Acts 17

A Napan Va Tesaronaëkaß To Kehkeh Ip Vamët Ne E Pöl Pen Saëlas

E Pöl pen Saëlas to nö ko vos koe ee pa poa vöön, Amfipolis, me Apoloniaß, pare tavus ee vöön Tesaronaëkaß. A iuun hinhin soneß po Jiuß to teß non nën. E Pöl to ho en nën pa ö neß to nonok tamoaan va non sih. Po kukön Poen Apaapo ne Pöl to vaato vaeh me e non pa napan pa ma Soe Vih pe Ieesuß to teß non po Puk Vapenpen. E Pöl to vamaaka ke non raoe a pusun in a soe, pareß soe pan, “E Kristo se teß o kamis apuh ko mët en, pareß sun hah en. E Ieesuß vaßih nöß to sosoe ka noß neöm kuru vëh, eß e Kristo.” A ma paeh to Jiuß to vaman rakah ee po vavaasis to teß man e non, ko vatet ee pe Pöl pen Saëlas. Eß to teß non a nap peo va Grik, me o köövo susunön varih vöön to vaman, ko heß o toßtoß pee manuh pe Sosoenën.

Ivëhkëk, o Jiuß to puhioß, pan a nap peo to vaman o vavaasis pe Pöl, ivëh, ko Jiuß vaoe ununun a nap pepeat to teß ne pa vöön pamëh, kee nö pa miröß a iuun pe Jeson to vaiu ne e Pöl pen Saëlas to me pa matëëra napan. Ivëhkëk, ee to hikta ep e Pöl pen Saëlas pare öt varuß ee pe Jeson, me a ma meh teß va po vaman ko rëh tavus këh ee pee pa iuun, ko me raoe manuh po teß susun va pa vöön pamëh. Ee to soe vamanih pan, “A ma teß varih to vatvus nö voh ne maß a hat pa ma meh muhin, ka kuru vëh nee to teß varuß ne manih pa vöön pea. Ke Jeson matop non raoe pa iuun peß, a ma teß poë varih to kökök ne a taateß pa teß sunön e Sisaß, na to vavatet no. Ee to vavaasis ne a napan pan a meh teß sunön to teß non a ëhnaneah e Ieesuß.” O teß susun me a napan va pa vöön pamëh to pënton a soe vaßih, pare ponkiß rakah ee peteh a meh teß sunön. Ko teß susun kon a moniß pa voen tavus hah e Jeson, me a ma teß va po vaman.

E Pöl Pen Saëlas To Nö Manuh Vöön Beriaß

10 Po poen pamëh pa popoen o teß va po vaman to vanö ee Pöl pen Saëlas manuh vöön Beriaß. Ee to vos nën, ko nö ee pa iuun hinhin soneß po Jiuß. 11 A napan varih Beriaß no kokoman pee to maaka, pare vih oah e ne pa napan va Tesaronaëkaß. Ee to pënton o vavaasis pe Pöl, pare pah iu rakah e ne, ko ëhëh tamoaan e ne po Puk Vapenpen pa ep pan, o vavaasis pe Pöl to vatoe me e non po Puk Vapenpen, keß ahik. 12 Ivëh, ko Jiuß, me o köövo susunön va Grik, me a kën voe susunön to vaman e Ieesuß Kristo.

13 Ivëhkëk, o Jiuß va Tesaronaëkaß to pënton a ö ne Pöl to vatvus non a soe pe Sosoenën manih vöön Beriaß. Ee to nö maß, pare punöß ne pa rëh ke o vaman pa napan varih Beriaß këh a Soe Vih pe Ieesuß. 14 Ivëh, ka napan va po vaman vanö ee pe Pöl vaßpeh me a ma meh teß manuh pa vöön to teß non sinten tahiß. Ivëhkëk, e Saëlas pen Timotiß to teß e ne manih Beriaß. 15 A ma teß varih to nö vaßpeh me maß e Pöl, ee to tok po paröß to nö non manuh vöön Atëns. Ee to ahah ne manuh Beriaß, ke Pöl heß raoe a ö soe to teß va non manih pan, “Nö, paröm soe ke Saëlas pen Timotiß, kee nö vëvëhöß rakah maß manih peöß.”

