aSng 68:18
bSek 8:16

Ephesians 4

Ea A Napan Se Vatös Tamoaan Me No E Kristo

Eöß e Pöl, eöß to teß noß pa nohnoh, eöß to teß suk noß nën, eöß to nonok noß a kiu pe Sunön. Eöß me to koman noß pan, e Sosoenën to vaoe voh a neöm, pan eöm se vatet a taateß peß. Ivëh, köß iu kunkuin noß a ma kokoman peöm, pan eöm se suk a taateß totoopin, me eöm se vatet varoe o iu peß. Eöm se kunah ke ra napan pe Kristo, paröm nok a taateß to vatö non a ma komëëre. Eöm se nat nem heve raoe, pa ö nee se nok vaheve a neöm. Eöm papaeh se heß raoe o kokoman vih, paröm teß a ma punis varih nee to heß a neöm, suk eöm to iu nem raoe. A Tuvuh Vasioß to heß voh en pea pa taateß vapöh kokoman. Ka taateß pamëh to teß va non manih po uris to noh vatös a rora ka tavus o pöh vuteß. Ivëh, köm se sun vakis rakah nem ko matop nem a taateß pamëh. Ea varih a napan va po vaman, ea to teß va e no manih po pöh sionin, para teß me no a pah Tuvuh Vasioß to teß non manih pea. Eß a tah ne Sosoenën to vaoe suk a ra, pan ea kurus se anoeh no a kon a pah tapui vih neß to soe vaman voh, pan eß se heß a ra. Ea kurus to teß me no a paeh a Sunön, para vaman no o pöh vavaasis, para kon a paeh a pupui. Eß to teß non a paeh a Sosoenën. Ke Sosoenën pamëh, eß ro a paeh e Tamaara a napan kurus. Ka tasun peß to apuh, pareß teß oah e non pa ma teß tasun pa ma napan kurus. Pareß kiu tamoaan non topniira napan peß, pareß teß hop tamoaan e non manih pa ma napan kurus varih to vaman ne poë.

Ivëhkëk, e Kristo to heß vakëkëh voh en pea pa ma vu heß na se nonok no a kiu peß. Ea papaeh to kon a ma vu heß poë varih, suk e Ieesuß Kristo koman to ki vakëkëh ka ra a ma heß poë varih po iu koman peß. Ivëh, no Puk pe Sosoenën to soe suk va non manih pan,

“O poen neß to peah manuh pa ö va kin vörep,
pareß kon a nap nohnoh peo, kee nö vaßpeh me ee peß.
Pareß heß en pa napan pa ma heß.” a 
Ka soe vaßih, “Eß to peah en pa ö va kin vörep,” eß a soe pamëh to vataare va ka rora manih pan, e Kristo to hikta peah varoe voh manuh pa ö va kin, ahik, po vamomoaan rakah neß to kunah voh maß manih po oeh vëh. 10 Ka teß vëh to kunah voh maß. Eß kuru a teß ko pamëh to peah hah en. Ka manih pa ö pamëh to va kin oah e non pa ma meh tah va akis. Eß to nö nën marën a matop a ma moeh tah kurus. 11 A teß pamëh, e Kristo to heß voh a napan a ma vu heß, eß to heß a ma vu heß poë varih to teß va ne manih. Manih po upöm, neß to heß raoe a kiu aposol, ko heß o meoh upöm teß a kiu pa vatvus a soe. Ka ma meh neß to heß raoe a kiu pa nö vavah pa vatvus a Soe Vih pe Ieesuß Kristo manih pa napan. Pareß kon en pa ma meh teß pa nok a kiu va pa matop me a vavaasis a napan pe Sosoenën. 12 E Kristo to heß a ra a ma heß poë varih marën a vaßaus a ra a napan pe Sosoenën, ka onöt e no pa nok a ma kiu vihvih peß manih pa vaßaus o upöm teß. Ivëh, ke ea varih a napan to teß va no manih pa sionin e Kristo, ea se tavus vaeh, para teß vavih no. 13 Ivëh, ka ma kiu na to nonok no, se nönö nö kov e ne, pareß öök rakah na pa ö na se vapöh kokoman manih po vaman. Para nat vavih ee pe Koaß pe Sosoenën, ko puh rakah ee pa ma taateß vih pe Kristo. Ka ma taateß peß tavus vateeraß ee manih pea.

14 Ea se teß va no nën, para nat no teß vatëh va no manih po koaß sosoneß. A ma soe varih no a nap vamanman teß to nonok ne sih, suk ee to nat vavih e ne sih pa taateß vatomore, me a taateß piuk. A ma taateß poë varih to hikta onöt ne a toon vavah va ka ra manih pa ö no a tuvuh me a supa to totoon vah va i non o sini manih tahiß. Ea me se nat no vanun o vaman pea, keß nun ko teß va non manih pa ö no sini to nönö pinpiun vah non, pareß hikta tavus na manuh pa ö neß to nönö non to tavus. 15 Ivëh, ka se nat rakah no vahoß no a ma tenara manih pa ma soe poë varih. Ahik, ea se vavatet vaviß no a taateß iu a meh teß, para sosoe ro ke no raoe a soe man. Ea se keh nonok va no nën, ea se tavus rakah ee o teß eh manih pa taateß vaman, ko vatös me e Kristo, keß tavus en a teß se vovoh ka rora a napan peß. 16 E Ieesuß Kristo to vatös me en pa napan peß, keß teß va non manih pa sionin a teß. A ma ö kurus varih pa sionin a teß to teß vatös non, ko sionin kikiu vavih non, pareß tavus vaeh en. Eß to teß vatoe va e non manih po kum teß varih to vaman ne e Sosoenën. A ma papaeh pee se keh iu ne a ma upöm pee, pare nok a ma kiu pee, a, a ma kum poë varih to pu vaeh ee manih po kikis pe Kristo.

