Acts 6

A Tönim Teß Me A Pöök Marën A Vaßaus A Ma Aposol

Manih pa ma poen varih no a napan to vaman ne to pepeo rakah nö e ne. Ka ma to Jiuß to nat ne o to va Grik heve e ne po Jiuß manih Jerusalëm, ee to soe pan, “Pa ma poen kurus eöm to vavaßaus nem o teß varih to kökööt ne pa moniß, ivëhkëk, eöm to hikta vaßaus nem a ma köövo amop pemöm.” Ivëh, ka havun me a poa aposol vaoe ee po ihoß pee kurus, pare soe pan, “Eß to hikta vih non pa ö na se vakah a vavaasis a soe pe Sosoenën, para matop no o moniß me a taëën. Kën kea, ea se vateß ta tönim me a poa teß no a Tuvuh Vasioß me o nat vih to teß non pee, kee matop ne a ma tah poë varih. Ivëh, ka se matop varoe no a taateß va pa vavaasis a soe pe Sosoenën, me a hin vaßaus a ma napan.”

Ee kurus varih to teß ne po vakum to vaeö me ne po kokoman pamëh. Pare vateß ee pe Stivin, eß a teß rakah va po vaman no a Tuvuh Vasioß to puh non peß. Ee to vateß me e Filip, ke Prökoras, ke Nikenor, ke Timon, ke Pamenas, me e Nikolas. E Nikolas a teß to hikta teß non a to Jiuß va pa vöön apuh va Antiök, eß to vaman a taateß po Jiuß, ko tavus en a to Jiuß. Ee to me raoe manuh po aposol, pan o aposol se hin, pare vahoß a koreere ko vateß raoe pa nok a kiu vaßaus.

A soe pe Sosoenën to nö vavah en pa ma ö kurus. Ka napan peo tavus ee o teß va po vaman manih Jerusalëm. O teß ësës heß peo to vatet a soe pe Sosoenën ko vaman.

O Jiuß To Vahoß E Stivin Po Vahutët

E Stivin, a teß va po vaman to puh non po ururuan me o kikis ne Sosoenën to heß voh poan pa nok a ma tah vatoksean topnin a ma napan. Ivëhkëk, o pöök vakum to Jiuß to vavaato vasukaß me ne pe Stivin. Ee to teß hop ne po iuun hinhin soneß po Jiuß, a ëhnëëro teß varih to teß hop ne po vakum pamëh, o Libertin. A ma teß to teß hop ne nën to taneß maß Saëriniß, me Alëksëndriaß. O vapöök vakum to taneß maß Silisiaß me Esiaß. 10 Ivëhkëk, a Tuvuh Vasioß to heß e Stivin o nat vih oah, ke Stivin se keh vaato ka napan hikta onöt ne piun poë. 11 Ivëh, ka napan piuk in e Stivin, ee to vateß a ma teß pa piuk e Stivin pan, “Emöm to tënan e Stivin to sosoe vahat non o Vavaasis pe Mosës, me eß to sosoe vavahat non e Sosoenën.” 12 Manih po piuk pamëh nee to nok, ee to kuin ee po heve po teß susunön po Jiuß, me o teß vavaasis to nat i ne o Vavaasis pe Mosës, me a napan. Ivëh, kee nö ee manuh pe Stivin ko me ee peß manuh po Vakum Teß Susunön po Jiuß. 13 Pare me ee maß pa ma teß pa heß a soe piuk. A ma teß poë varih to piuk e Stivin pan, “Tamoaan rakah, a teß vëh to sosoe non a ma soe hat suk a Iuun Hinhin Apuh me o Vavaasis pe Mosës. 14 Emöm to tënan nem eah to soe pan, e Ieesuß va Nasarët se kök a Iuun Hinhin Apuh, me a ö neß se panih o Vavaasis to taneß voh maß pe Mosës.” 15 Ka ma napan varih to ihoß ne ko kuteß ne pa matan e Stivin to ep ne a mataneah to maaka va non manih pa matan a ankeroß.

Copyright information for `TPZ