aSng 34:12-16
bAis 8:12-13

1 Peter 3

E Pitaß To Vaato Suk O Teß Vavaen

Eß to vatoe e non peöm o köövo vaen, eöm se teß rakah nem paan a ma voe peöm. Keß se keh teß non ta ma pah voe to hikta vavatet ne o vavaasis pe Sosoenën, ee se ep suk ne pa taateß vih peöm a ma köövo, pare vaman ee, eöm he hikta soe tah soe. Ee to antoen e ne pa ep suk pa ö ne eöm a ma köövo to teß va nem, ko panih ee pa taateß pee. Suk a ma voe peöm se ep o toßtoß vivihan peöm o köövo, me a ö nöm to teß va nem ko ta nem e Sosoenën. Eöm o köövo se koe a vatëk varoe o sionin vëh mahën, pa taateß vatëk vavih a ovineöm, me a mök a ma mök nee to nok pa gol. Me a ohop a ma ohop ep vavih varih nöm to ohop nem to vaep vamanin a no neöm. Ahik, eß to vih oah non po vatëk se taneß no maß pa komëneöm, a ma vu vatëk varih to hikta onöt ne a hat, ee ivarih, a taateß haraß vatö, me a taateß kamöß. A ma vu taateß poë varih to vih oah rakah ne po epep pe Sosoenën. Eß to vatoe e non po köövo vivihan vamoaan voh to vavatet voh ne e Sosoenën, ko teß ne paan a ma voe pee. Ka tah pamëh, eß o vatëk voh pee. E Saraß to pënton voh non a soe pe voe peß Abraham, ko pokaß non poan, “E apuh peöß”. Ke eöm o köövo, eöm ro pus koaß rakah pe Saraß, pa ö nöm to nonok tamoaan nem a ma taateß totoopin, ko hikta nanaöp nem pataeah no e voe tomeß nok manih peöm.

Keß vatoe me e non peöm o voe, eöm se teß vavih vaßpeh me nem a ma köövo peöm, ko teß vatët tamoaan nem pa vaßaus a ma köövo peöm. Suk a sioniiro köövo to hikta teß eh vi ne, ivëh, ke eöm se ta nem raoe. Suk e Sosoenën to heßheß e non pee po pöh tapui neß to heßheß non neöm, o heß va po toßtoß vamaman. Eöm se vavatet nem a taateß pamëh, ka hikta tah se sunpip non a ma hin peöm.

Ea Se Nonok Tamoaan No A Taateß Vih Manih Po Upöm Teß

Eöß se vahik va in a soe peöß manih pan, eöm kurus se vapöh kokoman nem, ko uruan vaßpeh me nem a ma meh teß peöm, ko iu rakah nem raoe vamanih pee a ma tamëneöm me sinëneöm, ka taateß ururuan me a taateß vaßaus teß non topnineöm, köm se nonok nem a taateß tö topnineöm. A teß se keh nok vahat a oah, eën se koe a piun a hat pa hat. A teß se keh soe vavahat a oah, eën se koe a piun a ma soe vavahat peß. Ivëhpëhkëk, eën se piun varuß eah pa taateß vih. Suk e Sosoenën to vaoe me voh a oah pa nok va nën, keß me se nok a taateß vih manih pën. 10 O Puk pe Sosoenën to soe non pan,

“A teß se nok a ma tah varih pa kon o vaeö,
me eß se teß vaeö e non pa ma poen peo.
Eß se nat non sosoe non ta ma tah hat,
me eß se koe a piuk.
11 Eß se nat non nonok non a ma taateß hat,
ko nonok varoe non a ma taateß vih.
Eß se vaiu non a taateß moomo,
pareß kiu suk non poan.
12 E Apuh to ut non sih a napan, no a taateß pee to teß totoopin ne,
pareß tëtënan non a ma hin pee.
Ivëhkëk, e Apuh to heß tonun non sih a napan varih,
to nonok ne a ma taateß hat.” a 

