bSng 118:26

Luke 13

A Teß To Hikta Panih A Taateß Peß, Eß Se Ro En

Manih po poen pamëh no a ma pah teß to teß ne, pare vavatët e Ieesuß a ö ne Paëlat
E Paëlat voh a teß susun manih pa muhin va Jiutiaß.
to heß voh o soe vaonöt manih po teß vëvënsun va pa kaman va Room pa ip vamët voh a ma teß va Galiliß, ee he ësës heß ne na manuh pe Sosoenën.
Ke Ieesuß piun a soe pee, pareß soe pan, “Eöm to koman nem pan, a ma teß va Galiliß varih to nok vahat oah rakah pa ma upöm pee, ha? Ahik rakah! Eß kuru a tah vaßih a pusun in a punis pee, ha? Ahik rakah! Ivëhkëk, eöm se keh hikta panih a ma taateß hat peöm, eöm se ro rakah pet va kov em nën. Ka 18 teß varih no a iuun rë va Siroam to ip vamët voh raoe. Eöm to koman nem pan, a hat pee to teß oah e non pa ma teß hat po teß varih to teß ne Jerusalëm, ha? Eöß to soe vaman rakah ka neöm, ahik rakah! Ivëhkëk, eöm se keh hikta panih a ma taateß hat peöm, eöm se ro pet va kov em nën.”

A Soe Vapipinoß Va Po Naon To Hikta Vovoaß Non

Ke Ieesuß soe ken pee pa pah soe vapipinoß pan, “A pah teß to nep o naon vëh o fik koman a rak voaën peß, vasuksuk neß to nö maß pa ep këh ta ma voaß fik to ëën. Ivëhkëk, ahik. Ivëh, keß soe ke a teß vëh to matop non pa rak pan, ‘Ep ah, po kukön kirismas rakah neöß to nönö noß maß sih pa ep këh ta ma voaß fik to ëën, ivëhkëk, ahik. Ivëh, kën se taka eöm po naon vëh. Suk ataeah, o naon pamëh to ënëën vahik akuk e non po mona va po oeh.’ Ka teß vëh to matop non pa rak, piun a soe peß, pareß soe pan, ‘Apuh, eën se koe ko anoeh voh nom, keß teß voh o siß pöh kirismas vëh. Eöß se een o oeh vëh po pusun o naon, paröß vahoß na a ma tairo purmakaöß. O naon se pöß voaß en po kirismas vöh. Keß se keh hikta voaß, a, kën taka poß eom peß.’”

O Pöh Poen Apaapo Ne Ieesuß To Vavih A Pah Köövo

10 O pöh Poen Apaapo ne Ieesuß to vavaasis non a ma napan koman a iuun hinhin soneß. 11 A pah köövo to teß non no a oraß hat to teß non peß. A oraß hat pamëh to heß voh non e köövo a mët po 18 kirismas. Ke köövo hikta onöt rakah non a nö vatotoopin, suk ataeah, o soaß topnin tonuneah to vapo voh en, keß nönö vakonoß non. 12 E Ieesuß to ep in poan, pareß vaoe en peß ko soe ke poan pan, “Köövo, eöß to vahik eoß pa mët pën.” 13 Pareß vaket en pe köövo, ka varuß vakomanih e köövo to sun vötpin en. Ke köövo taneo en pa kë rakah a ëhnan e Sosoenën.

14 Ivëhkëk, e susun va pa iuun hinhin soneß to heve en pe Ieesuß, suk a ö neß to vatoß e köövo po Poen Apaapo. Ivëh, ke susun soe ke a ma napan pan, “Eß to teß non o tönim me o pöh poen kikiu, eöm se keh iu nem o teß se vahik a mët peöm, a, eöm se nö maß po komön o nënkikiu. Paröm nat nem nö maß po Poen Apaapo.”

15 Ke Ieesuß piun a soe peß, pareß soe pan. “Eöm ro teß pikpiuk! Po Poen Apaapo ne eöm kurus to nönö nem pa iuun purmakaöß me ro tönkiß pa vakaak raoe pa ruen. Eöm to nonok e nem pa kiu pa ö nöm to nok va nën. 16 Ivëhkëk, e köövo vaßih, eß e köövo va po vuteß pe Abraham. A oraß hat to vaneah voh non poan po 18 kirismas. Vahvanih köß veo këh eah pa mët vaßih to ötöön voh non poan, eß kës to hikta antoen non a vatoß a teß po Poen Apaapo, ha?” 17 E Ieesuß to soe va nën ka ma napan varih to vakihat me ne poë pah poet rakah ee. Ka ma meh teß peo to vaeö pa ma tah vihvih neß to nonok non.

