Acts 21

E Pöl To Nö Jerusalëm

Eöß e Luk kere Pöl to soe vavihvih ke ra napan va Ëfësus, pamöm tok poß em po paröß, ko paröß nö totoopin rakah en pa To va Kos. Ko meoh poen nemöm to vos em pa vöön va Rodes, ko taneß nën ko nö pet em Pataraß. Manih Pataraß, emöm to ep in o paröß to nö non manuh pa muhin va Fonisiaß, pamöm tok ko nö em. Emöm to öök em pa ö möm to ep i na a To va Saëprus, ko nö kem pa papmatö, pamöm vos em pa muhin va Siriaß. O paröß to ankaß en pa vöön va Taëaß pa ö neß se vöknah a kakoß. Emöm to taum a ma teß va po vaman nën, ko nö em pa teß vaßpeh me raoe po pöh nënkikiu. O kikis pa Tuvuh Vasioß to heß soe a napan, kee soe ke Pöl a ö neß se nat non nö manuh Jerusalëm. A ma poen möm to pët teß vaßpeh nem to hik ee, kemöm këh em pa vöön pamëh. Ka ma tapaiuun to me a möm pa aton. Kemöm to tönun manih po kösan ko vatokon, pamöm hin nën. Pamöm soe vavihvih ke raoe, kee hah ee vöön, kemöm tok po paröß ko nö em.

Emöm to taneß pa vöön va Taëaß to nönö avoeß e nem po paröß, ko vos em pa vöön va Tolemës, ko soe vaeö kem po teß va po vaman, pamöm teß me em pee po pöh poen. Po meoh poen nemöm to nö pet em, ko vos em pa vöön va Sisariaß, pamöm teß e nem pa iuun pe Filip, a teß to vatvus non sih a Soe Vih pe Ieesuß. Eß a paeh va pa tönim me a poa teß varih nee to vateß momoaan voh maß manih Jerusalëm marën a vaßaus o aposol. E Filip to teß non a taanaß koaß mon hikta vaen to teß me ne o heß pa heß a soe pe Sosoenën. 10 A ma poen nemöm to teß nem Sisariaß, ka pah teß vanënën soe a ëhnaneah e Agabus to taneß maß pa muhin va Jiutiaß. 11 Eß to nö maß pemöm, pareß kon o ka voh pe Pöl, ko noh a koren me a moneah, pareß soe pan, “A Tuvuh Vasioß, to soe vamanih, ‘E tövaneah po ka voh vëh no Jiuß va Jerusalëm se nohnoh va in poë manih, pare heß o teß varih to hikta teß ne pan ee ro Jiuß.’”

12 Emöm me a ma teß va po vaman to pënton a tah vëh, pamöm hin vakis e Pöl se nat non nö manuh Jerusalëm. 13 Ivëhkëk, e Pöl to piun, pareß soe pan, “Suk ataeah, köm okook nem, paröm mimiröß nem o kokoman peöß? Eöß to vamatop e noß pa ö nee se nohnoh a neoß manuh Jerusalëm, me pa mët pa kë a ëhnan e Sunön Ieesuß.” 14 A ma soe möm to soe keah to hikta onöt non a panih o kokoman peß. Kemöm soe em pan, “Eß se nok suk o iu koman pe Sunön.”

E Pöl To Vos Jerusalëm

15 Emöm to teß a ma meh poen, ko vamatop a ma tah pemöm ko nö em Jerusalëm. 16 Emöm to vos Jerusalëm ka napan va po vaman pah vaeö rakah ee pemöm. A ma teß vamomhë va Sisariaß to nö vaßpeh me a möm manuh pa iuun pe Nason, suk, emöm to iu nem pa teß vaßpeh me eah. E Nason, eß a teß va Saëprus, me eß a teß to vaman vëhöß po poen neß to pënton vamomoaan a Soe Vih pe Ieesuß. 18 Po meoh poen e Pöl to me a möm pa ep pe Jëmis. A nap susunön va po rotuß me to pah teß e ne po poen pamëh. 19 E Pöl to ep raoe, pareß heß a soe vaeö peß, ko hutët ke raoe a ö ne Sosoenën to vaßaus va in o teß varih to hikta teß ne o Jiuß manih pa ma kiu kurus neß to nok.

20 A nap susunön to pënton vahik o vahutët pe Pöl, pare kë rakah a ëhnan e Sosoenën. Pare soe ke Pöl pan, “Kea, eën se ep, o Jiuß peo rakah to vaman voh ee pe Ieesuß. A ma teß poë varih to eh rakah e ne pa vatet o Vavaasis pe Mosës. 21 O Jiuß to hikta vaman ne Ieesuß to vavatët raoe pan, eën e Pöl to vavaasis nom o Jiuß varih to teß vaßpeh me ne o teß varih to hikta teß ne pan ee ro Jiuß pa ma meh muhin, a ö see nat ne vavatet ne o Vavaasis pe Mosës me a ma meh taateß pea, pare koe a taateß pe a ö kokoaan po koaß oeteß. 22 O Jiuß varih to vavatet ne o Vavaasis pe Mosës se nat ka oah to nö maß, ivëh, ka se poß nok ataeah pa vamaaka a ma piuk pee? 23 Eën se nok vamanih pa ö möm to soe ava. A taanaß teß to teß ne to soe voh a ö nee se nok a soe kikis pa matan e Sosoenën. 24 Eën se nö me raoe, parën vatet a taateß va pa pupui,
O Jiuß to vaman ne pan a taateß pupui to vamaaka raoe pa matan pe Sosoenën.
parën voen vaßpeh me raoe, kën se tavus hah a teß vih manih pa matëëre. Ka napan se nat ne a soe nee to soe voh manih pën, eß o piuk. Kee se nat va ne manih, eën to vavatet e nom po Vavaasis pe Mosës.
25 Ka manih po teß varih to hikta teß ne pan ee ro Jiuß to vaman voh ee, ea to vanö voh na o kiun to soe vanat non a ma tah na to vaonöt. Ea to soe vanat raoe se nat ne ënëën ne a ma vönaß varih no teß to hikta vaman ne e Ieesuß to ip vamanih po heß manuh po sosoenën vapikpiuk. Me a ö see koe a ëën a vönaß no eraß to hikta takoß me a vönaß takon, pare teß ke këh ne a taateß rëhrëh.”

