aSng 110:4
bSng 110:4

Hebrews 7

E Mëlkisëtëk Eß A Teß Ësës Heß

Ivëh ke Mëlkisëtëk, eß a teß sunön va vöön Salëm. Pareß teß non a teß ësës heß pe Sosoenën Kikis Vi. E Abraham to hah taneß maß po vapus pa ö neß to vapus, ko vöknah a ma teß sunön, me a nap vëvënsun pee. Pareß akeh e Mëlkisëtëk manih hanan, ke Mëlkisëtëk tapui en peß. Ke Abraham ki en pa ma tah, pareß heß en pe Mëlkisëtëk pa ma papaeh va pa ma havun tah neß to ip këh po teß susunön pareß kon maß. A pusun in o ëhnan vëh, e Mëlkisëtëk ivëh, “A teß sunön va pa taateß totoopin.” Suk ataeah, eß a teß sunön va Salëm, ko ëhnan vëh a teß sunön va Salëm to soe non pan, “A teß sunön kamöß.” Ahikta kiun to soe vanat non pan, e Mëlkisëtëk to teß me voh non e tamaneah pen sinaneah, me ahikta ö to soe vanat non o poen neß to koaß voh maß, me o poen neß to mët. Eß me voh ahikta ma sipuneah. Eßeß me to teß va e non manih pe Koaß pe Sosoenën, pareß teß non a teß ësës heß va pa ma tamoaan.

Eöm se ep a ö no a tasun apuh pe Mëlkisëtëk to teß va non. E Abraham e sipuura to teß vavoh non nën. Eßeß to kon voh a ma papaeh va pa ma havun tah neß to kon voh pa ö neß to ip këh voh pa ma teß susunön, pareß heß e Mëlkisëtëk, suk a tasun apuh peß. A kën sipun e Livaë, varih o teß ësës heß to vatet ne o Vavaasis pe Mosës, pa öt a ma papaeh va pa ma havun tah manih pa ma teß poëëre varih a napan va Israël. Ivëhpëhkëk, eße a ma pus koaß pe Abraham. E Mëlkisëtëk to hikta teß voh non pan, eß a teß va po vuteß pe Livaë. Ivëhkëk, eß to öt voh en pa ma papaeh va pa ma havun tah manih pe Abraham, pareß tapui en pe Abraham a teß to vaman voh a soe vaman pe Sosoenën. Ea to nat e no pa teß vëh to tapui a meh teß, eß to kikis oah e non pa teß vëh to kon a tapui. Manih po teß ësës heß eße to ötöt ne a ma papaeh va pa ma havun tah. O teß poë varih to mëtmët voh ee. Ivëhkëk, a teß vëh e Mëlkisëtëk to öt a ma papaeh va pa ma havun tah to teß tamoaan e non vamanih, pa ö no Puk Vapenpen to soe va non. O vuteß pe Livaë to kokon voh e ne pa ma papaeh va pa ma havun tah. Ivëh, ka antoen e no pa soe vamanih pan, o Livaë to heßheß koe voh ne manih pe Abraham, ke Abraham heß pet a ma papaeh va pa ma havun tah pee manuh pe Mëlkisëtëk. 10 E Abraham to akeh voh e Mëlkisëtëk, e Livaë he meß avoeß voh e non pa koaß maß po poen ne Abraham to heß e Mëlkisëtëk a ma papaeh va pa ma havun tah peß.

E Ieesuß To Teß Va E Non Manih Pe Mëlkisëtëk

11 Moaan voh a taateß va pa kiu pa teß ësës heß, me o Vavaasis pe Mosës to taneß voh maß manuh pe Mosës, ko öök maß manih po Livaë. Ivëh, no a napan va Israël to vavatet suk hah ne o Vavaasis pe Mosës no teß ësës heß po Livaë to vovoh ne. O teß ësës heß va po vuteß pe Aron se keh teß totoopin voh ne, eß hikta se teß hah non to meoh vu teß ësës heß, se teß va ne manih po vuteß pe Mëlkisëtëk. 12 O kikis va po Vavaasis pe Mosës to taneß maß manih pa taateß va pa kiu po teß ësës heß. Ko meoh vuteß se keh kon a kiu pa teß ësës heß, a kiu pa teß ësës heß pamëh nee to vavatet moaan ne, se panih en. Ivëh, ko kikis va po Vavaasis pe Mosës se panih me en. 13 Ivëh, ke Ieesuß e Sunön pea no a soe pe Sosoenën manih po Puk Vapenpen to vanënën suk voh non poan pan, eß a teß va po meoh vuteß ke. O vuteß pamëh to hikta öt voh ne a taateß va pa kiu pa teß ësës heß. 14 E Sunön pea e Ieesuß eß a teß va po vuteß pe Judaß. Ivëh, ke Mosës hikta soe voh ta pah soe manih po vuteß poë varih se kon a kiu pa teß ësës heß.