Ea Se Kon Kamis Suk A Taateß Vih Na To Nonok No

13 Eöm se keh punöß vëhvaß nem pa vatet a taateß vih, a teß hikta se vakmis a no neöm. 14 Ivëhkëk, eöm se keh nonok e nem pa taateß totoopin, paröm kon kamis suk a tah pamëh, eöm se vaeö rakah! Suk a soe manih po Puk pe Sosoenën to soe va non manih pan,

“Eöm se koe a naöp a ma tah nee to nanaöp i ne,
eöm se koe a karë, me a naöp a ma tah poë varih.” b 
15 Ivëhkëk, eöm se ta nem e Kristo vamanih pe Apuh a vivihan, manih pa ma kupu peöm. Eöm se teß vamatop tamoaan nem pa piun a ma soe po teß kurus varih to hi a neöm pa vamaaka a pusun in a tah vih vëh, nöm to teß me nem pa taateß anoeh peöm. 16 Ivëhkëk, eöm se piun raoe pa taateß vaato vatö, me kokoman tö vaßpeh me a taateß ta. O kokoman peöm se teß vatotoopin tamoaan non, ivëh, ko teß varih to sosoe vavahat a no neöm, suk a ma tah vihvih nöm to nonok nem vamanih pa teß to vavatet non e Kristo, o teß poë varih se kon poet suk a ma soe pee. 17 Eß to vih e non pa teß se kon kamis suk a ma kiu vih neß to nonok non, pa ö ne Sosoenën se iu non, këh e non pa ö neß to nonok non a ma taateß hat.

E Kristo To Mët, Pareß Sun Hah, Pa Kon Hah A Ra

18 E Kristo to teen voh a ma hat pea pareß mët, ko hikta se mët hah non, eß a teß totoopin, ko hikta teß non ta hat. Ivëhkëk, eß to teen a ma hat pea, ko mët suk a ra, o teß varih to teß me no a ma hat, ko me vatët a ra manih pe Sosoenën. Ee to ip vamët voh poë, ivëhkëk, eß to toß hah en, ko teß toßtoß e non pa tuvuh manuh pa vöön va kin. 19 Eß to teß non a tuvuh, pareß nö en pa vatvus a soe manuh po tuvuh varuh to teß ne pa nohnoh,
[po tuvuh varuh to teß ne pa nohnoh], A ma pah teß natnat to koman ne pan, a ma tuvuh poë varih, ee o tuvuh pa napan varih to mët voh pa tëëm pe Noaß. Ka ma meh teß to koman ne pan, eß to sosoe suk non o tuvuh, keß, o ankeroß varih to pënton varo voh a soe pe Sosoenën. O Jiuß to vaman va ne manih pan, e Sosoenën to nohnoh voh a ma tuvuh poë varih pa tëëm voh pe Noaß.
20 ee to tënan varo moaan voh a ma soe pe Sosoenën pa tëëm voh pe Noaß. E Sosoenën to anoeh rakah voh non raoe, pa ö ne Noaß to nonok non o paröß peß. A siß nap keok to onöt ne a tönim me a kukön teß to hikta vuk voh manih pa unat hat vëh to tavus voh. 21 A ruen pamëh to vëknöm non a pupui vëh, to kon hah a ra, eß to hikta teß non pan, a ruen ivëh, to rurup non o pö manih pa sionin a teß. Ivëhkëk, a soe vaman pea manuh pe Sosoenën to taneß no maß po kokoman vih pea. A tah vëh, eß a pupui pa kon hah a ra, suk e Ieesuß Kristo to kon koe hah ka ra pa ö neß to sun taneß hah pa nap mët. 22 Kuru e Ieesuß to nö en manuh pa vöön va kin, ko ihoß non pa papmatö pe Sosoenën. Pareß matop non a ma ankeroß, me o oraß va pa vöön va kin to teß me ne a ma vu kikis.

Copyright information for `TPZ