aEks 20:12-16, me Lo 5:16-20

Luke 18

A Soe Vapipinoß Va Pe Köövo To Vaoe A Tökiiki Vahutët Pa Vaßaus Poan

Ke Ieesuß heß a pah soe vapipinoß manih pee, marën a vavaasis raoe pan, eße se teß ne pa taateß hin manuh pe Sosoenën pa ma poen kurus, pare koe a karauh. E Ieesuß to heß a soe vapipinoß va pa taateß hin vamanih pan, “Manih pa pah vöön apuh a pah tökiiki vahutët to teß non. Eß to hikta nanaöp non sih e Sosoenën, ko hikta koman non sih o upöm teß. Ka pah köövo mahu teß non pa vöön apuh pamëh. Pa ma tamoaan ne köövo to nönö non sih pa teß pamëh, pareß sosoe ke non sih poan pan, ‘A teß vëh to vakihat me a neoß, eß to iu miröß e non peöß, eën se vaßaus a neoß manih po vahutët.’ Moaan voh neß to hikta iu vaßaus voh non e köövo, ivëhkëk, vasuksuk neß to koman vamanih pan, ‘Eöß to hikta naöp noß e Sosoenën, paröß hikta koman vörep noß a ma napan. Ivëhkëk, e köövo mahu vëh to pah vëhvaß e non peöß pa nö vatëh maß. Rakah ah, köß vaßaus momoaan eoß peß manih po vahutët. Eß tomeß vatëh sionin pa nö vatëh maß manih peöß.’”

Ke Ieesuß soe pan, “Eöm to pënton em pa soe pa tökiiki vahutët vëh no a taateß peß to hikta teß totoopin non. Keß teß vah va poß non nih? A ma napan ne Sosoenën to vateß voh a ma teß peß, ee to hinhin ne sih e Sosoenën o vaßaus pa potan me pa popoen. E Sosoenën to hikta se vaßaus pöß non raoe po vahutët, ha? Ivëh, keß anoeh non sih pa vaßaus raoe. Eöß to soe ka neöm, e Sosoenën se vaßaus vëvëhöß rakah en pee. Ivëhkëk, amot ne eöß e Koaß Teß Pa Napan Kurus se nö maß manih po poen pamëh, eöß se nö maß pa ep pa napan varih po oeh pan, ee to vaman rakah e ne, keß ahik?”

A Soe Vapipinoß Va Pe Parësiß Me A Teß Kokon Takis

E Ieesuß to heß me a soe vapipinoß vëh manih pa napan varih to vaman hah a ne pan, eße ra nap totoopin rakah, ko upöm teß to paraß hat. Ivëh, ne Ieesuß to heß suk a soe vapipinoß vaßih. 10 Eß to soe pan, “A poa teß to nö pa hin koman a Iuun Hinhin Apuh! A paeh a Parësiß, ka meh a teß kokon takis. 11 Ka Parësiß pamëh sun, ka manih po kokoman peß eß to hinhin va non manih pan, ‘Sosoenën, eöß a teß vih totoopin rakah, to hikta teß va noß manih po upöm teß, ivëh, köß soe vavihvih ka nös oah. Eöß a teß hikta kakaveo, nonok taateß hat, me mimiröß vaen. Me eöß hikta teß va noß manih pa teß kokon takis vöh. 12 Manih komön a ma nënkikiu kurus eöß to vapenpen noß sih pa taëën po pöök poen. Ka ma tah kurus nöß to vaneah noß, eöß to kökök noß sih a paeh va pa havun tah, paröß heßheß noß nös oah a paeh.’

13 Ivëhkëk, a teß kokon takis to sun varo varuß e non maß, pareß hikta iu ta peah no na manuh kin. Ahik. Eß to tös a poeneah to vataare non pan, eß to teß non a hat neß to nok voh. Pareß hinhin non e Sosoenën se ururuan varenan poan ko ihan anoe këh poan a ma hat peß.

14 Eöß to soe ka neöm, a teß kokon takis varoe, ne Sosoenën to pokaß non poan a teß totoopin rakah, keß hah en pa iuun peß. Ivëhkëk, a meh teß ahik rakah. A hat peß to teß avoeß e non. Eöß se soe ka neöm, a teß to kë koman hah a non e Sosoenën se vöknah rakah en peß. Ka teß to vöknah koman hah a non, e Sosoenën se kë poan.”

E Ieesuß To Tapui A Ma Koaß Sosoneß

Matiu 19:13-15, me Mak 10:13-16

15 Ka napan meeme ee maß pa ma koaß sosoneß manih pe Ieesuß, pan e Ieesuß se vaket, ko tapui raoe. Ivëhkëk, o vamomhë peß to ep a tah vaßih, pare siröß ee pa napan poë varih. 16 Ivëhkëk, e Ieesuß to vaoe huk en na pa ma koaß manih peß, pareß soe pan, “Eöm se koe a amun o koaß, kee nö maß manih peöß. Suk ataeah, a Matop Vih pe Sosoenën to teß suk non o teß to teß va ne manih po siß koaß varih. 17 Eöß to soe vamaman rakah ka neöm, a teß to hikta kon a Matop Vih pe Sosoenën vamanih pa siß koaß soneß, eß to hikta onöt rakah non a hop.”

