aAis 49:8
bLev 26:11-12; Jer 32:38; Ese 37:27
cAis 52:11; Ese 20:34, 41
d2 Sml 7:14; 7:8

2 Corinthians 6

O Aposol To Taum A Ma Punis Suk A Kiu Pee

Emöm to kikiu vaßpeh me nem e Sosoenën pamöm sosoe vakis rakah ke nem peöm pan, “Eöm se vakiu vavih o heß vih ne Sosoenën to heß a neöm.” Suk ataeah, manih koman o Puk Vapenpen, ne Sosoenën to soe vavoh manih pan,

“Eöß koman to vahoß voh eoß po poen
nöß se kon hah a neöm,
ko nok vavih eoß peöm.
Ka manih po poen pamëh
nöß to pënton a ook peöm,
paröß vaßaus eoß peöm.” a 
Pënton öm! Kuru, eß o poen ne Sosoenën se nok vavih en pea. Ka kuru me, ne Sosoenën to kehkeh kon hah e non pea.

Kemöm hikta iu nem a ö no a napan se soe vavahat a kiu pemöm. Ivëh, nemöm to punöß vëhvaß suk rakah e nem pa kon ke a tah vëh se vahan pa teß, keß kuß. Ivëhkëk, a ma moeh tah kurus nemöm to nonok nem to vataare a no möm a nap kiu pe Sosoenën. A ma tamoaan rakah nemöm to sun vakis rakah e nem sih pa tëëm nemöm to kon kamis, me a tëëm no a punis to taum a möm, me a ma tah varih to mimiröß a no möm, me a ma teß tah varih to hihinën a no möm. Ee to ip a möm, pare vahoß ee pemöm pa nohnoh. Emöm to teß me e nem po teß varih to hat ov a no möm, pare veveo vah ka no möm. Emöm to kiu vëhvaß rakah e nem. Ka ma meh poen, nemöm to hikta ënëën nem, pamöm hikta kokoroh nem. Emöm to nonok nem a taateß voon, pamöm vavataare nem a napan, pan emöm a nap kiu pe Sosoenën. Me emöm to öt vakis e nem po nat vih, pamöm nonok nem a taateß vih manih pa napan kurus, pamöm hikta nat nem pa heve vëvëhöß. Ahik. Emöm to kokon nem sih o kikis manih pa Tuvuh Vasioß. Pamöm teß rakah e nem pa nok a taateß iu a meh teß. Emöm to vavatvus nem sih a soe a man rakah, pamöm nonok nem a ma kiu po kikis pe Sosoenën. Emöm to öt vakis rakah e nem sih pa taateß totoopin, ka taateß totoopin pamëh teß va non manih po tah vavapus, me eß to teß non pa papmatö, me a papkiruk. Ka manih pa taateß totoopin pamëh, nemöm to vavapus rakah me e nem pa teß vëh to vakihat me non e Sosoenën.

O upöm teß to kë e ne pa ma ëhnanmöm. Ko upöm teß to vapokaß ee pemöm pa ma soe, ko vöknah rakah ee pemöm. Ka ma upöm soe ee pa ma soe hat manih pemöm. Ivëhkëk, o upöm to sosoe ne pan, emöm o teß no a ma taateß pemöm to vihvih. Ko upöm sosoe ne pan, emöm o teß pikpiuk. Ivëhkëk, ahik, emöm to vavatvus vaviß nem a soe man. Eß to teß ke non pan, ahikta teß to nat ka no möm. Ivëhkëk, a napan to inan vavih rakah e ne pemöm, kemöm haraß va e nem manih pa teß to kehkeh mët non. Ivëhkëk ahik, emöm to teß toßtoß a voe e nem. Keß teß va i non manih pan, e Sosoenën to rëprëp a no möm po opëß, marën a vavaasis a möm. Ivëhkëk, eß to hikta ip vamët a möm. 10 Ivëh, nemöm to taum suk voh a ma vu punis, ivëhkëk, eß a tah akuk ipamëh, a ma tamoaan emöm to teß vaeö nem sih. Emöm o arus, ivëhkëk, eß a tah akuk, emöm to vaßaus a nap peo, kee öt ö ee. Keß teß ke non pan emöm to hikta teß me nem ta tah, ivëhkëk emöm to vaneah e nem pa ma tah kurus.

11 Emöm to soe vamaaka rakah ke voh em peöm a napan va Körin pan, emöm to iu rakah e nem peöm. 12 O haharaß pemöm manih pa iu a neöm to hikta hikhik ro non. Ahik rakah, emöm to iu suntan rakah e nem peöm. Ivëhkëk, a ma kokoman peöm to teß ke e ne pemöm, ka hikta teß vapöh kokoman rakah no pa taateß iu. 13 Kuru, nöß to vavaato me va ka noß neöm manih pan, eöm ro pus koaß peöß. Eöm se peret rakah a ma kokoman peöm manih pemöm, paröm iu va ka möm manih pa ö nemöm to iu va ka no neöm sih.

Ea Se Teß Rakah Va No Manih Pa Iuun Pe Sosoenën

14 Eöm varih a napan to vavatet nem sih e Kristo. Eöm se koe a kiu vaßpeh me ra napan varih to hikta vaman ne poë, eöm se nat nem vatös me nem raoe. Peß a taateß pee to matan ke e non pa teß taateß peöm. A taateß totoopin me a taateß hat to hikta antoen ne a vatös. O maaka, me a popoen to hikta antoen me ne a vatös. 15 E Ieesuß Kristo vapöh kokoman me kës e non pe susun po oraß hat, ha? A teß vëh to vaman non e Kristo, me a teß vëh to hikta teß me non to vaman, ee antoen kës e ne pa teß me to pöh kokoman, ha? Ahik rakah. 16 Eß teß vah va non nih, eß antoen kës e non pa ö no a ma tah nößnës se nö ko pet e ne koman a Iuun Hinhin Apuh pe Sosoenën? Ea kurus to teß va e no manih pa Iuun Hinhin Apuh pe Sosoenën toßtoß tamoaan. Ivëh, ne Sosoenën to soe suk vavoh manih komön o Puk Vapenpen peß pan,

“Eöß se teß vaßpeh me noß pee,
paröß nönö vaßpeh vah me e noß pee.
Paröß teß e noß e Sosoenën pee,
kee teß e ne a napan peöß.” b 
17 Ivëh, ne Sunön to soe suk vavoh manih pan,

“Eöm se taki këh maß a napan poë varih.
Paröm nat nem vaket ta tah
to hikta teß vih non manih pa matan e Sosoenën.
Ivëh, köß vaeö ka neöm, paröß vaonöt ka neöm,
köm sih teß vaßpeh me poß e nem peöß.” c 
18 “E Sunön A Kikis Vi to soe vamanih pan,

‘Eöß se teß noß e tamëneöm,
köm se teß nem o pus koaß oeteß
me ro pus koaß mon peöß.’” d 
Copyright information for `TPZ