aAis 6:9-10
cSng 78:2

Matthew 13

A Soe Vapipinoß Va Pa Teß To Poßpoß A Kon Manih Pa Koman A Rak Peß

Mak 4:1-9, me Luk 8:4-8

Manih pa potan avoeß pamëh ne Ieesuß to këh tavus en maß pa iuun neß to teß non, pareß nö ko ihoß en sinten a tonon ko vavaasis en pa napan. Ka napan o pöh peo to tönun maß pa havineah. Ivëh, keß peah en po paröß, pareß ihoß non nën. Ka napan teß ne sinten tonon. Ke Ieesuß vahoß a ma tah peo pa soe peß manih pa soe vapipinoß, marën a vavaasis a napan. Eß to soe ke rapoë pan, “A teß poßpoß kon to nö pa rak peß, pareß poßpoß a kon peß. Eß to poßpoß nö non a kon, ka ma meh voaß kon vuß ee manih po vaßpet taan, ko növan nö maß, pare ëën vahik ee pee. Ka ma upöm voaß vuß ee manih pa moeh vösvös, pare pisiß vëvëhöß ee maß, suk ataeah, o oeh to hikta teß ru non, ivëh, nee to pisiß ohoß suk maß. Ivëhkëk, a potan to peah maß, pareß pa varak hah en pee, suk ee to hikta teß aan vakis ne. Ka ma upöm voaß kon vuß ee manih po komön o noß uris toßtoß, ko uris toßtoß pu maß, ko kopös en pee, kee hikta pu vavih maß. Ivëhkëk, a ma upöm voaß kon to vuß manih po oeh vih, pare pu vavih ee maß. Pare voaß vavih ee, ka ma upöm vu kon voaß ee po 30 voaß, ka ma meh vu kon voaß ee po 60 voaß, ka ma meh vun voaß ee po 100 voaß. A teß to teß me non a tenaneah se pënton a soe peöß.”

Suk Ataeah Ne Ieesuß To Vahoß Vakis Non A Soe Peß Pa Soe Vapipinoß

Mak 4:10-12, me Luk 8:9-10

10 Ka ma vamomhë nö ee maß manih pe Ieesuß, pare hi poë pan, “Eën vavaasis tamoaan suk nom sih a napan ataeah a ma soe pën manih pa soe vapipinoß?”

11 Ke Ieesuß piun a hi pa ma vamomhë peß, pareß soe ke rapoë pan, “E Sosoenën to vaonöt voh ken peöm pa nat a pusun in a soe vakoaan va pa Matop Vih va pa Vöön va Kin. Ivëhkëk, o upöm teß to hikta onöt ne a nat vavih pa pusun in a soe vakoaan pamëh. 12 Ta pah teß se keh kon voh o nat, pareß maaka i non a soe pe Sosoenën, e Sosoenën se heß vaßpuh oah en peß po nat, keß maaka vavih en. Ivëhkëk, a teß se keh koaan o nat vëh ne Sosoenën to heß voh poan, e Sosoenën se öt hah këh en peß po nat pamëh. A napan se kuteß e ne pataeah nöß to nonok noß, ivëhkëk, ee to hikta antoen ne a ep in ta pah tah. Pare tënan e ne pa ma soe nöß to vavatvus noß, ivëhkëk, ee to pënton varo e ne, ko hikta nat vavih ne, pare hikta maaka i ne a pusun in a ma soe poë varih. Eß akuk kuru a pusun in a ö nöß to vavatvus suk ke noß a napan a ma soe peöß manih pa soe vapipinoß. 14 Ivëh, kee ep ee pataeah no a teß vanënën soe vëh e Aisaëaß to sosoe suk voh non to tavus man en, eß to soe voh pan,