A Teß Sunön To Teß Me Non A Ma Tah Peo

Matiu 19:16-30, me Mak 10:17-31

18 Ka pah teß sunön po Jiuß hi e Ieesuß pan, “Apuh vih, eöß se nok ataeah, paröß kon o toßtoß tamoaan?”

19 Ke Ieesuß soe ke poan pan, “Suk ataeah, kën pokaß a neoß a vih? Ahikta pah teß vih. E Sosoenën varoe a paeh a vih. 20 Eën to nat voh eom pa ma taateß ne Sosoenën to heß voh e Mosës,

“Koe a nok a taateß rëhrëh,
koe a ip va mët a meh teß,
koe a kaveo,
koe a piuk a meh teß pën manih po vahutët,
parën ta nom e tamömah pen e sinömah.” a 
21 Ka teß susun pamëh soe ke Ieesuß pan, “Taneo no maß po poen ne eöß to teß voh noß a koaß, ko öök non kuru, eöß to vavatet voh e noß pa ma taateß kurus varih.”

22 Ke Ieesuß pënton a soe vaßih, pareß soe ke poan pan, “Eën to kökööt avoeß nom a pah tah. Eën se vavoen a ma tah pën, parën heß a moniß manih pa nap arus. Kën se teß nom a ma tah kokoek manuh pa vöön va kin. Parën vatet poß maß neoß.” 23 Ivëhkëk, a teß susun pamëh to pënton a soe vaßih, ko pah tamak rakah en. Suk ataeah, eß a teß öt ö rakah.

24 E Ieesuß to ep in poan to haraß vatamak non, pareß soe pan, “Eß to paraß hivaß rakah po teß öt ö pa hop manih pa Matop Vih pe Sosoenën. 25 Eß to teß tö rakah ke non pa këmol pa hop koe manih pa töhkoß in a ni kunkun. Ivëhkëk, eß to hivaß oah rakah e non pa teß öt ö to kehkeh hop non manih pa Matop Vih pe Sosoenën.”

26 A ma napan to pënton a tah vaßih, pare soe pan, “Eß se keh teß va non nën, keteh se poß kon o toßtoß tamoaan?”

27 Ke Ieesuß piun raoe, ko soe pan, “A ma tah varih no a napan to hikta onöt ne a nok, e Sosoenën to onöt e non pa nok.”

28 Ke Pitaß soe pan, “Ep ah! Emöm to këh voh maß a ma iuun pemöm, ko vatet maß oah.”

29 Ke Ieesuß soe ke raoe pan, “Eöß to soe vaman rakah ka neöm. A ma napan kurus to koman voh ne a Matop Vih pe Sosoenën, pare këh maß a ma iuun pee, köövo, me a ma koaß, kea pee, taman me sinëëre. 30 E Sosoenën se piun oah pet ke raoe a ma teß tah, nee to öt ne kuru, me o poen se tavus amot maß, neß se heß raoe o toßtoß tamoaan.”

E Ieesuß To Vakön Soe A Ö Neß Se Mët, Pareß Sun Hah

Matiu 20:17-19, me Mak 10:32-34

31 Ke Ieesuß me ke a havun me a poa vamomhë peß, pareß soe ke raoe pan, “Ea se nö manuh Jerusalëm. Ka ma soe varih no o teß vanënën soe pe Sosoenën to kiun suk voh a neoß e Koaß Teß Pa Napan Kurus se tavus vaman en.

32 Ee se heß a neoß pa koreera napan to hikta teß ne pan ee ro Jiuß, ee se kö a neoß, ko nok vahat a neoß, me ee se teteo a neoß. 33 Ee se rëp a neoß, pare ip vamët a neoß. Ivëhkëk, o vakön poen eöß se sun taneß hah eoß maß po vapeepe.”

34 Ivëhkëk, a ma vamomhë peß to hikta maaka vavih ne pa pusun in a soe vakoaan, me ee to hikta maaka ne pa tah neß to sosoe ke non raoe.

E Ieesuß To Vatoß Hah A Teß Kehoß

Matiu 20:29-34, me Mak 10:46-52

35 E Ieesuß to vos vatet en manuh Jerikoß, ka pah teß kehoß to ihoß non sinten hanan, pareß hinhin moniß non a ma napan. 36 Eß to tënan a napan o pöh peo rakah to oßoah nö nee, pareß hi a ma meh teß pan, “Ee nonok ne ataeah?” 37 Kee soe ke poë pan, “E Ieesuß va Nasarët to nönö nö no maß.”

38 A, keß pah kokoeß suntan en pan, “Ieesuß Koaß supnaiß pe Devit, ururuan a neoß ah.”

39 Ka napan varih po vovoh siröß poë, pare soe pan, “Vatotomin ah.” Ivëhkëk, eß to kokoeß vakis oah en, pareß soe pan, “Koaß supnaiß pe Devit, ururuan a neoß ah.”

40 Ke Ieesuß nö maß pareß sun en ko soe ke raoe pan, “Me maß öm eah manih peöß.” Ka teß kehoß huk vatët en maß, ke Ieesuß hi poan pan, 41 “Eën iu nom ataeah ne eöß se nok manih pën?”

Keß piun, pareß soe pan, “Apuh, eöß to iu opoep hah noß.”

42 Ke Ieesuß soe ke poan pan, “A matömah se opoep hah en. O vaman pën to vatoß hah en pën.” 43 Ivëh, ka varuß rakah vakomanih no a mataneah to takap hah en, keß ep vavih hah en, ko vatet en pe Ieesuß, kee pet nö ee. Keß kë ko vavihvih rakah en pa ëhnan e Sosoenën. Ka napan ep a tah pamëh to tavus, pare pët kë ee pa ëhnan e Sosoenën.

Copyright information for `TPZ