2 Peter 3

E Ieesuß Se Hah En Maß

A ma vakamöß peöß, o vapöök kiun peöß ivëh, nöß to vanö ka nös neöm, pa heß a neöm o kokoman voon pa nat hah a ma tah poë varih. Eöß to iu noß neöm se koman nem a ma tah se tavus maß, no a teß vanënën soe vivihan pe Sosoenën to vanënën moaan voh. Eöm me se nat hah em pa soe kikis ne e Apuh a teß va pa kon hah a ra to heß koe voh manih po aposol peöm.

Eß a tah apuh oah nöm se maaka nem ivëh, pa tah se tavus pa ma poen no oeh se hik. A napan se kö a neöm, pare teß ne pa vatet o iu hat va po sionin nee to iu nok ne. Ee se soe pan, “E Ieesuß to soe vaman voh pan, eß se hah maß. Keß poß heh? A ma tamaara to mët voh ee, ivëhkëk, aton non kuru a ma tah to vatoe avoeß va ne pa pah ö, pa ö ne Sosoenën to nok vavoh in o oeh.”

Ivëhkëk, ee to hikta iu kokoman hah ne pa tah to tavus moaan rakah voh. Moaan rakah voh ne Sosoenën to soe varoe, ka akis me oeh tavus maß. Manih pa soe peß, eß to ki o oeh me a ruen pa ö neß to ununun a ruen pa pah ö, ko oeh tavus en. Ke Sosoenën soe ka unat tavus en manih po oeh, ko miröß avoes en po oeh. Ka pah soe avoeß pe Sosoenën to ötöön non a akis me o oeh vëh, na to teß no kuru to anoeh no o suraß se tavus maß ko pah miröß en pee. Ee to teß anoeh ne o Poen Kiiki pe Sosoenën pa ö neß se miröß a napan kurus varih to heß tonun voh ne poë.

Ivëhkëk, ma vakamöß peöß, eöm se koe a anoe a pah tah vëh. Manih po kokoman pe Apuh, o pöh poen to vatoe e non po 1000 kirismas, ko 1000 kirismas to teß va non manih po pöh poen. E Apuh to hikta vavaapun non sih pa nok a tah vamanih pa ö neß to soe vaman vavoh, pa ö no upöm teß to maaka va ne a taateß vaapun. Ivëhkëk, e Sosoenën to teß me non a taateß anoeh manih peöm. Eß to hikta iu non tah pah teß se ro. Ivëhkëk, eß to iu non a napan kurus se panih a ma kupu me o toßtoß pe.

A Akis Me O Oeh Se Hik En

10 Ivëhkëk, o poen hah pe Kristo se vöhkak a ra vamanih pa ö no a teß kakaveo se nö vëvëhöß rakah va maß. A akis se po vaßpuh ko hik en. Ka ma moeh tah kurus to teß hop ne manih pa akis me po oeh, no a suraß se ës vahik rakah en pee. 11 A ma tah kurus varih se tamiröß vamanih. Ivëh, ke eöm se teß va poß nem nih? Eöm se teß vavivihan nem, ko nonok nem a kiu pe Sosoenën, 12 eöm he anoeh nem, ko vavëhöß nem o Poen Kiiki pe Sosoenën se tavus maß. O Poen pamëh se tavus maß, ka suraß se ës vahik a akis, ka ma moeh tah kurus to teß ne nën, no oran se varuen en pee. 13 Ivëhkëk, e Sosoenën to soe vaman voh ka ra, ka anoeh no a vöön voon va kin, me o oeh voon vëh, no a napan to teß me ne a taateß totoopin varoe se teß ne.

Ea Se Ut Vavih No Ko Anoeh No E Apuh

14 Ma vakamöß peöß, pa tëëm ne eöm to anoeh nem a ma tah poë varih se tavus. Eöm se kiu vëhvaß nem pa teß vavivihan, ka hikta teß se soe pan, eöm to teß me nem a hat. Eöm se punöß pa teß vaßpeh me e Sosoenën pa taateß moomo. 15 Eöm se nat va nem manih, e Apuh pea to teß me non a taateß anoeh. Suk eß to iu kon hah a rora. E kea pea Pöl to soe voh ka neöm a pah soe avoeß pa ö neß to kiun voh ka neöm po nat vih ne Sosoenën to heß poan. 16 Eß to kiun suk voh a ma soe kurus poë varih manih pa ma kiun peß. A ma pah tah to teß ne pa ma kiun pe Pöl, to hivaß e non pea pa maaka raoe. Ivëh, ka ma teß to hikta nat ne, me o teß no vaman pee to sunë, ee to vamaaka vapiun ne a ma soe poë varih. Me ee to vamaaka vapiun ne a ma meh soe to teß ne komön o Puk pe Sosoenën. Ivëhkëk, ee to mimiröß koman hah a ne, pa ö nee to nonok va ne nën.

17 Ma vakamöß peöß, eöm to nat voh em pa taateß pamëh, ivëh, ke eöm se matop vavih nem. Eöm se nat nem heß këm pa nap hat, kee rëh ke a neöm manih pa taateß nee to nonok ne pa vamaaka vapiun a soe man. Eöm se matop vavih nem, suk eöm tomeß kuß këh o vaman eh peöm. 18 Ivëhkëk, eöm se pu pa taateß ururuan, me o nat vih pe Apuh pea Ieesuß Kristo, a Teß va pa kon hah a ra. Kuru, me pa ma tamoaan ea se heß no eah o ëhnan apuh. Oman.

Copyright information for `TPZ