Acts 27

A Nap Vëvënsun To Tok Me E Pöl Po Paröß Ko Nö Room

Ee to soe vaonöt ee pemöm, eöß e Luk se nö vaßpeh me e Pöl po paröß, manuh muhin Italiß. Ee to vahoß o soe vaonöt manih pe Julius pa ö seß matop non e Pöl, me a ma meh teß nohnoh pa ö see tok po paröß. E Julius a teß susun pa 100 teß vëvënsun to taneß no maß pe Sisaß. Emöm to tok po paröß va Adramitium pamöm nö em. O paröß pamëh se oho nö pa ma vöön to teß non pa muhin va Esiaß. E Aristakus, a teß va vöön Tesaronaëkaß pa muhin Mësadoniaß, nemöm to nö vaßpeh. Po meoh poen emöm to vos vöön Saëdon, ke Julius nok vavih e Pöl pa ö neß to vaonöt eah se nö ko ep a ma vakamöß peß, kee heß poë a ma tah neß to kökööt e non. Emöm to këh em pa vöön Saëdon, ko paröß hikta onöt non a nö vavih, peß a tuvuh to apuh, ivëh, ko paröß nö vame en pa To Saëprus. Emöm to nö totoopin em pa tahiß va Silisiaß me Pamfiliaß, ko tavus em vöön Maëraß pa muhin Lisiaß. Manih Maëraß, e susun pa nap vëvënsun to nat en po paröß va vöön Alëksëndriaß to nö non Italiß, kemöm peah em nën.

O paröß vëh möm to teß nem to nö en to hikta vëvëhöß non, suk a tuvuh to matan maß o paröß, ka nö vavaapun e non. Ivëhkëk, a nap kiu po paröß to kiu vëhvaß, kemöm vos em vöön Nidas. A tuvuh to matan a möm kemöm hikta onöt nem a nö pet, ivëh, ko paröß nö vame manih pa To Krit vatët non manih Salmone to vame këh a tuvuh. A nap kiu po paröß to kiu vakis rakah ee, ko paröß kokoe sinten nö e non pa tahiß va Krit. Emöm to vos em pa ö nee to pokaß ne a Ö Totomin Vih Oho Po Paröß. Eß hikta teß varo këh non a vöön Laseaß.

Emöm to teß em pa ma siß poen nën, keß tavus en pa ö no a tahiß to moovi non to hik en. Keß öök en pa poen no a tahiß hikta moovi non po paröß se nö, ivëh, ke Pöl kömköm raoe pan, 10 “Ea se keh nönö avoeß e no, ea se taum vahat manih tahiß, a ma moeh kakoß varih komön o paröß se ro ee, ko paröß tatakök en, ea tomeß mëtmët vahik ee koman tahiß.” 11 Ivëhkëk, e susun pa nap vëvënsun to vaman en pa soe pe tövavanö o paröß, me e tövaneah, ko pënton varo en pa soe pe Pöl. 12 A ö vëh hikta teß vih non pa ö no paröß se vame këh non a ivat, keß antoen non a ö no a ivat se hik en. Ivëh, ko teß kurus varih koman o paröß to vaonöt ee pa nö, ko vos manuh Finiks ko teß ne nën pa ma poen pa tuvuh apuh. Finiks, eß a ö oho vame po paröß, to teß ke non maß pa papkiruk in a To Krit pa ö no potan to kukunah ke non.

A Tuvuh Apuh Manih Tahiß

13 A siß tuvuh to taneß maß pa papkiruk to hikta teß eh non to ip maß, ka napan koman ee pa ö se nö. Ivëh, kee rëh peah a ankaß in o paröß, ko paröß kokoe sinten nö e non pa tahiß va Krit. 14 Ivëhkëk, eß to hikta teß varë, ka ivat a pah apuh to ip maß nee to pokaß ne a ivat va pa papmatö to taneß maß pa meh papan in a To va Krit. 15 A tuvuh to teß vavah en po paröß, ka nap kiu hikta onöt ne a piun hah o paröß, ivëh, kee koe ke pa tuvuh po paröß. 16 Emöm to koe vame pa To Kaudaß, peß a tuvuh to apuh, ivëh, kemöm eh rakah em pa rëh peah o paröß soneß to ënpan nem a tuvuh se miröß en. 17 A nap kiu po paröß to rëh peah ee po paröß soneß, ko nohtöön ee peß po uris manih po paröß. Pare noh tavi avoes ee po paröß pa ma uris, suk ee to naöp ne pan, o paröß to meß takök. Ee to naöp rakah e ne pan, o paröß to meß peah a mës va sinten tahiß va Afrikaß. Ivëh, kee vöknah ee pa ma rara varih po paröß, ka tuvuh vaßo en po paröß. 18 A tuvuh me a supa apuh to teß avoeß e non, ivëh, ko meoh poen pa pöstakah nee to vöknah ee pa ma moeh tah këh o paröß. 19 Po meoh poen no a nap kiu to naöp, pare viivi ee pa ma rara me a ma meh tah va po paröß. 20 A ma poen peo to oah nemöm to hikta ep in a potan me o vesun, ka tuvuh he teß avoeß e non. Ivëh, kemöm hikta koman nem a ö semöm teß toßtoß hah nem.

