2 Corinthians 2

Ivëh, köß iu noß a meh vavih peöß maneom peöm, se nat non teß non pan, eß a meh vavih se heß punis a neöm. Eöß se keh heß punis eoß peöm, keteh poß ivëh, se teß non, pareß vavaeö a non neoß? Eöm varoe a napan nöß to heß punis voh se vavaeö a neoß. Ivëh, ke eöß hikta se nö noß nös manem peöm, paröß kon o kokoman punis manih peöm a napan to vavaeö a no neoß sih. Keß a pusun in a tah nöß to kiun suk voh nös o kiun vaßih, paröß vanö vovoh ka nös neöm. Eöß to nat e noß, peöß se keh haraß vaeö suk noß ta pah tah, a, eöm kurus me se pët haraß vaeö suk e nem pa tah pamëh. Eöß to kiun voh ka nös neöm o kiun peöß, o kokoman peöß to puh rakah non po tamak, me o kupu peöß to karë rakah e non. Eöß to kinkiun vaßpeh me e noß pa hunun mataneoß to tatakoß e non. Eöß to hikta kinkiun noß o kiun peöß to vatamak a neöm, ahik, eöß to kiun nös o kiun vaßih, pan eöm se nat va nem manih pan, eöß to iu suntan rakah e noß peöm.

Eöm A Napan Va Körin Se Ihan Anoe A Hat No A Meh Teß To Nok Voh Manih Peöm

A pah teß va peöm to nok voh ken peöm pa punis apuh, eß to hikta heß punis vi ka no neoß. Eöß to hikta iu nok noß ta ma soe kikis suk a tah vaßih manih peöm. Suk ataeah, eöß to onöt e noß pa soe vamanih pan, eß to nok voh a neöm ka ma kokoman peöm punis amot voh ee. Ko vakmis vëh, no a peo in e eöm to heß eah, to antoen e non peß. Ivëhkëk, kuru nöß to iu noß a ö nöm se vatet a meh taateß, eöm se ihan anoe këh eah pa hat peß, paröm vatö o kokoman peß, ko kokoman peß vih keß haraß vaeö hah. Peß to hat non pa ö no a punis tomeß apuh oah poan, keß pah hat oah en po tamak. Ivëh, köß hin vakis rakah e noß peöm se öt hah eah, paröm vahoß eah manih topnineöm, ko vataare eah a ö nöm to iu avoeß rakah e nem peß. Moaan voh nöß to kiun voh ka nös neöm o kiun vaßih, marën a punöß ro a neöm, pan eöß se ep voh pan, eöm vavatet e nem pa ma soe peöß, keß ahik. 10 Eöm se keh ihan anoe a hat no a pah teß vëh to nok manih peöm, eöß me se ihan anoe eoß pa hat peß. Keß se keh teß non ta hat nöß se ihan anoe, a, eöß se ihan anoe eoß manih pa matan e Kristo, marën a vaßaus a neöm. 11 Eöß to nok vamanih, suk eöß to nanaöp noß e susun po oraß hat tomeß piuk ka ra, pareß rëh vahik en pea pa nok a ma taateß hat. Suk ataeah, ea to nat vahik voh ee pa ma taateß, me a ma kokoman hat vakoaan peß.

E Pöl To Kehkeh Ep Non Pe Taëtus

12 O poen nöß to vos manuh pa vöön va Troas marën a vatvus a Soe Vih pe Ieesuß Kristo nën, eöß to taum eoß pa ö ne Sunön to peret ken peöß pa hanan va pa ö nöß se nok eoß pa kiu peß nën. 13 Ivëhkëk, o kokoman peöß to hikta teß moomo non, suk eöß to hikta taum e kea peöß Taëtus. Eöß to soe ataaton a napan va Troas, paröß nö ko vos eoß manuh pa muhin va Mësadoniaß.

Manih Po Kikis Pe Sosoenën, No Aposol To Eh Oah Suk Ne Manih Po Vapus

14 Ivëhkëk, eöß se soe vavihvih ke na e Sosoenën, suk a ma tamoaan neß to meeme vah ka no möm pa vatvus a soe in a kiu kikis ne Ieesuß Kristo to nok voh, marën a kon hah a ra a napan peß. Ka napan se nat koe in e Sosoenën manih pa taateß pamëh. Keß teß va non manih pa tah avoavuh vih to tavus, ka tuvuh teßteß vah non manih po oeh avoes. 15 Oman, ea koman to teß va no manih pa tah avoavuh vih, ne Ieesuß Kristo to kon pareß ës ke na e Sosoenën. Ko avuh vih pamëh to nö non manih pa napan varih to teß ne manih pa hanan to nö non pa vöön va kin. Me manih topnin a napan varih to teß ne pa hanan to nö non manuh pa suraß ësës tamoaan. 16 Ka napan varih to teß ne pa hanan to nö non manuh pa suraß ësës tamoaan, no a kiu, me a soe nemöm to nonok nem, to tavus va ee manih po avuh pa tah se mët. Ivëhkëk, a ma soe me a ma kiu nemöm to nonok nem topniira napan varih to teß ne pa hanan to nö non pa vöön va kin, to tavus va ee manih pa tah avoavuh vih va po toßtoß to vaßaus non raoe. Ivëh, keteh poß to onöt non a nok a kiu va pa vatvus a Soe Vih? 17 Ivëhkëk, emöm to hikta teß va nem manih pa nap peo varih to nönö vah ne, pare piuk vahok in a napan, ko nonok moniß ne manih pa soe pe Sosoenën. Ivëhpëhkëk, emöm to kon a kiu vaßih manih pe Sosoenën koman, pamöm hikta nat nem pa piuk. Emöm koman to vapöh kokoman rakah me e Ieesuß Kristo, ka manih pa matan e Sosoenën, nemöm to vavatvus vatotoopin rakah me e nem pa ma soe neß to heß voh a möm, o teß kikiu peß.

Copyright information for `TPZ