aSng 112:9

2 Corinthians 9

A Napan Va Körin Se Vaßaus A Napan Varih To Vaman Ne E Sosoenën

Eöm to nat vahik voh em po heß vih vëh nemöm to ununun voh, marën a vaßaus a napan pe Sosoenën varih to teß ne pa muhin vëh Jiutiaß. Ivëh, nöß hikta se kiun suk noß to kiun rë, marën a soe vanat a neöm a tah pamëh. Eöß to nat rakah e noß pa ma kokoman peöm to takuin rakah ee pa heß o vaßaus peöm manih po upöm teß. Ka ma tamoaan rakah nöß to këëkë noß a ma ëhnëëneöm manih pa matëëra napan va Mësadoniaß. Eöß to sosoe va i noß raoe manih pan, “O kirismas vöh to hik, no a napan va Akaëaß to vamatop voh ee pa nok a kiu va pa ununun a moniß.” Ko poen no a napan va Mësadoniaß to pënton a soe va pa ö nöm to iu rakah e nem pa nok a kiu va pa heß a ma moeh tah, a tah pamëh to kunkuin rakah en pa ma kokoman pa nap peo va Mësadoniaß, kee vamatop me ee pa heß a ma teß heß pee. Ivëhkëk, eöß to hikta iu noß a soe va pa ö nemöm to kë nem a ëhnëëneöm, seß tavus vamanih po vaato akuk. Ivëh, köß iu noß pan, eöm se teß vamatop tamoaan nem pa heß ataeah, vamanih pa ö nöß to soe vavoh ke raoe. Keß a tah pamëh, nöß to kokoman noß, paröß vanö nös a poa kea pea poë varih, kee nö nös manem peöm. Emöm to vaman rakah va e nem manih pan, eöm to teß vamatop e nem pa heß ta ma tah. Ivëhkëk, eöß to koman noß pan, eß to hat non pa ta ma pah teß va Mësadoniaß se keh nö vaßpeh me a nös neoß, pare taum vamanih pan, eöm to hikta vamatop avoeß nem a heß ta ma tah. Emöm se haraß vapoet suk em pa tah pamëh, eöm me se haraß vapoet em. Ivëh, nöß to koman suk noß a hi a ma kea pea, pan ee se vovoh ka nös neoß manem peöm. Ko vaßaus a neöm köm vamatop a ma heß poë varih, nöm to soe pan, eöm se vanö na manuh pa napan va Jiutiaß. Ko poen nöß se keh suk nös, ka napan varih to nö vaßpeh me a nös neoß to antoen e ne pa nat vamanih pan, eöm koman to kehkeh heß nem a moniß pamëh. Keß to hikta teß non pan, emöm to totoon a no neöm pa heß a ma moniß peöm.

Eöm se koman hah na a soe vaßih, A pah teß to poßpoß a ma siß voaß tah ënëën to hikta teß peo ne, a teß pamëh to hikta antoen non a kon ta ma taëën peo. Ivëhkëk a teß vëh to poßpoß a voaß peo, eß se kon oah en pa taëën peo. Ivëh, ke eöm papaeh, eöm se kokoman vavih momoaan voh, manih pa ma kupu peöm pataeah nöm to kehkeh heß nem. Peß to hat non pa ö nöm se haraß vapunis suk nem a tah pamëh, me eß to hat non pa ö nöm se koman nem pan, a napan to toon a neöm pa heß a tah. E Sosoenën to iu rakah non sih a teß vëh to haraß vaeö rakah non, pareß heß o heß peß. E Sosoenën to antoen e non pa heß oah a neöm a ma vu tah peo vihvih to antoen ne a vaßaus a ihoß peöm. Köm vaneah rakah e nem pa ma moeh tah peo to antoen e ne pa nok a kiu vih, marën a vaßaus o upöm teß. O Puk pe Sosoenën to soe suk non a taateß pamëh to teß va non manih pan,

“O teß varih to vavatet ne o iu pe Sosoenën, to heß oah a ma tah pee manih pa nap arus.
Ka ma taateß totoopin pee, na to hikta se vanun no. a 
10 E Sosoenën koman to heßheß non a voaß manih pa teß nepnep voaß, me a taëën no a napan se ëën. Keß teß akuk va kov e non manih pan, e Sosoenën se heß en peöm pa ma tah, köm öt onöt rakah em, paröm onöt rakah e nem pa vaßaus o upöm teß pe Sosoenën. Ivëh, ka taateß vih peöm se pu vaßpuh oah en manih pa ma komëneöm, vamanih pa teß to nep a ma voaß tah ënëën pa rak peß, ko vasuksuk no a nep taëën peß to pah voaß suntan en. 11 E Sosoenën se heß en peöm pa ma moeh tah peo, köm öt onöt rakah em, paröm iu heß pet e nem po upöm teß pa ta ma teß tah. Ka ma heß peöm to koe ke maß manih pemöm, pare nok a nap peo, kee soe vavihvih kee na pe Sosoenën. 12 Ivëh, ka kiu vëh nöm to nok se vaßaus en pa napan pe Sosoenën, kee hikta onöt ne a kökööt hah pa ta meh taeah. Me a taateß pamëh se nok a napan, kee soe vavihvih oah kee na pe Sosoenën. 13 Ka kiu nöm to nok manih pa vaßaus a napan, se vataare en pa taateß vaman peöm. A nap peo rakah se kë ne a ëhnan e Sosoenën, suk ataeah, ee se ep a ma tah peo nöm se heß raoe me ro upöm teß, me eöm to pënton voh em pa Soe Vih pe Kristo. A Soe Vih pamëh, ne eöm to soe voh pan, eöm to vaman em peß. 14 Ee se nat va e ne manih pan, o ururuan apuh ne Sosoenën to heß a neöm. Ivëh, nee to iu suk ne a teß vaßpeh me a no neöm pa tëëm nee to hinhin ne. 15 O heß vih vëh ne Sosoenën to heß voh a ra, eß to apuh oah e non pa ma meh tah, ea to hikta onöt no a vatvus vahik a ma soe va po heß vih pamëh. Ivëh, ke ea se soe vavihvih e Sosoenën, suk o heß vih peß.

Copyright information for `TPZ