A Soe Vapipinoß To Teß Non Manih Po Voaß Mastat

Matiu 13:31-32, me Mak 4:30-32

18 Ke Ieesuß soe hahah kov en pan, “A Matop Vih pe Sosoenën nöß se vamaaka rakah va in eah nih? 19 Eß to teß va non manih po voaß naon vëh ne ea to popokaß no o mastat. A pah teß to kon o voaß mastat, pareß nep poan pa rak peß. Ko naon pu vaßpuh en, ko növan nö maß, ko nok ee pa ma heß pee manih pa ma peananeah.”

20 Pareß soe hahah kov en pan, “Eöß se vamaaka vah va in a Matop Vih pe Sosoenën nih? 21 Eß to teß va e non manih po is no a köövo to ru manih pa tis praoaß, pareß rih, ko is hovën o praoaß. Ko vasuksuk no o praoaß to peah en maß.”

O Hopaß Soneß

Matiu 7:13-14; 7:21-23

22 E Ieesuß to nö vavah en pa ma vöön apaßpuh me a ma meh vöön, eß to vavaasis vah non a ma napan, pareß iu nö koe non manuh Jerusalëm. 23 Ka pah teß hi poan pan, “Sunön, e Sosoenën se pöß hehe a ma pöh teß, ha?”

Ke Ieesuß soe ke raoe pan,
24 “Eöm se punöß vakis rakah, köm sih ho koe po siß hopaß soneß. Eöß to soe ka neöm a ma napan peo rakah to iu ho e ne, ivëhkëk, eße to hikta antoen ne a ho. 25 Amot ne tövaneah pa iuun se papanih en po hopaß in a iuun, köm se nönö nem maß, ko sun e nem mahën paröm tekteok o hopaß ko soe vamanih pan, ‘Sunön, peret ka nös möm o hopaß.’ Keß se piun maß a neöm, pareß soe pan, ‘Eöß to hikta nat noß peöm, eöm taneß maß pa vöön poanheh?’ 26 Ivëh, köm se soe ke eah pan, ‘Emöm to vavaëën me voh e nem pën, kën sun voh nom hanan pemöm parën vavaasis a no möm.’ 27 Ivëhkëk, eß se soe hah maß pan, ‘Eöß to hikta nat noß peöm, eöm taneß maß pa vöön poanheh? Eöm ro teß nonok a ma taateß hat, eöm se nö ke këh a na neoß.’

28 Köm se ep e Abraham, Aësak, me Jekop, me a ma teß vanënën soe kurus varih to teß hop ne pa Matop Vih pe Sosoenën. Ivëhkëk, eöm se nö paröm teß nem maß mahën. Eöm se pah okook suntan rakah e nem, paröm vakuskus rivon nem po kamis o apuh rakah. 29 Ka ma napan se taneß maß manuh pa ö no potan to pepeah taneß no maß, me manuh pa ö no potan to kukunah koe non, me manuh pasun muhin me manuh kusin a muhin. Kee se ihoß ne, pare ënëën vaßpeh e ne manih pa Matop Vih pe Sosoenën. 30 A, ka ma meh teß varih to suksuk ne, eße se vovoh ee. Ka ma teß varih to vovoh ne kuru, eße se vasuksuk rakah varuß ee maß.”

E Ieesuß To Ook A Vöön Jerusalëm

Matiu 23:37-39

31 Manih po poen avoeß pamëh no a ma Parësiß to nö maß, pare soe ke Ieesuß pan, “Eën se këh a vöön vëh, parën nö pa meh vöön, a teß sunön vëh e Hëërot to iu ip vamët e non pën.”

32 Ke Ieesuß soe ke raoe pan, “Eöm se nö, paröm soe ke a teß vavakëën vëh e Hëërot pan, ‘Kuru me sinup eöß se veo tavus a ma oraß hat, paröß vavatoß a ma teß to haraß ne a mët. Ko vakön poen ne eöß se vahik a ma kiu peöß.’ 33 Ivëhkëk, kuru me sinup me a teß sinup oah voh, eöß se nönö e noß, suk ataeah, eß to hikta teß vih non pa ip vamët a pah teß vanënën soe pa meh vöön. Ahik. Eße se ip vamët varoe poë manuh Jerusalëm.

34 Jerusalëm, Jerusalëm, eöm a ma nap susunön to töstösvös nem sih a ma teß vanënën soe ne Sosoenën to vanö nös manih peöm. A ma poen peo neöß to iu ununun noß sih a ma koaß pën, vamanih pa ö ne toaß sin to ununun va non sih a ma soneß peß manih pa paan a paknaneah. Ivëhkëk, eöm to hikta iu nem. 35 Pënton öm. E Sosoenën to këh voh en pa vöön peöm me a Iuun Hinhin Apuh peöm. Eöß to soe ka neöm, eöm se hikta ep ka neöß, keß onöt rakah o poen nöm se soe pan,

‘Ea se kë a ëhnan a teß apuh vëh to taneß maß manuh pe Sosoenën.’” b 
Copyright information for `TPZ