“Eöm se tënan em pa soe,
ivëhkëk, eöm to hikta onöt nem a nat in a pusuneah,
paröm kuteß e nem,
ko kuteß kov e nem
ivëhkëk, eöm to hikta onöt nem a inan ta pah tah.
15 Suk ataeah, a ma kokoman pee to nun,
kee papanih a ma tenëëre,
pare makus e ne.
Suk, ee tomeß nat in a tah nee to ep in pa ma matëëre,
ko tënan a soe pa ma tenëëre.
Ee to koman ne pan ee tomeß nat a pusun in a soe pamëh,
ko tapiun hah ke maß manih peöß,
köß vatoß hah raoe.” a 
16 E Ieesuß to vavaato avoeß me e non pa ma vamomhë peß, pareß soe pan, “Vaeö rakah peöm o teß varih to ep in a ma tah nöß to nonok noß pa matëëneöm, paröm nat vamaaka a soe nöm to tënan pa tenëneöm. 17 Eöß to soe vaman rakah keoß peöm. O teß vanënën soe o peo rakah, me ra nap totoopin, ee to iu ep voh ne a ma tah nöm to ep in kuru. Ivëhkëk, ee to hikta ep voh. Pare iu tënan rakah ne a soe pamëh. Ivëhkëk, ee to hikta tënan voh a soe pamëh.”

A Pusun In A Soe Vapipinoß Va Pa Teß To Poßpoß A Kon

Mak 4:13-20, me Luk 8:11-15

18 E Ieesuß to vavaato avoeß me e non pa ma vamomhë peß, pareß soe pan, “Varuß vakomanih söm pënton vavih pa pusun in a soe vapipinoß va pa teß vëh to poßpoß a kon manih pa rak peß. 19 A ma voaß kon varih to vuß manih po vaßpet taan to teß va ne manih po teß varih to tënan ee pa soe va pa Matop Vih pe Sosoenën, ivëhkëk, ee to hikta maaka vavih ne pa pusun in a soe pamëh. Ke susun po oraß hat nö maß, pareß kon ke en pa soe vih vëh ne Sosoenën to poßpoß manih pa koman a teß pamëh. 20 Ka ma teß voaß kon varih to vuß manih pa moeh vösvös, ee to teß va ne manih pa teß to pënton en pa soe, pareß kon vëvëhöß rakah en peß, pareß vaeö e non peß. 21 Ivëhkëk, o vaman to hikta aan vakis manih pa komaneah. Ko poen no a napan to kehkeh vöknah ne a soe pe Sosoenën, ee to heß ee peß pa punis, ko hinën ee peß, ko vaman peß kuß vëhöß en. 22 Ka ma voaß kon varih to vuß manih po komön o noß uris toßtoß teß vah vapoß ne nih? Ee to teß va ne manih po teß to pënton ee pa soe, ivëhkëk, o kokoman pee to puh suk rakah non a ma tah peo va po oeh vëh. Pare koman vaviß me e ne pa ununun vapeo a moniß. Eß a ma kokoman poë varih to kopös rakah ee pa soe pe Sosoenën. Ka soe pamëh hikta vovoaß non. 23 Ka ma teß voaß kon varih to vuß manih po oeh vih, to teß va e ne manih po teß to pënton ee pa soe, pare nat vavih ee pa pusuneah. Ka soe pe Sosoenën vuß manih po kokoman pa teß, pareß voaß pet en manih po toßtoß peß. Ka ma paeh to voaß ee po 100 voaß, ka ma meh to voaß ee po 60 voaß, ka ma meh to voaß ee po 30 voaß.”