21 A ma poen peo no a napan to hikta ënaëën ne, ivëh, ke Pöl sun ko soe ke raoe pan, “Eöm a ma napan to teß nem manih, eöm se keh tënan voh a soe peöß, ka teß no maß pa To va Krit, ea hikta se taum vahat va no manih me a ma moeh tah hikta se ro ne. 22 Ivëhkëk, eöß to soe vakis keoß peöm, eöm se teß me nem o kokoman tö, suk ataeah, a hikta paeh va pea se mët, o paröß varoe se ro en. 23 Eöß a teß pe Sosoenën vëh, nöß to vasunön noß sih, pa poen no a ankeroß peß to nö maß peöß ko soe pan, 24 ‘Pöl, koe a naöp! Eën se nö ko sun eom pa matan e Sisaß. E Sosoenën to tënan en po hin pën me a ma napan to teß me ne oah komön o paröß vëh, a hikta paeh peöm se mët.’ 25 Ivëh, ke eöm se koe a naöp, suk eöß to vaman noß e Sosoenën se nok a tah vamanih pa ö neß to soe va ka neöß. 26 Ivëhkëk, ea se koe o paröß, keß nö ko takin pa to.”

27 A tuvuh to vaßo en po paröß möm to teß nem, eß o havun me o taanaß poen poë varih nemöm teß em koman a tahiß apuh nee to popokaß ne Mediterenian. Pa topnin poen no a nap kiu po paröß to koman e ne pemöm to öök vatët em po oeh. 28 Ee to vöknah o uris vavatoe pa ep pa ruruvun in a tahiß, ko taum pan, a ruruvun to 40 mitaß non. Ko hikta teß varë, pare vatoe hah ee, ko taum a ruruvun pa tahiß to 30 mitaß non. 29 Ee to naöp me ne po paröß to meß peah o vös, ivëh, kee vöknah taneß kusin o paröß a taanaß ankaß. Pare hinhin ne pan, a muhin se takah vëhöß maß. 30 A nap kiu to iu rusin këh e ne po paröß, ivëh, kee vöknah o paröß soneß manuh tahiß to piuk pan a ma ankaß nee to vöknah ne manuh po matön o paröß. 31 Ivëhkëk, e Pöl to soe ke susun pa nap vëvënsun, me a nap vëvënsun pan, “A ma teß varih se keh hikta teß ne komön o paröß, a, eöm se ro kurus em.” 32 Ivëh, ka nap vëvënsun moes kurus ee po uris vëh to nohtöön non o paröß soneß keß vuß tahiß ko o en.

33 A siß ö ka potan pa en maß, ke Pöl soe ken pa napan pa ö se ëën ta taëën, eß to soe pan, “Eöm to teß akuk em po havun me o taanaß poen ka ma komëneöm hikta teß vavih non, paröm hikta ënëën nem ta ma taëën. 34 Ivëh, köß soe vakis ka neöm, ëën öm ta ma taëën ko mahun ka sionineöm se eh hah. Eöm tënan e nem eh? Eöm kurus se teß vavih e nem, a hikta paeh va peöm se ro.” 35 E Pöl to vaato vahik en ko kon a taëën, pareß soe vavihvih ke Sosoenën pa matëëre, ko kök, pareß taneo ëën en. 36 Ivëh, ko kokoman pee vih en, kee kurus taneo ee pa ëën. 37 Emöm o 276 teß to teß nem komön o paröß. 38 Ee kurus to ëën vamhun ee, pare viivi ee pa ma meh pëk taëën manuh tahiß, suk o paröß se teß are non.

A Supa To Kökök O Paröß

39 A unöh to kopös en pa potan, ka nap kiu po paröß hikta inan vamaaka ne pa sinten tahiß vëh nee to teß ne. Ivëhkëk, ee to ep in a ö to onöt e non po paröß se ho vatët en nën, pareß teß non o kösan vih. Ee to koman ee pa vatkin o paröß nën. 40 Ee to moes kurus a ma uris in a ankaß, ko pureß o uris vëh to nohtöön non a tah to ririh non o paröß, pare vapeah ee po rara vëh matan o paröß, pan a tuvuh se teß takin o paröß manuh sinin. 41 Ivëhkëk, o matan paröß to peah vößpë en po vösvös topnin tahiß. O matan paröß to teß vakis e non po vösvös. Ka supa susupatön e non maß peß, keß tatakök en.

42 A nap vëvënsun to teß me ne po kokoman va pa ip vamët o teß nohnoh, peß ee tomeß akaß takin, pare rusin. 43 Ivëhkëk, e susun pa nap vëvënsun to iu vaßaus non e Pöl, ivëh, keß soepip en pa ip ro teß nohnoh. Pareß soe varuß ke a ma teß varih to onöt ne pa akaß a ö se surap tahiß, pare akaß takin vovoh. 44 Ko teß kurus varih se suk, ee se vaket nö ne pa ma tanaon tatakök këh po paröß, pare akaß takin. Eß vaßih a ö nemöm to takin vavih vah vavoh.

Copyright information for `TPZ