, pare ës pa kon ke o kusan. Ivëh, ka ma vu punis to vaeh non o vaman peöm keß tavus vavoon, pareß vivihan oah e non pa gol pamëh se hat en. Ivëh, kee se kë a ëhnëëneöm, köm kon o ëhnan apuh, paröm öt a tasun apuh, po poen ne Ieesuß Kristo se hah maß. Eöm to hikta ep voh nem e Kristo, ivëhkëk, eöm to iu avoeß e nem peß, eöm to hikta onöt nem a ep eah kuru, ivëhkëk, eöm to vaman e nem peß. Ivëh, ke eöm to puh rakah nem po vaeö nee to hikta onöt ne a vamaaka, o vaeö pamëh to puh non po vatëk vih. O voen peöm ivëh, eöm to vaman nem e Sosoenën, keß se kon hah a ma apeneöm këh a taateß hat.

10 O teß vanënën soe to vavaiu vakis voh e ne pa soe, pare pupunöß voh e ne pa nat pa ö ne Sosoenën se kon hah va in a napan. Pare vanënën suk voh ne po ururuan vëh se nö maß peöm. 11 A Tuvuh pe Kristo to teß me voh e non pee, ko sosoe ke non pee pa ö ne Kristo se kon kamis vah ava, me ee se heß ne poë o ëhnan apuh. Ivëh, ko teß vanënën soe to iu voh e ne pa nat e Kristo rakah ivëh eteh, me o poen poanheh no a ma tah poë varih se tavus. 12 E Sosoenën to vataare voh raoe pan, a kiu nee to nonok ne to teß non pa vaßaus a neöm, eß to hikta vaßaus non raoe, pa ö nee to vavatvus ne a ma soe man varih neöm to tënan voh em. Ko teß heßheß soe varih to vavatvus voh ka no neöm a Soe Vih, ee to vavatvus ne po kikis pa Tuvuh Vasioß, ne Sosoenën vöh pa vöön va kin to vanö maß. A ma tah no ankeroß to iu maaka voh e ne.

A Taateß Va Pa Teß Vavivihan

13 Ivëh, köm se vamatop nem a ma kokoman peöm pa nok a kiu, paröm matop nem o iu va po sionin. Eöm se teß varoe rakah nem pa taateß anoeh in o heß va po ururuan, ne eöm se kon po poen ne Ieesuß Kristo se hah maß. 14 Kuru eöm a ma koaß tëtënan soe pe Sosoenën, eöm se nat nem teß hah va nem pa ö nöm to teß moaan vavoh nem. Eöm he hikta inan voh nem, ivëh, köm nonok voh nem a ma taateß hat nöm to iu nem. 15 Ivëhkëk, eöm se teß vivihan nem pa ma moeh tah kurus nöm to nonok nem. Suk ataeah, e Sosoenën vëh to vaoe voh a neöm, pan eöm se vaman eah, eß a vivihan. 16 Suk eß to kiun non po Puk pe Sosoenën to soe non pan,

“Eöm se teß vivihan rakah nem,
suk ataeah, eöß a vivihan.” a 
17 Eöm to hinhin nem e Sosoenën, ko popokaß nem eah e Tamön, eß to kiiki vatoe rakah non sih a ma taateß pa teß. Ivëh, ka tëëm nöm to teß nem manih po oeh vamanih pa nap aun, eöm se ta rakah nem e Sosoenën. 18 Eöm to nat e nem, moaan voh nöm to teß voh nem pa taateß hat, a taateß pamëh nöm to kon taneß voh pa kën sipuineöm varih, to teß momoaan voh ka no neöm. Ivëhkëk, e Sosoenën to kon hah këh voh en peöm po toßtoß hat pamëh. Eß to voen hah voh a neöm pa tah to hikta onöt non a hat, vamanih pa gol, keß, a silvaß. 19 Ivëhkëk, eß to voen a neöm po eraß vivihan pe Kristo. E Kristo to teß va non manih pa soneß sipsip vivihan to hikta teß me non ta mët manih pa sionineah. 20 E Sosoenën to vateß voh en pe Kristo, eß he meß avoeß voh e non pa nok o oeh. Pa taneo in o poen no o oeh to vatët e non pa hik, e Sosoenën to vanö voh maß poan. Eß to vateeraß eah manih pea a napan, pa vaßaus a ra. 21 Manih pe Kristo, eöm to vaman nem e Sosoenën vëh, to vasun taneß hah voh e Kristo pa nap mët, pareß heß poan o ëhnan apuh. Ivëh, ko vaman peöm, me a taateß anoeh peöm se teß tamoaan non manih pe Sosoenën.

22 Kuru no a ma kupu peöm to vivihan pa ö nöm to vavatet nem a soe man. Eöm to teß rakah me nem o iu vamaman manih pa ma kea, me vamen pa ëhnan e Kristo. Ivëh, ke eöm se teß me nem a taateß iu to taneß rakah no maß pa ma kupu peöm. 23 Eöm to koaß vavoon hah em, o toßtoß voon pamëh to hikta taneß maß pa tah mët, ivëhkëk, eß to taneß maß pa tah hikta se mët non. Eöm to koaß vavoon koe hah voh manih pa soe pe Sosoenën, to teß me non o toßtoß tamoaan. 24 O Puk pe Sosoenën to soe va non nën,

“A napan kurus to teß va ne manih pa karas,
ka ma kikis pee to teß va ne manih pa ma töpkaß va muhin.
A karas se rak en, ka ma töpkaß vußvuß ee,
25 ivëhkëk, a soe pe Sunön to se teß tamoaan e non.” b 
Ka soe pamëh, nemöm to vatvus voh ka neöm.

Copyright information for `TPZ