Acts 26

E Pöl To Vaato Vaßaus Hah Ea Manih Pa Teß Sunön E Agripaß

E Agripaß to soe ke Pöl, “Eën to teß e nom o soe vaonöt pa vaato vaßaus hah eo.”

Ke Pöl kë a koreneah, pareß soe vamanih pan,
“Teß Sunön Agripaß, eß to vih rakah pa ö nöß se vatvus a soe peöß manih pën pa ma tah varih no Jiuß to vateß suk a neoß po vahutët. Eën to nat vavih e nom pa taateß po Jiuß, me a ma tah nemöm o Jiuß to vaato vaheve suk nem. Ivëh, köß hi a oah sën teß vatö nom ko tënan a neoß, parën koe a rës.

O Jiuß kurus rakah to nat e ne pa pop peöß, pa ö nöß to teß sekaß voh noß, ee to nat taneß ne maß po vamomoaan pa ö nöß to teß voh noß manih pa vöön peöß, me manuh Jerusalëm. Ee to nat tamoaan voh e ne peöß, ivëh, kee se keh iu ne, ee se soe tavus koman a tah pamëh. Eöß to vavatet voh noß o kum po Parësiß, eöß he a koaß ka ma taateß poë varih to hivaß, ko upöm Jiuß pemöm hikta teß me ne a taateß kikis pamëh. Ka kuru vëh, eöß to sun noß manih nee to vateß ee peöß po vahutët, suk eöß to vaman ko anoeh noß e Sosoenën se nok a tah pa ö neß to soe vaman ke voh a kën sipuura. A soe vaman vëh no havun me o pöök vuteß pemöm to vaman voh ne, pare anoeh ne ko hinhin voh ne e Sosoenën pa ma popoen, me pa potan. Eß a anoeh peöß ivëh, Teß Sunön, no Jiuß to vateen suk voh a neoß pa hat. Suk ataeah poß, ke eöm o Jiuß to hikta vaman nem a ö ne Sosoenën se kuin hah a nap mët?

Moaan voh eöß me to kokoman noß pan, eöß to se nonok voh noß a ma tah marën a vöknah a ëhnan e Ieesuß va Nasarët. 10 Eöß to nonok vavoh noß nën manih Jerusalëm. Eöß to kon voh a soe vaonöt manih po teß susunön ësës heß, paröß vanö voh a nap peo to vaman voh e Ieesuß pa nohnoh. Eöß to teß hop voh noß pa napan varih nöß to vapöh kokoman me noß a ö se ip vamët o teß varih to vaman ne Ieesuß. 11 Tamoaan voh eöß se ho koman a ma iuun hinhin soneß pa ötöt a ma teß va po vaman, ko vateß raoe pa hat, me taß a ö nee se vonih o vaman pee. Eöß to heheve rakah voh noß raoe, paröß vovos suk voh e noß po teß poë varih pa ma vöön pee koman a ma meh muhin.

E Pöl To Vahutët A Ö Neß To Panih, Ko Tavus A Teß Va Po Vaman

12 E Pöl to vaato e non ko soe pan, “Eöß to kokon voh noß o soe vaonöt manih po teß susunön ësës heß pa nö manuh vöön Damaskas marën a ötöt a napan to vaman ne Ieesuß. 13 Manih voh hanan Teß Sunön, pa topnin potan rakah, eöß to ep in o tëkrea o maaka to teß oah e non pa potan to taneß maß manuh akis to kopös a neoß, me a napan varih möm to nönö vaßpeh vah nem. 14 Emöm kurus to vuß em po oeh, köß tënan a teß to vaato maß po to Hibru ko soe pan, ‘Söl, Söl, suk ataeah kën mimiröß a no neoß? Eën to pënton varo a soe peöß, a taateß pamëh to teß va non manih pën to tuktuk hah a nom, ko vakmis eo.’ 15 Eöß to hi na pan, ‘Eën eteh, Apuh?’ Ke Apuh soe maß pan, ‘Eöß e Ieesuß, nën to mimiröß nom. 16 Ivëhkëk, eën se sun, eöß to tavus a oah, ko vateß oah a te kikiu peöß. Eën se vatvus manih pa ma napan a tah nën to ep manih peöß kuru, me a ma tah nöß se vataare amot a oah. 17 Eöß se kon hah këh oah pa napan va Israël, ee ro teß koman pën. Eöß se vanö oah manih pee, me o teß varih to hikta teß ne pan ee ro Jiuß, marën a kap a ma matëëre, kee panih këh a taateß popoen ko taneo pa nok a taateß maaka. Ee se këh maß o kikis pe susun po oraß hat, pare teß ne paan o kikis pe Sosoenën. Ivëh, köß se ihan anoe a ma hat pee, suk ee to vaman a no neoß, kee se teß vaßpeh me ne a ma napan varih to vaman a no neoß, ee a ma napan koman peöß.’”