15 Ivëh, ka nat vamaaka ee, pa meh teß ësës heß voon e Ieesuß to tavus en. Eß to vatoe va e non manih pe Mëlkisëtëk. 16 Eß to hikta tavus teß ësës heß vavoh manih pa ö neß to tavus taneß maß po vuteß po teß ësës heß. Ahik. Eß to tavus voh a teß ësës heß manih po kikis va po toßtoß tamoaan. 17 Manih pa ö no Puk Vapenpen to soe va non,

“Eën se teß nom a teß ësës heß va pa ma tamoaan,
vamanih pa ö no vuteß pe Mëlkisëtëk to teß vavoh ne.” a 
18 Ivëh, ka taateß moaan va pa kiu pa teß ësës heß na se vahik eah, suk ataeah a taateß pamëh to hikta teß kikis onöt non pa vaßaus a napan, kee teß totoopin ne pa matan e Sosoenën. 19 Peß a taateß kiu pa teß ësës heß po Livaë to hikta onöt voh non a vatotoopin a ma hat pa napan. Ivëhkëk, a kiu pa teß ësës heß vëh e Ieesuß to vih oah e non pa taateß va pa kiu pa teß ësës heß. A meh kiu pa teß ësës heß vëh e Ieesuß, ivëh, eß to vatvus a taateß anoeh, ka huk vatët ee manuh pe Sosoenën.

20 E Sosoenën to soe voh a soe kikis, pa ö neß to vateß e Ieesuß pa kiu va pa teß ësës heß. Moaan voh a hikta soe kikis no Livaë to vateß voh manih pa kiu pa teß ësës heß. 21 Ivëhkëk, e Ieesuß to tavus a teß ësës heß pa soe kikis ne Sosoenën to soe vamanih peß pan,

“Eöß e Sunön to soe a soe kikis peöß,
paröß hikta se panih hah noß o kokoman peöß.
Eën se teß nom a teß ësës heß va pa ma tamoaan.” b 
22 Ivëh, ke Ieesuß vapuh en po vatompoan voon topnin e Sosoenën me a napan peß. O vatompoan pamëh to teß vih oah e non po teß vatompoan vamoaan, suk eße to hikta vavatet voh ne.

23 A napan to tatavus teß ësës heß voh ne, pare mëtmët këh e ne pa kiu pamëh. Pare hikta onöt ne a nok varë a kiu pee. 24 Ivëhkëk, e Ieesuß to teß tamoaan e non, ka kiu peß hikta se panih non, vamanih po Livaë, o teß ësës heß. Ivëh, keß hikta se heß non ta meh teß. 25 Ivëh, ke Ieesuß onöt e non pa nok a kiu pa teß ësës heß pa vaßaus tamoaan a ra, a napan varih to hinhin koe ne e Sosoenën manih pe Ieesuß. Suk ataeah, eß to teß tamoaan me e non pe Sosoenën, pareß hinhin ke non pea.

26 Ivëh, ke Ieesuß, eß a Teß Susun po Teß Ësës Heß, pareß onöt e non pa vaßaus a ra. Suk eß a vivihan no a hikta pah hat to teß non manih peß. Eß a vivihan no a taateß peß to teß ke e non pea a nap nonok hat, ka ëhnaneah to teß oah e non pa ma moeh tah kurus varu pa vöön va kin. 27 Eß to hikta teß va non po upöm Teß Susun po Teß Ësës Heß, eß to hikta iu non a taateß va pa heß me a ës ke na e Sosoenën o vönaß pa ma poen kurus, pa vahik a ma hat pa napan, me eß koman. Eß to heß vavoh in manih po heß manuh pe Sosoenën. 28 O Vavaasis pe Mosës to sosoe voh non pan, o Livaë se vateß a Teß Susun po Teß Ësës Heß pa nok a kiu pamëh. Ivëhkëk, a kiu pee to hikta kikis onöt non a vahik a ma hat pa napan. Ivëh, ke Sosoenën soe voh a soe kikis se tavus amot maß manih pa taateß va pa vateß e Koaß peß Ieesuß. E koaß pamëh no kikis peß to onöt e non pa vahik a ma hat pa napan. Eß a vivihan, pareß teß tamoaan e non.

Copyright information for `TPZ