Acts 24

O Jiuß To Vateß E Pöl Po Vahutët

O tönim poen to oah ee, ka Teß Susun po Teß Ësës Heß, e Ananaës, me a ma pah teß susunön po Jiuß nö ee manuh Sisariaß me e voe to se vaßaus raoe pa vateß e Pöl po vahutët, a ëhnaneah Tertulus. Ee to tavus e Feliks a teß susun pa kaman, pare taneo ee pa soe ke poë ataeah nee se vateß suk e Pöl po vahutët. E susun to vaoe e Pöl, keß nö maß, ke Tertulus taneo en pa siröß e Pöl manih pa matan e Feliks, pareß soe pan, “Feliks, eën a teß sunön pemöm, eën to matop voh a no möm ka hik voh to vapus to teß non topninmöm, parën vatotoopin hah voh nom a ma hat to teß non pa ma vöön kurus. Ivëh, ko kokoman pemöm vih rakah non pa ma kiu vih poë varih, kemöm vaeö rakah me nem oah.

Eöß to hikta iu vatöön vi ka nom oah, ivëhkëk, eöß to hi vakis nom oah, sën ururuan a möm parën pënton a soe kökööt pemöm. Emöm to taum a teß vëh to tataneo non sih a ma hat, pareß teß non sih pa kuin a ma vapus me a ma vaheheve manih pa napan varih o Jiuß me pa ma ö kurus manih po oeh. Eß to këh voh a möm, pareß kunkuin o vakum vëh to vavatet ne e Ieesuß va Nasarët. Eß to punöß non pa rëh hop maß a taateß hat vëh to miröß a ma tah vapenpen manih pa koman a Iuun Hinhin Apuh pemöm, ivëh, kemöm öt taneß eah nën, to vateß eah pa taateß koman pemöm. Ivëhkëk, a teß susun apuh va pa nap vëvënsun e Klödius Lisias to nö maß, pareß eh rakah pa me maß eah këh e möm. Pareß soe ke ra napan to iu vateß ne poë po vahutët pa ep ka oah. Kën se hi koman eah a ma tah möm to siröß suk eah, keß soe ka oah.” O Jiuß me to vaßaus ne a soe pe Tertulus pan, a ma tah varih ne Pöl to nok vamaman en.

E Pöl To Vaato Vaßaus Hah Ea Matan E Feliks

10 Ka teß susun pa kaman vëknöm ke maß pe Pöl pa koreneah pan, e Pöl se vaato, ke Pöl soe pan, “Eöß to nat e noß, eën to teß voh nom a teß pëpënton vahutët pa napan varih pa ma kirismas peo. Ivëh, ko kokoman peöß vih rakah non pa vaato vaßaus hah öß. 11 Eën se nat koman va nom manih, o havun me o pöök poen to oah en, ne eöß to nö maß manih Jerusalëm pa vasunön e Sosoenën. 12 O Jiuß to hikta ep a neoß to vaato vasukaß me voh noß ta pah teß koman a Iuun Hinhin Apuh, me a ö nee to hikta ep a neoß to kuin o vapus manih koman iuun hinhin soneß, me manih koman a vöön apuh vëh. 13 Ka soe vëh nee to vateß suk a neoß po vahutët, eß to hikta teß non ta pusun eah. Ivëh, kën se nat nom, a soe pamëh to hikta teß man rakah non.

14 Ivëh, keöß iu soe ka noß oah a soe vëh, ‘Eöß to vasunön rakah noß sih e Sosoenën pe sipunmöm, me eöß to teß vaßpeh me noß o kum teß va po vaman to vatet ne a Hanan pe Ieesuß, eß o vakum pamëh nee to soe pan eß o vakum vapikpiuk. Ivëhkëk, eöß to vaman avoeß e noß pa ma soe to teß non po Vavaasis pe Mosës, me a ma Vavaasis no teß vanënën soe to kiun voh. 15 Eöß to vaman ko anoeh noß e Sosoenën se vatoß hah a nap mët, a napan poë varih no a pop pee to teß vih non vaßpeh me a nap hat. O teß varih to vateß a neoß po vahutët to vaman ne ko anoeh me ne e Sosoenën se nok va i raoe nën. 16 Ivëh, ko kupu peöß punöß rakah non sih pa ma poen kurus pa haraß vavih, ko teß maaka rakah e non manih pa matan e Sosoenën, me manih pa matëëra ma napan kurus.

17 Eöß to teß ke voh noß maß a vöön Jerusalëm pa ma meh kirismas. Eöß to nö hah maß pa napan peöß to teß maß a ma moniß pa vaßaus o teß varih to kökööt ne, me a nok o vaës po vönaß manih pe Sosoenën. 18 Eöß to nönö voh noß pa Iuun Hinhin Apuh to vatet noß a taateß ësës vönaß marën a tavus vavoon hah manih po epep pe Sosoenën. Kee ep ka neoß nën a hikta nap peo to teß voh ne, me a hikta napan to vatoeßnën vah ne. 19 Ivëhkëk, a ma to Jiuß va pa muhin va Esiaß to nö maß, pare öt a neoß. A ma napan poë varih se keh teß ne manih, eß to vih non pee se nö maß, pare vatët a oah a hat taeah nöß to nok. 20 Eß to vih non pa napan varih to sun vatët ne pea se soe koman ka oah a hat taeah nöß to nok pa ö nöß to sun voh noß pa matëëro Vakum Teß Susunön po Jiuß. 21 Eß to teß non a pah soe ro nöß to soe voh pa ö nöß to sun noß pa matëëre. Eöß to soe pan, ‘Eöß to vaman noß a nap mët se toßtoß hah ee.’ Eß kovëh a tah nee to vateß suk a neoß po vahutët.”

22 E Feliks, a teß to nat vavih non o vaman me a taateß no a napan po vakum va po vaman to vatet ne a Hanan pe Ieesuß, pareß iu vahik e non po vahutët, ko soe ke ro Jiuß pan. “Öm se anoeh nem e Klödius Lisias e susun apuh pa nap vëvënsun se nö maß, köß vatotoopin ka neöm a tah vaßih.” 23 Eß to taß e susun po teß utut pa vahoß e Pöl pa iuun nohnoh, ivëhkëk, eß se nat non vëhvaß vi non poan, ko nat non soepip a ma vakamöß pe Pöl pa nö maß pa vaßaus poë, ko heß eah a ma tah neß to kökööt non.

E Pöl To Sun Matan E Feliks Me Drusilaß

24 A ma siß poen to oah ee ke Feliks nö maß pen e köövo peß Drusilaß, a mu Jiuß. E Feliks to vaoe e Pöl ko tënan non po vahutët peß, e Pöl to soe ke raoe pon a taateß va po vaman, manih pe Ieesuß Kristo. 25 E Pöl to vavahutët avoeß suk e non pa taateß totoopin, me a taateß natsean me a ö ne Sosoenën se kiiki amot a ra po vahutët, ke Feliks a naöp, pareß soe pan, “Eën se nö eom. Eöß se vaoe amot hah nös oah, pa ö söß iu noß.” 26 Manih pa ma poen varih e Feliks to anoeh non e Pöl se heß poan tah moniß, ivëh, keß vavaoe vatëh non e Pöl, ko vaato me non poan.

27 O pöök kirismas to oah ee, ke Porsius Festus kon en pa tasun pe Feliks vamanih pa teß susun pa kaman pa muhin va Jiutiaß. E Feliks to iu non o Jiuß se vaeö ne poë, ivëh, keß koe en pe Pöl, keß teß e non pa nohnoh.

Copyright information for `TPZ