Ea Varih A Napan Pe Kristo Ea Se Panih A Ma Taateß Hat Pea Para Suk A Taateß Voon

17 Manih pa ëhnan e Sunön, eöß to kehkeh soe ka noß neöm a pah soe peöß. A soe kikis peöß to teß va non manih, eöm se nat nem suksuk vatëh nem a taateß pa napan varih to hikta nat ne pe Sosoenën. A ma kokoman pee to nun rakah voh ee. 18 Suk ataeah, a soe pee to hat, kee hikta onöt ne a nat vamaaka e Sosoenën, pare hikta iu kon ne o toßtoß voon vëh ne Sosoenën to heßheß non. Ee o vatösoe, pare hikta nat ne pa hanan pe Sosoenën. 19 Ee to hikta potpoet suk ne a ma taateß hat nee to nonok ne, ee to vahoß hop rakah rea manuh po iu hat va po sionin. Ka ma kokoman pee rikrik suk e ne pa nok a ma taateß hat.

20 Ivëhkëk, a taateß pe Kristo no a napan to vavaasis a non neöm, to hikta teß va non manih. Ahik. 21 Eöß to nat e noß peöm to pënton vahik voh em pa soe man pe Kristo. Ee to vavaasis vahik voh ee peöm pa ma vu taateß neß to iu non, na se suksuk no. 22 Moaan voh nöm to suksuk nem o iu hat va pa komëneöm, ka ma taateß hat poë varih, ivarih, a taateß piuk a meh teß, me a taateß karë pa nok a taateß hat. Me a taateß rëh koe a teß manih pa hanan va pa nok a taateß hat. Ka kuru vaßih nöm se koe rakah a ma taateß hat poë varih. 23 Ka kuru nöß to iu noß a ö nöm se panih o iu hat va pa komëneöm, paröm kon o iu voon manih pa komëneöm. Ka ma kokoman peöm se tavus vavoon rakah. Köm tavus em a nap voon. A nap voon poë varih ne Sosoenën to nok raoe, kee tavus va ee manih peß koman. Suk ataeah, a ma taateß pee to totoopin pare vivihan vaviß vamanih peß.

25 Ivëh, köm se vakah rakah a taateß piuk, vamanih pa ö no Puk Vapenpen to soe va non,

Paröm sosoe tamoaan ke nem a napan pe Sosoenën a ma soe man.
Suk ataeah, ea kurus, ea to teß va e no manih po pöh sionin. b 
26 A ma kokoman peöm se keh haraß vahat po heve, köm matop nem, peöm tomeß nok em pa ta hat. Eöm se koe a öt o heve, keß öök pa tëëm no a potan se rokoß. 27 Eöm me se nat nem heß rakah ta ö soneß ne susun po oraß hat se koe ke maß, pareß miröß o vamomhë vih peöm. 28 A teß vëh to teß voh non a teß kakaveo, eß se nat non kakaveo hah non. Eß se kiu vëhvaß rakah pa koreneah, pareß kon poß a taëën to onöt non a ö neß se vaßaus koman hah ea, me a ma meh taneah neß to antoen non a vaßaus o teß arus.

29 O poen nöm to vavaato me nem a meh teß, eöm se nat nem nok ta soe to vaharaß vahat non eah. Eöm se soe varoe a soe vih vëh, to antoen non a vaßaus o teß varih no vaman pee to kökööt non manih pa ma kupu pee. 30 Eöm se nat nem nok ta tah to vatamak non a Tuvuh Vasioß pe Sosoenën. E Sosoenën koman to heß voh en peöm pa Tuvuh Vasioß pamëh, keß teß va e non manih, po vëknöm to vataare a non neöm a napan peß. Ko vëknöm pamëh to vataare e non peöm pan, e Sosoenën se kon hah a neöm, köm tavus këh em maß pa hat va po oeh vëh. 31 Eöm se varakah rakah a taateß rës suntan a meh teß, me a taateß heve ov in a meh teß, me a taateß to vaßpuh, me a taateß hikan teß keß haraß vahat, me a ma meh taateß hat na to nat e no. 32 Eöm se nok varoe a taateß vih manih po upöm napan pe Kristo, me eöm se heß a komëneöm manih pee. Eöm me se ihan anoe a ma hat pee, vamanih pa ö ne Sosoenën to ihan anoe vavoh in a ma teß hat peöm manih pa ëhnan e Kristo.

Copyright information for `TPZ