1 Thessalonians 5

Ea Se Anoeh Vavih No O Poen Ne Sunön Se Hah Maß

Kën kea me ra kën vamen, emöm to hikta onöt nem a kiun to kiun to soe vanat a neöm o poen, me a aoaß poanheh, no a tah pamëh se tavus maß. Eöm to nat vavih e nem po Poen ne Sunön se hah maß manih po oeh vëh, eß se vöhkak rakah a neöm. Eß se nö va maß manih pa ö no a teß kakaveo to pön va maß pa popoen. A napan se vavasoe e ne pan, “Kuru eß o poen teß vavih pea, na se teß vakamöß no.” Ivëhkëk varuß rakah va ko manih, no a tah vëh se miröß raoe, se tavus vëhöß en pee. Keß teß va e non manih po kamis apuh vëh to tatavus non pe köövo to kehkeh vahuh non e koaß. A napan poë varih to hikta antoen ne a vaniu këh a tah pamëh.

Ivëhkëk, kën kea me ra kën vamen, eöm to hikta teß nem pa popoen. Ivëh, no Poen hah pe Sunön to hikta se vatoksean suk a no neöm, köm töhkak va em manih pa ö no a teß to ep in a teß kakaveo to nö maß. Eöm kurus rakah a napan va po maaka me pa potan. Ea to hikta teß no pan, ea a napan va pa popoen. Ivëh, ka se nat no teß va nö manih po upöm teß varih to koroh ne sih. Ivëhpëhkëk, ea se teß vamatop tamoaan no, para opoep no, ko teß me no o kokoman maaka. Ea to nat vavih e no pa napan varih to koroh ne sih, ee to koroh ne sih pa popoen. Ko teß varih to kakaak ne sih, ee to kakaak ne sih pa popoen. Ivëhkëk, ea a napan va pa potan. Ea se teß natsean no, para matop hah a no. Ea se kon rakah a taateß vaman, me a taateß iu teß, kee teß va ne manih po këproß to sunpip a rora, ko matop e ne pea. Ea me se kon a taateß anoeh vamanih pa ö ne Sosoenën to kon hah voh en pea këh a hat. Ka taateß pe Sosoenën pamëh, se teß va non manih po uvan eh vavapus me, ne ea to uvan no. E Sosoenën to hikta kon voh a ra marën a vakmis a ra. Ahik. Eß to kon koe hah voh a ra manih pa mët pe Ieesuß Kristo. 10 Suk ataeah, e Ieesuß to mët voh, marën a vaßaus a ra. Ivëh, ka se pët teß vaßpeh me no eah po poen na to teß toßtoß no, keß, ea se mët, po poen neß se hah maß. 11 Ivëh, ke eöm papaeh se heß a ma soe vih, marën a vakikis a ma meh peöm. Vamanih pa ö nöm to nonok va nem manih kuru.

E Sosoenën To Antoen E Non Pa Vaßaus A Napan Pe Kristo, Kee Kon A Ma Taateß Vih Oah

12 Kën kea me ra kën vamen, kuru nemöm to ihi e nem peöm pan, eöm se ta nem a napan varih to kiu ne topnineöm. Kee vovoh ka neöm manuh pe Sunön, ko vavaasis a neöm pa taateß pa napan to vaman ne e Kristo. 13 Eöm se ta nem raoe, ko kë nem a ëhnëëre manih pa taateß iu peöm, suk a ma kiu nee to nonok ne. Paröm vapöh kokoman nem topnineöm.

14 Kën kea me ra kën vamen, emöm to ihi e nem peöm pan, eöm se soe vanatsean ke ro teß varih o karauh. Paröm kunkuin o kokoman po teß varih o nanaöp. Ko vaßaus o teß varih o sunë. Paröm kunah, ko teß me nem a taateß tö manih pa napan kurus.

15 Eöm se teß vamatop nem, paröm nat va nem manih pan, eß to hikta vih non pa piun a hat no a meh teß to nok manih peöm. Ivëhkëk, eöm se sun vakis nem pa nok ataeah to vih non po epep po upöm peöm, me a napan kurus.

16 Eöm se teß vaeö tamoaan nem, 17 paröm hinhin tamoaan nem pa ma poen kurus. 18 Ka ma taneah ro to tavus ne manih peöm, eöm se soe vavihvih ke na e Sosoenën. Ke Sosoenën koman to iu a no neöm a napan varih to vatös me voh e Ieesuß Kristo, pan eöm se nonok nem a ma taateß poë varih.

19 O poen no a Tuvuh Vasioß se keh kuin o kokoman peöm pa nok a kiu peß, eöm se nat nem sunpip a soe peß. 20 Paröm nat nem pënton varo a soe vanënën. 21 Ivëhkëk, eöm se iniinan vavih pa ma soe, me a ma taateß varih no o teß vanënën soe to soe ka neöm. Paröm öt vakis a soe me a ma taateß vih varoe. 22 Ko vaniu këh nem a ma vu taateß hat.

23 Eöß to hinhin noß e Sosoenën koman, pan eß se heß a neöm a taateß moomo peß. Eß to nok a neöm, köm heß kurus em pa ma toßtoß peöm manih peß, ko tavus em o teß vivihan. Eß me se matop vavih e non pa tuvuh peöm, me o apen, me a ma sionineöm no ahikta hat to teß ne manih pee. Kee teß vavih e ne, ko antoen po Poen ne Sunön pea Ieesuß Kristo se hah maß. 24 Eöm se vaman rakah nem a teß vëh to vaoe voh a neöm, ivëh, e Sosoenën. Eß se nok ken peöm pa ma moeh tah kurus, kee tavus ee manih peöm. Suk eß to vavatet non a soe man peß.

25 Kën kea me ra kën vamen, eöm se hinhin vaßaus a no maß möm.

26 Manih pa taateß pea a napan pe Sosoenën, a ma papaeh peöm se heß a soe vavihvih vivihan peß manih pa ma upöm peöm, pa ö nöm to vatötönun.

27 Eöß to soe vakis rakah ka neöm, manih pa ëhnan e Sunön pea, Ieesuß Kristo, eöm se ëhëh rakah nem o kiun vaßih manih po teß kurus varih to teß me ne o vaman.

28 Eöß to hinhin noß pan, o ururuan pe Sunön pea Ieesuß Kristo se teß tamoaan me a no neöm.

Copyright information for `TPZ