2 Timothy 1

E Pöl To Vakikis E Timotiß

Eöß e Pöl, e aposol pe Ieesuß Kristo, po iu koman pe Sosoenën. Ke Sosoenën vanö a neoß pa vatvus a soe vaman va po toßtoß vëh, to teß non pe Ieesuß Kristo.

Manih pën Timotiß, eën to teß va nom manih pe koaß rakah peöß.

Eöß to hinhin noß pan, e Sosoenën e Tamaara, me e Ieesuß Kristo e Apuh pea, se ururuan, ko heß a oah o heß vih, me a taateß moomo.

Ea Se Koe a Poet In A Soe Vih

Eöß to vavihvih noß e Sosoenën, pa ö nöß to nat tamoaan va ka noß oah komön ö hin peöß, pa potan me pa popoen. Eöß to nonok noß a kiu peß, paröß nonok noß a tah nöß to nat noß to totoopin. Vamanih pa ö no a kën sipuneoß to nonok va voh ne. Eöß to koman hah a oah, pa ö nën to okook voh nom neöß. Eöß to iu ep rakah noß oah, ko se puh rakah po vaeö. Eöß to kokoman hah po vaman vamaman voh pën. O vaman pamëh to teß moaan voh non pe sipumah Lois, me manih pe sinömah Iunis. Eöß to nat e noß pën to teß me nom po pöh vaman pamëh kuru. Eß a tah vëh nöß to iu kunkuin noß o kokoman pën pan, eën se vakiu o heß vëh ne Sosoenën to heß voh a oah. Pa ö nöß to vahoß voh a koreneoß pa pasumah.
[vahoß a koren manih pa pasun] Eß marën a nok a ma tah varih, (1) pa heß a tapui, (2) pa heß o kikis, (3) me pa heß a tasun.
Kuru vëh eën se vapu eah, vamanih pa ö no tëkrea soneß to ës vaßpuh a va, ka suraß ës.
E Sosoenën to hikta heß voh a ra a Tuvuh peß pa vaßnaöp a ra. Ivëhpëhkëk, eß to heß a ra a Tuvuh pamëh pa heß a ra o kikis, me a taateß iu o upöm teß, me a taateß va pa matop o iu va po sionin.

Ivëh, köm se nat nem potpoet nem a soe ke ra napan, e Apuh pea Ieesuß Kristo, me eöm se koe a poet ka neoß, pa ö nöß to teß noß pa nohnoh, suk e Sunön. Ivëhpëhkëk, eöm se kon kamis vaßpeh me a neoß pa vatvus a Soe Vih. E Sosoenën to heß a ra o kikis pa nok a tah pamëh. E Sosoenën to kon hah voh a ra, ko vateß a ra a ma napan vivihan peß. Eß to hikta teß non pan, ea koman to nonok no a ma tah poë varih. Ivëhkëk, e Sosoenën ivëh to nonok non po iu koman peß, me o ururuan peß. O ururuan pamëh na to kon koe voh manih pe Ieesuß Kristo, pa ö ne Sosoenën to hikta nok avoeß voh non o oeh me a ma moeh tah. 10 Ivëhkëk, kuru neß to vataare en pea, pa nö pe Ieesuß Kristo a Teß Va Pa Hehe A Ra. Eß to vahik voh o kikis va pa mët, me manih pa Soe vih peß, neß to vataare voh a ra a hanan va pa kon o toßtoß vëh, se teß tamoaan non.

11 E Sosoenën to kon voh a neoß, marën a vatvus a Soe Vih manih pa napan, me eöß se teß noß a aposol. Eß me to kon a neöß pa tavus a tövavaasis. 12 Kuru eöß to kakamis noß, suk eöß to vavatvus noß a Soe Vih. Ivëhkëk, eöß to hikta potpoet noß pa vatvus a Soe Vih, suk eöß to nat vavih rakah e noß pe Ieesuß. Eß a Teß vëh a paeh, nöß to vaman voh. Köß nat vavih rakah e noß peß to onöt e non pa matop vavih a neöß, me a kiu neß to heß voh a neoß. Keß öök po Poen neß se hah maß.

13 Eöm se vatet o vavaasis man vëh, neöm to tënan voh manih peöß, me a ö nöß to vavaasis va noß, manih po vaman peöm, me a taateß va pa iu o teß varih to teß ne manih pe Ieesuß Kristo. 14 Eöm se matop vavih nem a soe man vëh, nee to heß a neöm. Manih po vaßaus pa Tuvuh Vasioß vëh to teß non pea, eöm se matop vavih nem a soe man pamëh.

15 Eöm to nat e nem, pa napan kurus to teß ne pa muhin va Esiaß, to këh vahik ee peöß. Me e Figelus, me e Hermogenes, ee pon to këh ee peöß.

16 Eöß to hinhin noß pan, e Sosoenën se ururuan e Onësiforus, me a kën tom sinan peß. Suk eß to vavaßaus tamoaan a non neoß. Eß to hikta potpoet non a neoß pa ö nöß to teß noß pa nohnoh. 17 O poen neß to nö maß Room. Eß to kiu vëhvaß rakah en pa vaiu a neoß. Keß antoen a ö neß to taum a neoß. 18 Eöß to hinhin noß pan, e Ieesuß Kristo se ururuan poan. O ururuan pamëh se taneß no maß pe Sosoenën, po Poen ne Ieesuß se hah maß. Eöm to nat e nem pa ma vaßaus peo, ne Onësiforus to vaßaus a neoß manih pa voon va Ëfësus.

Copyright information for `TPZ