Ephesians 3

A Kiu Pe Pöl Ivëh Pa Vatvus A Soe Vih Pe Ieesuß Kristo Manih Po Teß Varih To Hikta Teß Ne Pan Ee Ro Jiuß

Eöß ivëh e Pöl, eöß to hinhin suk a noß neöm manuh pe Sosoenën, eöß to teß noß pa nohnoh suk a ma kiu ne Sosoenën to heß a neoß, köß nonok noß. Eß to soe ka neoß pan, eöß se vavatvus noß a Soe Vih pe Ieesuß Kristo manih peöm o teß varih to hikta teß nem pan eöm ro Jiuß. Oman, eöß to koman noß pan, eöm to pënton pöß voh em pe Sosoenën to heß voh en peöß pa kiu vaßih. Manih po ururuan peß nöß se nok a kiu pamëh marën a vaßaus a neöm. E Sosoenën to vataare voh en peöß po kokoman vakoaan peß vëh, to teß non sih manih po kupu peß. Köß vatvus pet voh keoß peöm pa siß ö soneß va po kokoman vakoaan pamëh manih po kiun peöß. Ko poen nöm se keh ëh a soe nöß to kiun suk o kokoman vakoaan pamëh, eöm se nat em, peöß to nat vamaaka e noß po kokoman vakoaan vëh, to soe suk non e Kristo. Moaan voh ne Sosoenën to hikta soe tavus avoeß voh non o kokoman vakoaan pamëh manih pa napan. Ivëhkëk, kuru vaßih ne Sosoenën to vatvus koe ke maß a soe vakoaan peß manih pa Tuvuh Vasioß. Eß to vatvus ke maß a soe pamëh manih pemöm a napan neß to kon voh, kemöm tavus o aposol vivihan peß, me ro upöm teß varih to vavatvus ne a soe. O pus kokoman va pa soe vakoaan pamëh to teß va non manih pan, manih pa Soe Vih pe Ieesuß Kristo, ne eöm o teß to hikta teß nem pan eöm ro Jiuß to vaman nem, paröm tavus em a kën kea va po vaman vaßpeh me emöm o Jiuß varih to vaman nem e Kristo, ka tavus ee o pöh sionin. Ea kurus to kokon koe ke no a ma tah vihvih ne Sosoenën to vaneah keon voh ken pea manih pe Ieesuß Kristo.

E Sosoenën to nok voh a neoß köß tavus eoß a teß kikiu peß, marën a vatvus a Soe Vih peß manih pa napan. Manih po kikis peß, neß to heß a neoß o heß vih peß, marën a nok a kiu peß. Eöß to vapaan rakah ke noß a napan kurus pe Sosoenën, ivëh, köß hikta onöt noß a kon o heß vih peß. Ivëhkëk, e Sosoenën to ururuan a neoß, pareß heß en peöß pa kiu peß, ka kiu pamëh, eß a kiu va pa vatvus a Soe Vih manih po teß varih to hikta teß ne pan ee ro Jiuß. Ka Soe Vih pamëh to vavaato vaviß suk e non pa ma tah vihvih pe Kristo. Ka ma tah vihvih poë varih ne ea a napan va po oeh vëh to hikta antoen no a kiiki me a ëh. E Sosoenën to nok voh a ma moeh tah kurus, ivëhkëk eß to koaan momoaan voh en po kokoman peß manih pa tah neß to kehkeh nok non. Ko kokoman pamëh teß vakoaan tamoaan voh e non sih. Ivëhkëk, kuru neß to heß en peöß pa kiu va pa vamaaka o kokoman vakoaan pamëh. 10 Moaan voh neß to koaan e non po kokoman vakoaan peß. Ivëhkëk, kuru vaßih neß to vatvus en peß manih po kum teß varih to vaman ne sih e Sosoenën. Ka manih pa taateß pamëh ne Sosoenën to nok a ma vu kokoman vihvih, me a ma vu nat vihvih peß, kee tavus vateeraß koe ee manih po kum teß varih to vaman ne poë. Ivëh, no ankeroß eh, me ro tuvuh va pa vöön va kin to nat suk ne o kokoman vakoaan pe Sosoenën. 11 Moaan voh ne Sosoenën to meß avoeß voh e non pa nok o oeh vëh, eß he koman e non pa nok a tah pamëh. Ka manih pa kiu pe Sunön pea Ieesuß Kristo, neß to nok vahik en pa ma tah poë varih. 12 Ea to vaman e no sih e Kristo, para hikta nanaöp hah no a tavus manih pa matan e Sosoenën. Ea to nat va e no manih pan, e Kristo eß a hanan na se suk, para nö ko tavus na manuh peß, ka hikta tah se sunpip hah a ra. 13 Ivëh, köß se soe vakis rakah keoß peöm, eöm se koe a haraß vahat suk o kamis nöß to teßteß noß marën a vaßaus a neöm, a ma vaman peöm tomeß kunah. Eöm se haraß vaeö nem, suk ataeah, o kamis pamëh to tavus maß, marën a vaßaus a neöm, köm teß vavih me nem e Sosoenën.

E Pöl To Hin Vaßaus A Napan Pe Ieesuß Varih Ëfësus

14 Ivëh, köß vatokon eoß manih pa matan e Tamaara, paröß hin vakis eoß peß pan, eß se vaßaus a neöm. 15 E Sosoenën, eß e Tamaara napan va vöön va kin me manih po oeh, ke eß koman to vëvëhnan voh en pa ma vu tom taman kurus. 16 Eöß to vavatokon noß sih, paröß hinhin va noß manih pan, e Tamön to teß me non o kikis pa nok a ma moeh tah vihvih peo. Ka manih po kikis peß, neß to antoen e non pa vapuh a ma komëneöm pa Tuvuh Vasioß peß. Pareß nok a neöm, ka ma kupu peöm eh rakah ee manih pe Sosoenën. 17 Ivëh, köß hinhin suk a noß neöm o teß varih to vaman voh em pe Kristo, pan eß se teß tamoaan rakah non pa ma kupu peöm, ka taateß iu teß se eh rakah non manih pa ma kokoman peöm, köm sun vakis ko teß va nem manih pa ö no oeh to ötöön va e non a ma aan naon, ko naon sun vakis non. 18 Eöß to hinhin suk a noß neöm manih pe Sosoenën, pan eöm varih o teß to hikta teß nem pan eöm ro Jiuß, me ra napan pe Sosoenën, eöm kurus se kon o pöh vu kikis va pa nat vavih o iu apuh pe Kristo. Ea to hikta nat no, o iu peß manih pea papanöß onöt non nih, me eß rë, aton non nih, me eß va kin vah va non nih, me eß ruruvun va non nih. 19 Ivëh, ka nat e no pa hikta pah teß to onöt non a nat a ö ne Kristo to iu va ka rora sih. Ivëhkëk, ea to onöt e no pa nat eah. Köß iu noß a ö ne Sosoenën se vapuh rakah a ra po toßtoß peß. Ko toßtoß peß se teß teraß non manih pea.

20 Eöß to hinhin avoeß e noß pan, o kikis pe Sosoenën koman ivëh, to kiu non sih manih pa komaara, ko kikis pamëh to teß oah e non po kokoman pea. Ka ma tah kurus na to hinhin suk no, ne Sosoenën se nok en pee, ka ma tah kurus poë varih to hikta onöt ne o kikis peß. 21 Ivëh, ka kuru me amot no a napan va po kum teß varih to vaman ne e Ieesuß se kë koe tamoaan ke ne a ëhnan e Sosoenën manih pe Ieesuß Kristo. Oman.

Copyright information for `TPZ