E Pöl To Teß Non Vöön Atëns

16 Pa ö ne Pöl to anoeh non e Saëlas pen Timotiß manih vöön Atëns, eß to ep in a ma tah nößnës peo, no a napan to hinhin suk ne vamanih pa ma sosoenën pee, ko pah haraß vatamak rakah en pa napan. 17 Ivëh, ke Pöl ho en manuh pa iuun hinhin soneß, ko vasosoëri me e non po Jiuß, me o upöm teß varih to hikta teß ne pan ee ro Jiuß to panih, ko vavatet ne a ma taateß po Jiuß. Manih me mahën pa ö vatötönun ne Pöl to vaheahih me e non pa ma napan to nönö ne maß nën. 18 A ma pah teß nat nee to pokaß ne o Epikurian, me o Stoik ee to vavatet ne o vavaasis vamoaan. Ee to iu vasosoëri me ne e Pöl, pare soe pan, “A teß vavaato pinpiun vëh to vavaasis a ra a ma sosoenën va pa meh muhin.” Ee to soe vamanih, suk e Pöl to vavaasis non raoe e Ieesuß me a sun hah pa nap mët. 19 Ivëh, kee öt ee Pöl ko me ee peß manuh pa ö vatötönun vëh nee to pokaß ne a Areapakas pa vaheahih me a ma napan, pare soe pan, “Emöm to iu nat nem po vavaasis voon vëh nën to vavaasis suk nom. 20 A ma meh tah möm to pënton nem nën to vavaasis nom, to voon ke non pemöm, ivëh, kemöm iu nat nem pa pusuneah.” 21 A taateß va pa napan varih Atëns me a ma teß va pa ma meh muhin to teß ne manih Atëns to teß varoe ne sih pa vahutët suk a ma vavaasis voon nee to tënan ne.

22 Ivëh, ke Pöl sun pa matëëra nap pëpënton vahutët, pareß soe pan, “Eöm varih a napan va Atëns. Eöß to ep noß neöm o teß to vaman rakah nem a ma sosoenën vapikpiuk. 23 Eöß to nönö vah noß manih koman a vöön peöm, paröß ep in a ma iuun hinhin peöm. Paröß ep in a pah pok nöm to kiun manih tonun pan, ‘Manuh pe Sosoenën möm to hikta nat nem peß, ivëhkëk, emöm to kë e nem pa ëhnaneah.’ Eß e Sosoenën poan ivëh, nöß to sosoe ka noß neöm kuru vëh.

24 E Sosoenën to nok voh o oeh me a ma moeh tah kurus rakah varih to teß hop ne nën na to ep no. Eß e Sunön va pa vöön va kin me po oeh, pareß hikta teß non pa iuun hinhin apuh eok po teß. 25 E Sosoenën to hikta kökööt non ta pah tah no o teß se vaßaus poë, suk eß koman to heß o toßtoß me a Tuvuh Vasioß peß manih pa ma napan, pareß vaßaus non raoe pa ma tah nee to iu ne. 26 E Sosoenën to nok voh e Adam, keß vataman voh in a napan varih po oeh vëh, pareß vahoß raoe pa ma muhin nee se teß nee. E Sosoenën koman to vahoß vovoh voh en po poen no o teß se mët me a muhin nee se teß nee. 27 E Sosoenën to nok voh a ra, pan ea se vaiu no eah marën a taum eah. Ivëh, ke Sosoenën to hikta teß varo këh a rora. 28 Suk manih peß, ea to teß toßtoß no ko nönö vah no, ko teß no. Vamanih pa ö no a teß nat to soe voh pan,

‘Ea me a ma pus koaß pe Sosoenën.’
29 Ivëh, kea a ma koaß pe Sosoenën, ea se nat no koman no pan e Sosoenën to teß va e non manih pa tah nößnës no o teß to nës tariuk suk o nat peß taneß pa vös, silvaß, me pa gol. 30 E Sosoenën to hikta koman hah non a ma hat moaan pa napan, ivëhkëk kuru vëh, eß to iu non a napan varih po oeh kurus se panih a ma taateß hat pee, ko heß rea manih peß. 31 Suk ataeah, e Sosoenën to vateß voh en po poen neß se kiiki a ma hat pa napan kurus. Manih po poen pamëh, a teß ne Sosoenën to vateß voh, eß e Ieesuß se kiiki a ma hat koman pea pa taateß totoopin peß. Ivëh, ka sun hah pe Ieesuß to vataare e non pea pa ö neß to teß e non a tasun marën a kiiki a ma hat pea.”

32 A napan to pënton a ö ne Pöl to vavaato suk non a sun hah taneß po vapeepe, ko meoh upöm pee vavovoeak e ne peß. Ivëhkëk, a meh teß to soe pan, “Emöm to iu pënton hah nem o vahutët va pa sun hah taneß po vapeepe, eß ataeah?” 33 E Pöl to vahik vaato me raoe, ko këh tavus en pee. 34 A ma pah teß to tavus ee o teß va po vaman pa ö nee to pënton o vavaasis pe Pöl. A paeh pee e Dionisius, a teß va po vakum vëh nee to pokaß ne Areapakas, ke köövo me, a ëhnaneah e Damaris, me a ma meh upöm teß to vaman.

Copyright information for `TPZ