Acts 18

E Pöl To Vatvus A Soe Vih Manih Vöön Körin

Vasuksuk ne Pöl to këh en pa vöön va Atëns, pareß nö pet en pa vöön va Körin. Manih Körin, eß to ep in a to Jiuß a ëhnaneah e Akuilaß to koaß manih muhin Pontus, eß to taneß varuß maß po oeh va Italiß pen e köövo peß Prisilaß. Ee to nö voh maß nën, suk a teß sunön va Room, e Sisaß Klödius to taß a ö no Jiuß kurus se këh a vöön apuh va Room. Ivëh, ke Pöl nö en pa ep pee, pareß teß vaßpeh me non pee. E Pöl to kiu vaßpeh me e non pee pa nok a ma iuun teßteß vah, pare vavoen nee. A moniß nee to kon to vaßaus non raoe pa voen taëën me a ö kokoroh. Pa ma Poen Apaapo manih koman iuun hinhin soneß, e Pöl to vavahutët me non o Jiuß, me o meoh upöm teß va po to Grik, pan ee se panih a ma kokoman pee, ko vaman e Ieesuß pare heß rea manih peß.

O poen ne Saëlas pen Timotiß to taneß maß pa muhin va Mësadoniaß, ko vos maß, e Pöl to koe en pa kiu moniß peß, pareß teß varoe non pa heß a Soe Vih me a vavaasis, ko vamaaka ke ra ma napan pan, e Ieesuß e Kristo. Ivëhkëk, o Jiuß to vavovoeak e ne pa soe pe Pöl, ko sosoe vahat e ne peß. Ivëh, keß susunuh o kusan vëh to teß non po ohop peß,
A taateß va pa susunuh o kusan to teß non po ohop to vëknöm non pan, o Jiuß varih se haraß a kamis to taneß maß manuh pe Sosoenën, suk ee to pënton varo e ne pa Soe Vih ne Pöl to punöß pa heß raoe.
pareß soe ke raoe pan, “Eß a tah koman peöm, eöm se keh heß tonun a Soe Vih pe Sosoenën, paröm ro em, eß eöm koman. Eöß hikta se teen noß a ro peöm. Taneo non kuru, eöß se nö eoß pa heß a soe manuh po teß varih to hikta teß ne pan ee ro Jiuß.”
Ke Pöl tavus këh en maß pa iuun hinhin soneß ko nö, pareß teß e non pa iuun pe Titius Jastus eß a teß to hikta teß non a to Jiuß. Ivëhkëk, eß to vasunön non sih e Sosoenën. A iuun peß to eok non havin a iuun hinhin soneß. E Krispas, eß e susun va pa iuun hinhin soneß po Jiuß, eß to vaman non e Sunön, me a tapaiuun peß, me a ma meh teß peo va Körin to pënton a soe ko vaman, kee pupui ee pee.

Pa pah popoen ne Pöl to tata non e Sunön to sosoe ke non poan pan, “Koe a naöp, parën sun vakis pa vatvus a Soe Vih, 10 suk eöß to teß vaßpeh me e noß pën, ka hikta teß se miröß a oah, peß a nap peo va pa vöön vëh se tavus ee a napan peöß.” 11 Ivëh ke Pöl teß en po pöh kirismas me a tönim me a paeh sivö manih vöön Körin pa vavaasis a ma napan pa soe pe Sosoenën.

12 O poen ne Galioß to teß non a teß sunön va pa muhin va Grik, Akaëaß,
Akaëaß, eß a meh ëhnan a muhin va Grik.
o Jiuß to vatönun ko vaheheve me ne pe Pöl, pare öt poë ko vateß ee peß po vahutët.
13 A napan to soe ke Galioß pan, “A teß vëh to punöß non pa panih o kokoman pa napan po vavaasis peß, pan a napan se vaman e Sosoenën pa taateß to kenet e non pa taateß po Jiuß.”

