John 14

E Ieesuß, Eß A Hanan Pa Napan To Nö Non Pe Sosoenën

E Ieesuß to vavaato avoeß me e non pa ma vamomhë peß, pareß soe ke raoe pan, “Eöm se koe a heß ëm o tamak me o punis, paröm vaman varoe e Sosoenën ko vatet eah, paröm vaman me a neoß. Manuh pa vöön va kin pa iuun pe Tamön a ma ö teßteß peo rakah to teß ne nën. Keöß se vovoh manuh, paröß vamatop maß a ma ö teßteß peöm. A soe peöß se keh hikta teß va non nën, eöß to hikta onöt noß a soe vanat a neöm a tah pamëh. Keöß se vovoh, paröß vamatop maß a ma ö teßteß peöm, paröß hah maß ko me a na neöm, ka nö, para teß vaßpeh no pa vöön pamëh. Ivëh, ka vöön poanheh nöß se teß noß, eß a vöön ko pamëh na se pët teß vaßpeh tamoaan no nën. Eöm to nat e nem pa hanan to nö non pa vöön nöß to nönö noß.

Ivëhkëk, e Tömas to soe ke Ieesuß pan, “Topoan, emöm to hikta nat nem pa ö nën to nönö nom. Emöm se poß nat vah va in a hanan vëh nih nën to suksuk nom?” Ke Ieesuß piun a soe pe Tömas, pareß soe pan, “Eöß koman a hanan, me eöß koman a pusun in a soe man, me eöß koman o toßtoß tamoaan. A pah hanan ro ko vëh to nö non pe Tamön, ivëh, eöß.”

Eöm se keh nat vavih e nem peöß eteh, eöm se nat vavih me e nem pe Tamön eteh. Ivëhkëk kuru, neöm to nat em pe Tamön. Paröm inan vahik em peß, suk eöm to ep e nem peöß to matan va e noß manih peß.”

Ke Filip soe ke Ieesuß pan, “Sunön, a tah rakah nemöm to iu nem ivëh, vataare a möm ah, e Tamön.”

Ke Ieesuß piun a soe pe Filip pareß soe ke poan pan, “Filip a tëëm rë rakah neöß to teß vaßpeh me voh eoß peöm, ivëhkëk, eöm hikta nat avoeß nem peöß eteh. Eteh to inan a non neoß, eß to inan me en pe Tamön, vahvapoßnih köm soe ka neoß pan, ‘Eöß se vataare a neöm e Tamön?’

10 Eën to hikta vaman pöß ko nom pan e Tamön to teß vaßpeh me non peöß. Köß teß vaßpeh me e noß peß. A soe nöß to sosoe ka noß neöm sih, nöß to hikta kokon taneß noß po kokoman koman peöß. Ahik, e Tamön to teß vaßpeh tamoaan me e non sih peöß, pareß vavatvus ke non a ma kiu peß manih peöß. 11 Vaman a neoß öm to sosoe ka noß neöm sih pan, eöß to teß vaßpeh me noß pe Tamön. Ke Tamön teß vaßpeh me e non peöß. Eöm se keh hikta vaman nem a soe vaßih, eöm se kokoman hah a ma kiu apaßpuh me a ma tah vatoksean nöß to nonok noß sih. Ivëh, ka ma tah poë varih se kunkuin o vaman manih pa ma kokoman peöm.

12 “Eöß to soe vamaman rakah keoß peöm, etereh to vaman a ne neoß me a ma soe peöß, ee se nok ee pa ma kiu varih nöß to nonok noß sih. Ee me se nok pet ee pa ma teß kiu to teß apaßpuh oah e ne pa ma teß kiu varih nöß to nonok voh noß. Suk ataeah, eöß se nö eoß manuh pe Tamön, paröß vanö maß a Tuvuh Vasioß manih peöm. 13 Eöm se keh hin ta ma taneah manih pa ëhnaneoß, eöß se pënton eoß pa hin peöm, paröß nok eoß pataeah nöm to hinhin suk nem. Eöß se nonok va noß nën, pan e Tamön se vataare o kikis apuh peß manih pa ma kiu neöß e Sunaißeah to nonok noß. 14 A, a ma tah kurus nöm se hin manih pa ëhnaneoß. Eöß se pënton eoß pa hin peöm, ko nok keoß peöm pataeah nöm to iu nem.

