aAis 6:9-10

Mark 4

A Soe Vapipinoß Va Pa Teß To Poßpoß A Kon Manih Pa Koman A Rak Peß

Matiu 13:1-9, me Luk 8:4-8

E Ieesuß to taneo hah en pa vavaasis a ma napan manih sinten a tonon va Galiliß. Ka napan o pöh peo to tönun pa havin e Ieesuß. Ivëh, keß peah en po paröß, pareß ihoß non, ko paröß atan non pa tonon, ka napan teß ne manih sinten tonon. Keß vavaasis e non pee pa ma tah peo manih koman a ma soe vapipinoß, pareß soe ke raoe pan, “Pënton öm, a pah teß poßpoß kon to nö pa rak peß, pareß poßpoß a kon peß. A teß pamëh to poßpoß nö non a kon, ka ma meh voaß kon vuß ee manih po vaßpet taan, ko növan nö maß, ko ëën vahik ee pee. Ka ma meh voaß vuß ee manih pa moeh vösvös. Ka ma voaß kon pisiß vëvëhöß ee maß, peß o oeh to hikta teß ru non, ivëh, nee to pisiß ohoß suk maß. Ivëh, ka potan peah maß, pareß pa varak hah en pee, suk ee to hikta teß aan vakis ne. Ka ma meh voaß kon vuß manih po topnin o noß uris toßtoß, ka uris toßtoß pu maß, ko kopös en pee, kee hikta voaß. Ka ma meh voaß kon vuß ee manih po oeh vih, pare pu vavih ee maß, ko voaß vavih ee, ka ma meh vu kon voaß ee po 30 voaß, ka ma meh vu kon voaß ee po 60 voaß, ka ma meh vun voaß ee po 100 voaß.” Ke Ieesuß soe ke rapoë pan, “Eöm o teß varih to teß me nem a ma tenëneöm, eöm se pënton a soe vaßih.”

A Pusun In A Ma Soe Vapipinoß

Matiu 13:10-17, me Luk 8:9-10

10 E Ieesuß to teß non pehen, ko teß varih to tënan voh ne sih a ma soe peß to nö vaßpeh me ee maß pa havun me a poa vamomhë peß. Pare soe ke poë pan eß se vamaaka rapoë pa pusun in a soe vapipinoß pamëh. 11 Ke Ieesuß piun raoe, pareß soe ke rapoë pan, “E Sosoenën to vataare voh en peöm pa pusun in a soe vakoaan va pa Matop Vih Peß. Ivëhkëk, a napan varih to teß tavus ne to pënton koe varoe ko ne sih a soe manih pa soe vapipinoß. Eß to vapuh e non, pa ö no a teß vanënën soe vëh e Aisaëaß to soe suk voh pan,

12 ‘Ee se epep ne ko sih epep vatëh va kov e ne manih,
ivëhkëk, ee hikta se nat i ne ta pah tah,
ee se tëtënan ne ko sih tëtënan vatëh va kov e ne manih,
ivëhkëk, ee hikta se maaka i ne a pusun in a soe pamëh.
Ee se keh maaka i ne a pusun in a soe pamëh,
ee se tarih ke na manuh pe Sosoenën, ke Sosoenën se ihan anoe en pa ma hat pee.’” a 

A Pusun In A Soe Vapipinoß Va Pa Teß To Poßpoß A Kon

Matiu 13:18-23, me Luk 8:11-15

13 Ke Ieesuß hi raoe pan, “Eöm hikta nat rakah ko nem pa pusun in a soe vapipinoß vëh, ha? Eöm se poß nat vah va in a pusun a ma meh soe vapipinoß varih nih? Eöm to hikta nat nem, eöß se soe tavus keoß peöm pa pusun in a soe vapipinoß pamëh. 14 A teß vëh to poßpoß o voaß kon, eß to teß va non manih pa ö neß to poßpoß a soe pe Sosoenën manih pa komëëra napan. 15 A soe to vuß manih po vaßpet taan, eß to teß va non manih pa napan to tënan a soe, ko vasuksuk no e susun po oraß hat to vëvëhöß maß, ko kon ke en pa soe vëh ne Sosoenën to poßpoß manih pa komëëre. 16 Ka ma upöm teß to teß va e ne manih pa ma voaß kon to vuß manih po oeh vösvös. Eße to pënton ee pa soe, pare kon vëvëhöß ee, pare vaeö e ne peß. 17 Ivëhkëk, o vaman pee to hikta teß aan vakis non manih pa komëëre. Ko poen no a napan to kehkeh vöknah ne a soe pe Sosoenën, ee to heß ee pee pa punis, ko hinën ee pee, ko vaman pee kuß vëhöß en. 18 Ka ma upöm teß to teß va e ne manih po voaß kon to vuß topnin o noß uris toßtoß. A pap teß poë varih to pënton e ne sih pa soe pe Sosoenën. 19 Ivëhkëk, ee to koman vaviß e ne pa ma moeh tah va po oeh vëh, pare koman vaviß me e ne pa ununun vörep a moniß, ko teß e ne pa manin pet na a ma meh tah. Ka ma tah poë varih kupkup e ne pa soe pe Sosoenën manih pa ma kokoman pee. Ka soe pamëh hikta vovoaß non. 20 Ivëhkëk, a ma meh voaß kon to vuß manih po oeh vih, to teß va e ne manih po teß to pënton a soe pe Sosoenën, pare kon ko ötöön e ne. Ka soe pamëh to voaß pet manih po toßtoß pee. Ka ma paeh to voaß ee po 30 voaß, ka ma meh to voaß ee po 60 voaß, ka ma meh to voaß ee po 100 voaß.”