14 E Pöl to iu vaato non, ke Galioß soe ke ro Jiuß pan, “Eöm o Jiuß, a teß vëh se keh kök voh a taateß me a hat apuh taeah neß to nok, a, eöß se pënton eoß pa soe peöm. 15 Ivëhkëk, o vaato vëh to teß koman hah e non peöm, suk a ma ëhnan, me a taateß koman peöm, eöm koman se vahik ko vavihvih hah ëm. Eöß hikta se kiiki noß a tah pamëh.” 16 Ko vahik en pa vaato, pareß veo tavus këh en pee pa iuun pëpënton vahutët. 17 A ma napan to heve, ko not ee pe Söstënes, a teß susun va pa iuun hinhin soneß, pare ip poë matan a iuun pëpënton vahutët. Ivëhkëk, e Galioß to hikta koman vi non a ö no a napan to ip e Söstënes.

E Pöl To Nö Hah En Pa Vöön Antiök Va Siriaß

18 E Pöl to teß varë me en po teß va po vaman manih pa vöön va Körin. Moaan voh e Pöl to nok a soe kikis manuh pa matan e Sosoenën, ivëh, keß koe a kui a uvineah.
A tah pamëh eß a taateß po Jiuß to iu ne pa vataare a upöm teß pee pan, ee to vatet rakah ee a ma taateß po Jiuß.
E Pöl, ke Prisilaß, pen Akuilaß to nö ee manuh pa vöön va Sënkriaß. Po poen nee se tok po paröß pa ö se nö Siriaß e Pöl to kui hah a uvineah, suk a soe kikis peß manuh pe Sosoenën neß to vaßpuh en. Kee tok po paröß ko nö ee.
19 Ee to vos ee pa vöön va Ëfësus, ke Pöl këh en pe Prisilaß pen Akuilaß, pareß ho en pa iuun hinhin soneß po Jiuß, ko vavaato me e non po Jiuß. 20 Ko teß va po vaman hi poë pan, “Eën se teß varë me voh a no möm manih,” Ivëhkëk eß to koe en. 21 Eß to piun raoe pa ö neß to nönö non, ko soe pan, “Eöß to vavatet noß o iu pe Sosoenën, eß se keh iu non eöß se hah maß manih peöm.” E Pöl to tok po paröß, ko këh en pa vöön va Ëfësus. 22 E Pöl to kunah këh o paröß manih pa vöön va Sisariaß, pareß nö en Jerusalëm pa ep, ko vaato me o teß va po vaman. Pareß oah pet en pa vöön va Antiök pa muhin va Siriaß.

23 E Pöl to hikta teß varë manih pa vöön va Antiök, pareß oah pet en pa ma vöön manih pa muhin va Galesiaß, me Frigiaß, to vavaeh hah nö non o vaman pa ma napan.

E Apölos To Vatvus A Soe Vih Manih Pa Vöön Va Ëfësus Me Körin

24 A pah to Jiuß, a ëhnaneah e Apölos, eß a teß va Alëksëndriaß to nö maß manih vöön va Ëfësus. A ö vavaato a peß to paraß vih, eß me a teß nat vi to nat vavih non o Puk Vapenpen. 25 O upöm teß to vaasis e Apölos a Taateß pe Ieesuß, keß vavaasis vakis non, me eß to vavaasis vatotoopin non a ma napan pa ma kiu ne Ieesuß to nonok voh non. Ivëhkëk, eß to nat varoe non a pupui pe Jon Tövapupui. 26 Eß to taneo en pa vatvus a ma soe koman iuun hinhin soneß, pareß hikta teß naöp non pa vaato. E Prisilaß pen Akuilaß to tënan poë, pare me ee peß manuh pa iuun pee, pare vamaaka vavih ke poë a Taateß pe Ieesuß neß se vatet non.

27 E Apölos to iu nö non pa muhin va Grik, ivëh, ka napan va po vaman to teß ne pa vöön va Ëfësus vaßaus ee peß. Ee to kiun vovoh na o kiun manih pa napan va po vaman manuh Grik, pan a napan se anoeh ne maß poë. Po poen neß to vos manuh pa muhin va Grik, eß to pah vaßaus vavih en po teß varih no o ururuan pe Sosoenën to vaßaus voh raoe, kee tavus a napan va po vaman. 28 A ma vasosoëri peß me ro Jiuß to rëh en pa ma napan, kee vaman ee po vavaasis peß komön o Puk Vapenpen, pareß vamaaka ken po Jiuß, pan e Ieesuß, e Kristo, a teß se hehe a ma napan.

Copyright information for `TPZ