1 Thessalonians 3

E Pöl To Vanö E Timotiß Manuh Pa Vöön Va Tesaronaëkaß, Marën A Vakikis O Vaman Pa Napan Va Pa Vöön Pamëh

Emöm to pah kokoman vörep e nem peöm, pamöm hikta onöt nem a anoeh varë. Emöm koman to nok em po kokoman, pan eß to vih non pemöm poß Saëlas se teß nem manih pa vöön vëh Atëns. Emöm to vanö ka nös neöm e kea pea Timotiß. Suk eß a teß pamëh to kiu vaßpeh me a no möm. Kemöm nonok nem a kiu pe Sosoenën. Eß me se vavaßaus a no möm pa vatvus a Soe Vih to soe suk non e Kristo. Emöm to vanö nös eah, marën a vakikis me a vaßaus o vaman peöm. Peß to hat non pa ö no a punis me kamis vëh, nöm to tataum nem tomeß nok a neöm ka ma upöm peöm kokoman vatëh e ne pa ma tah poë varih. Eöm koman to nat e nem, pea se taum a ma vu punis poë varih. Ko poen nemöm to teß me voh a no neöm, emöm to soe vanat voh em peöm pan, ea kurus se taum ee pa ma vu kamis to teß va ne manih. Eöm to nat e nem, kuru vaßih no a ma kamis poë varih to tavus vateeraß ee manih pea. Eß a pusun in a ö nöß to hikta se anoeh varë suk noß. Ivëh, nöß to vanö suk nös e Timotiß manem peöm, pan eß se inan po vaman peöm, pareß soe vanat hah a maß neoß. Peöß to nanaöp noß pan, e susun po oraß hat tomeß punöß a neöm, köm vaman eah, ka ma kiu kurus nemöm to nok manih peöm, ro akuk ee.

E Pöl To Soe Vavihvih E Sosoenën, Suk E Timotiß To Soe Vanat Poan A Vih Pa Napan Va Tesaronaëkaß

Ivëhkëk, e Timotiß to taneß hah maß manem peöm, ka kuru vaßih, neß to tavus en maß pemöm, pareß teß taneß hah maß a soe vih manih peöm, pareß vatvus kamöm, pareß soe pan, eöm to öt vakis avoeß rakah e nem po vaman peöm me a taateß iu teß. E Timotiß me to soe kamöm pan, a ma tamoaan nöm to kokoman a no möm, paröm kehkeh ep a no möm. Vamanih pa ö nemöm to kehkeh ep me va ka no neöm. Ivëh, kën kea, me ra kën vamen, emöm to pënton em, peöm to vaman vakis rakah e nem. Eß a tah pamëh to vakikis rakah en po kokoman pemöm manih pa ma punis, me a ma kamis varih nemöm to teßteß nem. O toßtoß pemöm se puh rakah po vaeö pa ö nemöm se nat ka no neöm to sun vakis nem po vaman peöm, paröm vatös me nem e Sunön. Emöm to teß rakah me nem o vaeö apuh manih pa matan e Sosoenën pea, suk eöm. Emöm to hikta onöt nem a soe vavihvih va antoen eah, suk a ma vaeö varih nemöm to haraß nem. 10 A ma potan kurus, me a ma popoen kurus, nemöm to hinhin nem manih pa ma kupu pemöm, pan e Sosoenën se vaonöt ka möm, kemöm nö nös ko ep ka neöm. Pamöm heß a neöm a ma taneah nöm to iu nem, marën a vakikis o vaman peöm.

E Pöl To Iu Ep Hah Non A Napan Va Tesaronaëkaß

11 Kuru nemöm to iu rakah nem, pan e Sosoenën e Tamaara, pen Sunön pea Ieesuß Kristo se vamatop ka möm ta hanan, kemöm nö nös manem peöm. 12 Emöm to iu nem e Sunön pea Ieesuß Kristo se nok a taateß iu teß peß, keß pu momoaan manih peöm, ko pahan poß na manuh po upöm teß, me manih pa napan kurus. Ivëh, köm sih iu nem ro upöm teß, vamanih pa ö nemöm to iu vavoh ka no neöm. 13 Manih pa taateß pamëh ne Sosoenën to vakikis en pa ma kokoman peöm. Ko poen ne Sunön pea Ieesuß Kristo se hah me maß a nap vivihan peß, eß se ep a neöm o vivihan, no a ma taateß peöm to totoopin, ka hikta hat to teß non manih peöm pa matan e Sosoenën, e Tamaara.

Copyright information for `TPZ