aSng 2:7
bSng 110:4

Hebrews 5

A Teß Susun Po Teß Ësës Heß E Ieesuß, To Onöt E Non Pa Kon Hah A Ra

Ivëh, ke Sosoenën vateß a ma Teß Susun po Teß Ësës Heß, to kiu ke ne a napan pa heß a ma heß vaeö pee manuh pe Sosoenën. Me ee to nok a taateß ip vamët o vönaß, ko ës ke na e Sosoenën pa vahik a ma hat pa napan. A Teß Susun po Teß Ësës Heß to teß akuk vavoh e non nën, ivëh, keß vavaßaus non o teß varih to hikta maaka ne pan, a tah nee to nonok ne, eß a tah hat. Ivëh, keß heß a vaßaus tö manih pa napan poë varih, suk eß koman to haraß voh en pa taateß punöß. Ivëh, ko Teß Susun po Teß Ësës Heß koman, to teß me e ne pa ma teß hat pee, pare ësës e ne na pa ma vönaß koman pee, me pa napan pa vahik a ma hat koman pee, me a ma teß hat pa napan. Me a hikta teß ësës heß to vateß koman hah ea vamanih pa Teß Susun po Teß Ësës Heß, suk eß to iu kon non a tasun apuh pamëh, Ahik, e Sosoenën varoe to vaoe a teß keß tavus en a Teß Susun po Teß Ësës Heß vamanih, pa ö ne Sosoenën to vateß vavoh in e Aron me o vuteß peß. Eß to teß akuk va kov e non manih pe Kristo to hikta vateß koman hah voh ea, pan eß a Teß Susun po Teß Ësës Heß, suk eß to iu kon non a tasun apuh pamëh. Ahik. Ivëhkëk, e Sosoenën to vateß voh poan, ko vanënën suk poan manih po Puk Vaëhëh pan,

“Eën e Koaß peöß,
kuru eöß e Tamömah.” a 
Manih pa meh soe, komön o Puk Vaëhëh ne Sosoenën to soe pan,

“Eën se teß nom a teß ësës heß va pa ma tamoaan.
Eën se teß nom a teß ësës heß vamanih pa ö ne Mëlkisëtëk
me o vuteß peß to teß vavoh ne.” b 
E Ieesuß to teß toßtoß avoeß voh e non manih po oeh, pareß hinhin vakis rakah voh non, pareß okook non e Sosoenën se vaßaus poan keß nat non mët. Suk ataeah, eß to vöknah voh ea, ko vavatet non o iu pe Sosoenën. Ke Sosoenën pënton en peß, pareß vaeh poan keß hikta nanaöp non a mët. Ivëhkëk, e Ieesuß to teß ro voh e non e Koaß pe Sosoenën, eß to kon kamis voh en, ko kamis pamëh, to vavaasis poan pa vatet a taateß pënton soe pe Tamaneah. O kamis me a sun hah pe Ieesuß to vapuh vavih poan, keß tavus voh en a teß se kon hah a ra, ka teß vaßpeh me no eah po toßtoß tamoaan, ea o teß varih to pënton no eah. 10 Ke Sosoenën soe vatvus voh en peß, pareß soe pan, eß a Teß Susun po Teß Ësës Heß vamanih pa ö ne Mëlkisëtëk, me o vuteß peß to teß vavoh ne.

Ea Se Nat No Teß Va No Manih Po Siß Koaß

11 Eöß to teß me noß a ma tah peo vihvih to hivaß ne pa vamaaka, nöß se soe ka neöm, suk a Teß Susun po Teß Ësës Heß vëh, e Kristo. Ivëhkëk, eöm to hikta kokon vamaaka ohoß nem, paröm hikta onöt nem a vatet. 12 Eöm to tavus voh em o teß to vavatet nem e Ieesuß. Ivëh, köm se vavaasis pet a ma meh teß a soe pe Sosoenën vëh nöm to pënton voh, ivëhkëk, eöm to hikta nok voh. Ivëh, ka meh teß se vavaasis hah a neöm a pusun o vavaasis vamomoaan va pa soe pe Sosoenën. Eöm se pënton o vavaasis eh to teß va non manih pa teß se ëën en pa taëën eh, ivëhkëk, eöm to rës avoeß e nem vamanih po teß to vamemeß ne. 13 Ivëh, ko teß to hikta kokon vamaaka ohoß ne o vavaasis eh pamëh, ee to teß va e ne manih po teß to vamemeß ne, pare teß va e ne manih po koaß. Ee to hikta nat ne pa taateß totoopin heh nee se suk, me a taateß hat heh nee se koe. 14 O vavaasis eh to teß va non manih pa taëën eh. A taëën eh, eß a taëën pa nap apaßpuh, nee to vaasis hah rea, pare inan pataeah to teß vih non me a tah hat, ko vatet a tah to teß vih non.

Copyright information for `TPZ