26 Po meoh poen ne Pöl to nö vaßpeh me en pa ma teß poë varih to nok voh a soe kikis manih pe Sosoenën, pa teß hop pa taateß pupui vavoon rea marën a tavus hah a teß vih pa matëëra napan. Pareß ho en manuh pa Iuun Hinhin Apuh pa ep pa teß ësës heß pa soe vanat poan o poen poanheh no a taateß va pa vavoon hah se hik, suk o poen nee to voon hah ee papaeh see teß a ma heß pee.

O Jiuß To Öt E Pöl

27 O tönim me o pöök poen se hik en, ka ma to Jiuß va pa muhin va Esiaß ep in e Pöl to teß non koman Iuun Hinhin Apuh. Ee to kuin ee po kokoman heve, ka napan öt ee pe Pöl. 28 Pare soe pan, “Napan va Israël, vaßaus a möm. A teß vëh to nönö vah non pa vavaasis a ma napan va pa ma vöön kurus, kee vöknah e ne pea, a ma napan va Israël, me o Vavaasis pe Mosës, me a Iuun Hinhin Apuh vëh. Eß me a ma teß varih to hikta teß ne o Jiuß to ho ee pa ö vasioß koman pe Sosoenën, keß hikta teß vivihan hah non po epep pe Sosoenën.” 29 Ee to soe vamanih, suk varuß manih pa vöön apuh ee to ep ne e Trofimus a teß va Ëfësus vaßpeh me e Pöl, pare pu ne pan, e Pöl to me ho poan koman Iuun Hinhin Apuh.

30 Ivëh, ka napan varih koman a vöön apuh toksean rakah ee ko vatönun maß, pare öt ee pe Pöl, ko rëh tavus këh ee peß pa Iuun Hinhin Apuh. Pare panih kurus ee pa ma hopaß in a Iuun Hinhin Apuh. 31 A napan to se ip ee pe Pöl, ivëh, ka napan va po vaman vanö a soe manuh pe susun po teß vëvënsun pan, a napan to teß ne Jerusalëm to vavapus ne. 32 Ke susun apuh pa nap vëvënsun kon a ma teß vëvënsun me e susun pee, kee vëvëhöß rakah ee manuh pa napan. A napan to ep in e susun apuh po teß vëvënsun, pare vahik rëp ee pe Pöl. 33 E susun apuh to öt e Pöl, pareß taß a ma teß vëvënsun, kee nohtöön poë po pöök uris eh. Pareß hi raoe pan, “A teß vëh eteh, ataeah neß to nok?” 34 A napan varih to vatönun a ma soe pee to vakëkëh. Ivëh, ke susun apuh pa nap vëvënsun hikta maaka non pataeah pamëh to tanok, pareß taß en pa nap vëvënsun pa me peah e Pöl koman a iuun pee. 35 Ee to me ee pe Pöl manuh pa ö pepeah koe in a iuun, ivëh, ka nap vëvënsun vateß ee peß, suk a napan to heve se ip vamët ee peß. 36 A napan peo to vavatet nö ne e Pöl, pare tataoa nee ko sosoe nö ne maß pan, “Ip vamët öm eah.”

E Pöl To Vaato Vaßaus Hah Ea

37 A ma teß vëvënsun to oho nö me e ne pe Pöl koman a iuun pee, ke Pöl soe ke susun apuh pan, “Eöß antoen e noß pa vaato me a oah, ha?” Ke susun apuh hi poan pan, “Eën nat e nom po to va Grik, ha? 38 Eën hikta teß nom a teß va Isip to vapus me voh non a kaman, pareß kon a 4,000 teß ipip vamët teß, kee nö manuh pa moeh upin, ha?” 39 Ke Pöl piun poan pan, “Eöß a to Jiuß e sinaneoß to vahuh voh a neoß Tasas manih pa muhin va Room a ëhnan a muhin pamëh a Silisiaß. Eöß a teß va Room. Vaonöt ka neoß ah, köß heß a soe manih pa ma napan.” 40 Ke susun apuh pa nap vëvënsun vaonöt ken pe Pöl, keß sun manih pa ö pepeah ko kë a koren. Ka ma napan vatotomin ee, ke Pöl vaato ken pee po to Hibru o to koman pee.

Copyright information for `TPZ