E Ieesuß To Soe Ke Ra Ma Vamomhë Peß Pan, Eß Se Vanö Maß A Tuvuh Vasioß

15 E Ieesuß to vavaato avoeß e non, pareß soe pan, “Eöm se keh iu e nem peöß, a, eöm se vatet vavih rakah a ma soe apuh peöß. 16 Eöß se hin e Tamön, keß heß en peöm pa meh Teß Va Pa Vaßaus, keß teß vaßpeh tamoaan me e non peöm. 17 Ka teß pamëh, eß a Tuvuh va pa soe a soe man. A napan va po oeh vëh to hikta onöt ne a öt poë, suk ee to hikta ep i ne eah, pare nat i ne poë. Ivëhkëk eöm to nat e nem pa teß pamëh, suk eß to teß me e non peöm, ka amot me kuru neß se teß vaßpeh tamoaan avoeß me e non peöm. 18 Eöß to hikta onöt noß a këh akuk va ka neöm manih po siß koaß nök. Ahik, eöß se hah eoß ma pa ep peöm. 19 A siß ö hat ka napan va po oeh vëh hikta se ep hah a ne neöß. Ivëhkëk, eöm se ep em peöß, suk eöß se mët, paröß sun hah eoß. Ivëh, ke eöm me se sun taneß hah em pa nap mët ko kon hah em po toßtoß. 20 Manih po poen pamëh nöß se sun taneß hah pa nap mët ko kon hah eoß po toßtoß. Köm nat em peöß to teß vaßpeh me noß pe Tamön, kemöm tavus em poß a paeh a teß. Ke eöm se teß vaßpeh me e nem peöß, köß teß vaßpeh me e noß peöm, ka tavus ee a paeh a teß. 21 O teß varih to kon a soe apuh peöß, pare vavatet ne, ee ko a napan poë varih to iu a ne neoß. Ke Tamön iu me e non po teß poë varih, keöß me se iu e noß pee. Paröß vataare öß manih pa ma papaeh pee.”

22 Ke Jiutas, a teß vëh to hikta teß non pan e Jiutas va Iskariot, to hi va in e Ieesuß manih pan, “Ivëhkëk, Sunön, vahvanih kën koman nom a vataare varoe eo manih pemöm, eën he hikta vataare eo manih pa napan kurus va po oeh vëh?”

23 Ke Ieesuß piun poan, pareß soe pan, “Etereh to iu a ne neoß, ee se vavatet ne o vavaasis peöß, ke Tamön iu e non pee. Kemöm poß Tamön nö vapöök em manih pee, pamöm nok em pa ö teßteß pemöm poß manih pa ma kupu pee. 24 O teß varih to hikta iu a ne neoß, pare hikta iu vatet ne o vavaasis peöß. Ko vavaasis vaßih nöm to tënan nem sih, eß to hikta teß non pan, o vavaasis koman peöß. Ahik, o vavaasis vaßih eß o vavaasis koman pe Tamön vëh to vanö voh a maß neoß, köß nö maß manih po oeh vëh.

25 Ko poen nöß to teß avoeß me e noß peöm, paröß sosoe ka noß neöm a ma tah poë varih. 26 Ivëhkëk a Teß Vavaßaus Teß vëh a Tuvuh Vasioß ne Tamön se vanö amot maß pa ëhnaneoß, keß vavaasis a neöm a ma moeh tah kurus. Pareß kunkuin a ma kokoman peöm, köm nat hah a ma taneah nöß to vavaasis voh a noß neöm.

27 Eöß se këh ka neöm a taateß teß vakamöß, me o kokoman tö. Ka taateß kamöß peöß nöß se këh ka neöm. Ka taateß vakamöß pamëh nöß to hikta heß va ka neöm manih pa ö no a napan va po oeh to heß va i ro upöm teß pa taateß pamëh. Ivëh, köß iu noß a ö söm koe a tamak, paröm koe a naöp suk a tah pamëh se tavus maß. 28 Eöm to pënton voh em peöß to soe keoß peöm pan, ‘Eöß se nö eoß manuh pa vöön va kin, paröß hah eoß maß manih peöm.’ Eöm se keh iu rakah e nem peöß, eöm se haraß vaeö rakah suk e nem peöß to hah eoß manuh pe Tamön, suk ataeah, a tasun peß to apuh oah e non pa teß tasun peöß. 29 A ma tah kurus poë varih to meß avoeß e ne pa tavus maß, köß soe vahik ke voh eoß peöm. Suk ataeah, amot nöm se ep in a tah pamëh to tavus, paröm vaman poß.

30 Eöß to hikta se vaato varë hah me a noß neöm, suk ataeah, a teß to matop non sih o oeh vëh to nö en maß. Eß to hikta teß me non to kikis to nok ta pah tah manih peöß. Ivëhkëk, eöß se vaonöt keah keß nok en pataeah neß to kehkeh nok non. 31 Ivëhkëk, eöß se nok vavih eoß pa ma tah ne Tamön to taß a neoß a nok. Ivëh, ka napan va po oeh vëh se nat va ne manih pan, eöß to iu rakah e noß pe Tamön.”

Ke Ieesuß tooto avoeß e non, pareß soe pan, “Maß poß öm ka këh a muhin vëh.”

Copyright information for `TPZ