A Soe Vapipinoß In O Maaka

Luk 8:16-18

21 Ke Ieesuß soe ken pa napan me ra ma vamomhë peß pa meh soe vapipinoß, pareß soe pan, “A napan onöt kës e ne pa teß o ram, pare vahoß hop manih paan o kove, keß manih pa paan a tevan? Ahik, ee se vahan rakah manuh mahën pa ö vavahan ram. 22 A ma tah kurus varih ne ea to kokoaan no, amot ne Sosoenën se vatvus en pee manih pa mahën. Ka ma tah kurus varih to kup ne, amot ne Sosoenën se pureß en, pareß vatvus vateeraß en pee. 23 Pënton öm, a teß to teß me non a tenaneah, eß se pënton a soe peöß, ko inan, pareß kokoman vatotoopin.”

24 Ke Ieesuß soe ken pee pan, “A ma soe varih nöm to pënton nem, ne eöm se kokoman vavih rakah nem. A ma tah varih nöm to heßheß akuk nem sih o upöm teß, eß a ma tah poë varih ne Sosoenën se piun oah hah ken peöm. Pareß vatok pet e na pa ma meh tah manih peöm. 25 A teß se keh kon voh o nat, pareß maaka i non a soe pe Sosoenën, e Sosoenën se heß vaßpuh oah en peß po nat, keß maaka vavih en. Ka teß se keh koaan o nat vëh ne Sosoenën to heß voh poan, e Sosoenën se öt hah këh en peß po nat pamëh.”

A Soe Vapipinoß Va Po Voaß Tah Ënëën Vaßih To Pokoß Maß

26 Ke Ieesuß vavaato avoeß e non, pareß soe pan, “A Matop Vih pe Sosoenën to teß va e non manih pa pah teß to varapök a ma voaß tah ënëën manih po oeh. 27 Ka teß pamëh koroh en pa popoen, ka pöstakah neß to sun, pareß nönö vah non, a ma voaß tah ënëën poë varih he pisiß ee maß. Ivëhkëk, eß to hikta nat non ee pisiß vah va maß nih. 28 O oeh koman to kikiu non, ko vapisiß en pa ma voaß tah ënëën, kee pu maß, pare voaß ee. Vamomoaan no uvineah to tavus, ko vasuksuk no korom to tavus maß, ko vahik ka ö ënëën tavus poß maß. 29 Ko poen no a voaß to manot ee, ke voe pamëh taneo en pa moes a voaß po rapis, suk ataeah, o poen va pa ëën a voaß to öök en.”

A Soe Vapipinoß To Teß Non Manih Po Voaß Mastat

Matiu 13:31-32, me Luk 13:18-19

30 Ke Ieesuß hi haha kov en pee pan, “Ea se vëknöm vah va in a Matop Vih pe Sosoenën nih? A soe vapipinoß taeah to vih non pea se soe pet na marën a vamaaka ro teß? 31 Eß to teß va non manih po voaß naon nee to popokaß ne o mastat, eß o voaß tah to parin a soneß varo rakah, ka teß kon, pareß nep poan manih po oeh. 32 Ivëhkëk, a vu mastat to pupu tamoaan e non maß, pareß tavus en a vu tah apuh oah manih pa koman a rak, pareß teß me non a ma pean apaßpuh, ko növan va kin nö maß, pare ihihoß ne pa ma peananeah.”

E Ieesuß To Vatvus A Soe Manih Pa Soe Vapipinoß

Matiu 13:34-35

33 O poen ne Ieesuß to heßheß voh non sih a ma soe peß manih pa napan, eß to heßheß koe rakah non sih a ma soe peß manih pa ma soe vapipinoß. Ka ma soe vapipinoß poë varih se teß maaka onöt ne a ö no a napan se maaka ne a soe peß. 34 Eß hikta soe vamaaka ke ra napan ta pah soe. Ahik. Eß to vavatvus vaviß non a ma soe peß pa ma soe vapipinoß. Ko poen no a ma vamomhë peß se keh teß vaßpeh varoe me ne poë, eß to vamaaka ken pee pa pusun in a ma soe vapipinoß poë varih.

E Ieesuß To Taß A Tuvuh Keß Moovi

Matiu 8:23-27, me Luk 8:22-25

35 Manih pa potan avoeß pamëh pa matanpoen, ne Ieesuß to soe ke ra ma vamomhë peß pan, “Ka pahan ee manuh pa pap tonon vöh Galiliß.” 36 Kee këh ee maß pa nap peo, pare peah ee po paröß vëh ne Ieesuß to tok vovoh vu non. Ko vamomhë peah töön ee pe Ieesuß, kee nö vaßpeh ee. Ee to këh ee pa ma meh paröß nee to pët teß vu ne. 37 Ka ivat ip maß, ka supa susurap hop e non maß po komön o paröß, ka siß ö hat ka tahiß puh en po paröß. 38 E Ieesuß to teß non manih po kusin o paröß, pareß koroh non ko vahipös non pa ta vahipös, ka ma vamomhë peß kunkuin poë, pare soe pan, “Apuh, eën hikta koman a rora noman ah? A siß ö hat poß toh, ko paröß rokoß me en pea.” 39 Ke Ieesuß sun, pareß taß a tuvuh me a supa pan, “Moovi öm!” Kee moovi ee. 40 Ke Ieesuß soe ke ra ma vamomhë peß pan, “Suk ataeah, köm nanaöp nem, eöm to hikta teß avoeß me nem to vaman manih peöß, ha?” 41 Kee pah töhkak vahat ee, pare vaiihi koman e ne pan, “A teß rakah vëh eß eteh? Ka tuvuh me a supa tënan rakah ee pa soe peß?”

Copyright information for `TPZ