Mark 16

E Ieesuß To Sun Taneß Hah Po Vapeepe Nee To Top Voh Pa Vös

Matiu 28:1-8, me Luk 24:1-12, me Jon 20:1-10

O Poen Apaapo to oah en, ke Mariaß va Makdalaß, me a Mariaß e sinan e Jëmis, ke Salomeß to teß maß a ma vanom o voavuh vih marën a uh a sionin e Ieesuß. Pa pöstakah rakah po poen vamomoaan in o nënkikiu, nee to nö ee manuh po vapeepe to teß non pa top vös. O poen nee to nönö nö ne manuh hanan, ee vaiihi nö e ne pan, “Eteh rakah ivëh se vahuk ka ra a vös apuh vëh to sunpip non o hopaß oho koe vëh pa top vös?” Kee ep peah na, pare ep vahik ee na pa vös to vahuk këh en po hopaß in o vapeepe. Ee to hop ee manuh po vapeepe, pare ep in a pah teß sekaß to ihoß non pa papmatö. Eß to ohop non o ohop kakaare o pöh rë vörep, pare pah töhkak vahat ee. Ka teß sekaß pamëh soe ke raoe pan, “Koe öm a töhkak vahat, eöß to nat e noß peöm to nö maß pa ep e Ieesuß va Nasarët vëh nee to ni voh poë manih pa kuruse. Eß to hikta teß non manih, eß to toß en, ko sun hah voh en, ivaßih a ö nee to vahoß voh poë. Varuß rakah vakomanih nöm se nö, paröm soe vanat a ma vamomhë peß, paröm soe pet me ke Pitaß pan, e Ieesuß to vovoh ken peöm manuh Galiliß, eß to teß non nën se röm nö paröm ep in eah nën. Vamanih pa ö neß to soe vavoh ka neöm.” Ka kukön köövo tavus taneß hah maß manuh po vapeepe, pare vaveo taneß maß nën, suk ataeah, ee to pah naöp suntan ee, pare rikrik e ne, ko hikta vaato me ta meh teß.

E Ieesuß To Tavus E Mariaß Va Makdalaß

Matiu 28:9-10, me Jon 20:11-18

Pa pöstakah rakah po poen Apaapo ne Ieesuß to sun taneß hah po vapeepe, pareß tavus momoaan e Mariaß va Makdalaß. E köövo pamëh ne Ieesuß to veo taneß voh a tönim me a poa oraß hat manih peß. 10 E Mariaß to nö en, pareß soe vanat en po teß varih to nönö vaßpeh vah me voh ne e Ieesuß. O teß poë varih to vaokook ne, pare tatamak ne e Ieesuß to mët. 11 E Mariaß to soe ke rapoë pan, “E Ieesuß to toß hah en, köß ep eoß maß peß. Paröß vaato me eoß peß.” Ivëhkëk, ee to pënton a soe vaßih, pare hikta vaman ne a soe pe Mariaß.

A Poa Vamomhë To Ep In Ieesuß Manih Hanan

Luk 24:13-35

12 Vasuksuk no a poa vamomhë to këh maß a Jerusalëm, pare nönö nö ne maß hanan, ke Ieesuß panih ko matan ke e non, pareß nö maß ko tavus en pee. 13 Ka poa vamomhë poë varih hah ee, pare sosoe ke ne a ma upöm vamomhë pe Ieesuß, ivëhkëk, ee to hikta vaman a soe pee pon.

E Ieesuß To Heß O Vamomhë Peß A Kiu Nee Se Nok

Matiu 28:16-20, me Luk 24:36-49, me Jon 20:19-23

14 Vasuksuk in a ö ne Ieesuß to sun taneß hah po vapeepe, neß to nö ko tavus hah en pa havun me a pah vamomhë peß, po poen nee to ënëën nee. Pareß pah siröß suntan en pee, suk ee to hikta teß me ne o vaman, me a ö nee to hikta vaman o teß varih to ep in poë to toß hah. 15 E Ieesuß to soe ke rapoë pan, “Eöm se nö manuh pa ma ö kurus manih po oeh ovoes vëh, paröm vavaasis a Soe Vih peöß manih pa ma napan kurus. 16 Ere tereh se vaman, köm pupui raoe, e Sosoenën se kon hah en pee. Ivëhkëk, ere tereh se keh hikta teß me ne o vaman, ee se sun ee po vahutët apuh pe Sosoenën. 17 E Sosoenën se heß en po kikis manih po teß varih to vaman a no neoß, kee nok ee pa ma vu tah vatoksean. Pare veo tavus ee po oraß hat manih pa ëhnaneoß, ko vaato ee pa ma vu to voon varih to hikta teß ne pan a ma to koman pee. 18 Ee se keh öt ro ee pa kuruß ënëën vamët teß pa koreere, pare kaak ro ee pa ta ëtoß vamëtmët, a ma tah poë varih to hikta onöt nee a miröß raoe. Me ee se keh vahoß a ma koreere manih po teß varih to haraß ne a ma vu mët, a ma mët pee se hik ee, kee haraß vavih hah ee.”

E Sosoenën To Me Hah En Pe Ieesuß Manuh Pa Vöön Va Kin

Luk 24:15-53, me Aposol 1:9-11

19 E Sunön pea e Ieesuß Kristo to vatvus vahik ken pa ma vamomhë peß pa ma soe, ke Sosoenën me peah hah en peß manuh pa vöön va kin, keß ihoß e non pa papmatö pe Sosoenën. 20 Ko vamomhë peß tavus taneß manih Jerusalëm, pare nö ee pa vavaasis a Soe Vih manih pa napan kurus va po oeh vëh. E Sunön to kiu vaßpeh me non raoe, kee nok a ma tah vatoksean marën a vataare a ma napan, pan a Soe Vih to teß man e non.

Copyright information for `TPZ