E Pöl To Vahutët Ke Agripaß A Kiu Neß To Nok Voh

19 E Pöl to vaato e non ko soe pan, “Teß Sunön Agripaß, eöß to hikta tënan varo voh a soe pa teß vëh nöß to ep koman a tata to taneß maß pa vöön va kin. 20 Vamomoaan, eöß to vatvus a soe manih Damaskas, paröß nö manuh Jerusalëm, me pa ma vöön kurus po Jiuß, me pa napan to hikta teß ne pan ee ro Jiuß. Eöß to vatvus a soe va pa ö nee se panih ko këh a ma taateß hat ko heß rea pe Sosoenën, pare nok a tah to vataare non a ö nee to panih. 21 Eöß to vatvus noß a soe pamëh. Ivëh, ka manih koman a Iuun Hinhin Apuh o Jiuß to öt ee peöß, pan ee se ip vamët ee peöß. 22 E Sosoenën to vaßaus voh a neoß, keß tavus en maß kuru, ivëh, köß sun noß manih kuru vëh pa vatvus ke ra napan a soe, ma moeh teß akuk, me a nap susunön. Eöß hikta vavatvus noß tah soe voon, ahik, a soe vëh moaan voh no teß vanënën soe, me e Mosës to soe voh a ö seß tavus. 23 Ee to soe vavoh manih, pan e Kristo se teß o kamis, pareß mët, ko momoaan ke ra ma napan pa sun taneß hah po vapeepe, ko teß toßtoß tamoaan e non. Eß se vatvus a taateß maaka manih pa napan va Israël, me a napan varih to hikta teß ne ro Jiuß, pan eß se kon taneß hah raoe pa hat.”

24 E Pöl to soe vamanih, ke Festus kokoeß töön en pe Pöl ko soe pan, “Pöl, eën to papön! O nat apuh pën to vapapön voh en pën!” 25 Ivëhkëk, e Pöl to piun, pareß soe pan, “Teß susun Festus, eöß hikta teß papön noß! Eöß to teß me noß po kokoman vih, ko vaato noß, ka ma tah varih, ee to paraß man. 26 Teß Sunön Agripaß! Eöß hikta nanaöp noß pa vaato me a oah, suk a ma tah manih. Eöß to nat e noß, eën to nat e nom pee, suk a ma tah varih to hikta tatanok vakoaan voh non. 27 Teß Sunön Agripaß, eën to vaman e nom pa ma Vavaasis po Teß Vanënën Soe, ha? Eöß to nat e noß, eën to vaman e nom!”

28 Ke Agripaß soe ke Pöl, “Eën to koman kës nom pan, o vaato kökööt pën manih peöß to onöt e non pa ö söß tavus eöß a teß va po vaman ko vatet e Ieesuß, ha?”

29 Ke Pöl piun, pareß soe pan, “O vaato pea se keh teß kökööt e non, keß to rë, eß to vih avoeß e non. Eöß to hinhin suk e noß pën, me a napan kurus varih manuh pe Sosoenën pan, eöm se tënan a neoß, ko tavus o teß to vatet nem e Ieesuß. Ivëhkëk, eöß hikta iu noß a ö see nohtöön a neöm po uris eh, ko vateß pa nohnoh!”

30 A Teß Sunön, me a teß susun pa kaman, me e Bernaësiß, me a napan varih nee to pët teß ne to sun ko tavus ee. 31 Pare vavasoe koman tavus nö e ne pan, “A teß vëh to hikta nok ta hat to onöt non a ö seß mët, me pa nö pa nohnoh.” 32 Ke Agripaß soe ke Festus pan, “A teß vëh na se varakah ee peß, pa ö seß hikta hin voh a ö neß to iu rakah non pan, e Sisaß se tënan o vöhioß peß.

Copyright information for `TPZ