A Soe Vapipinoß Va Po Meon Hat To Pu Maß Manih Pa Koman A Rak

24 E Ieesuß to vavaato avoeß e non, pareß soe pan, “A Matop Vih va pa Vöön va Kin to teß va e non manih pa teß to poßpoß a ma voaß kon manih pa koman a rak peß. 25 Ivëhkëk, pa popoen no a napan to koroh vahik ee, ka teß vëh to hat ov e non poan nö maß, pareß varapök pet en po meon hat manih pa koman a kiu kon, pareß hah en. 26 Po vasuksuk no a kon to pisiß ee maß. Pare pu ee ko kehkeh voaß poß ne, ka nap kiu taum ee po meon hat to pisiß en maß manih pa kon. 27 Ka nap kiu nö ee manuh pe tövaneah pa rak, pare soe ke poë pan, ‘Topoan, emöm to koman nem pan eën to poßpoß vaviß voh a kon manih pa rak pën, ivëhkëk, o meon hat tavus taneß poß maß nih?’ 28 Ke tövaneah pa rak soe ke rapoë pan, ‘O teß varih to vakihat me a ne neoß ivarih to varapök po meon hat manih pa rak peöß. Ka nap kiu hi ee pe tövaneah pa rak pan. ‘Eën iu e nom pa ö se möm pö o meon hat vëh pa koman kon pën ëh?’ 29 Ivëhkëk, e tövaneah pa rak to soe ke rapoë pan, ‘Ahik, eöm to meß pöpö nem o meon hat, paröm pö vaßpeh me em pa kon. 30 Eöm se koe a pö o meon, keß pu vaßpeh me en pa kon, keß onöt po poen na se moes a kon. Manih po poen va pa moes a kon, eöß se soe ka nap kiu peöß pan, vamomoaan nee se pö o meon hat, pare nohnoh a ma noh, kee sih vamatop ne pa ës. Ka pah moes poß a kon, para vahoß raoe manih pa iuun vavahoß taëën peöß.”

A Soe Vapipinoß To Teß Non Manih Po Voaß Mastat

Mak 4:30-32, me Luk 13:18-19

31 E Ieesuß to vavaato avoeß me e non pa ma vamomhë peß, pareß soe ke rapoë pan, “A Matop Vih va pa Vöön va Kin to teß va e non manih po voaß naon nee to pokaß ne o mastat
O naon vëh o mastat to matan va non manih po vu Landro.
no a teß to nep pa koman a rak peß.
32 O voaß mastat to hikta teß va non manih pa ma upöm voaß naon. Ahik, eß o siß voaß tah to parin soneß varo, ivëhkëk, eß se keh pu maß, eß to apuh oah en pa ma upöm nöß nepnep, eß se tavus rakah en o nöß apuh, ko növan nö maß, pare nok ee pa ma heß pee manih pa ma peananeah.”

A Soe Vapipinoß Va Po Is

Luk 13:20-21

33 E Ieesuß to vavaato avoeß e non, pareß soe pan, “A Matop Vih va pa Vöön va Kin to teß va e non manih po is no a köövo to ru manih pa tis praoaß, pareß rih ko is hovën o praoaß. Ko vasuksuk no praoaß to peah en maß.”

E Ieesuß To Vavatvus Vaviß Non A Ma Soe Vih Peß Manih Pa Soe Vapipinoß

Mak 4:33-34

34 E Ieesuß to vavatvus vaviß non a ma soe peß manih pa napan pa ma soe vapipinoß, eß to hikta soe vamaaka rakah ke ra napan ta pah soe, ahik, eß to vavatvus vaviß non a ma soe peß manih pa ma soe vapipinoß. 35 Eß a tah pamëh neß to nonok non marën a vapuh a soe no a teß vanënën soe to soe suk voh pan,

“Eöß se vavatvus vaviß ke noß peöm pa ma soe vakoaan peöß manih pa ma soe vapipinoß.
Eöß se hutët a ma tah to vakoaan voh ne penai po poen no oeh to meß voh e non pa tavus,
pareß öök non maß manih kuru.” c 

E Ieesuß To Soe Vatvus A Pusun In O Meon Hat

36 E Ieesuß to këh en pa napan, pareß ho en koman iuun, ka ma vamomhë peß nö me ee peß, pare hi poë pan, “Soe ka möm ah pa pusun in a soe vapipinoß va po meon hat vëh to pokoß manih pa rak.”

37 E Ieesuß to piun a hi pee, pareß soe ke rapoë pan, “A teß vëh to poßpoß a voaß vih manih pa koman a rak, eß eöß, e Koaß Teß pa Napan Kurus. 38 Ka rak, eß o oeh, ka voaß vihvih, eß a napan to teß ne manih pa Matop Vih pe Sosoenën. Ko meon hat, eß a napan to teß ne manih pa papan pe susun po oraß hat. 39 Ka teß vëh to vakihat me non e tövaneah pa kiu kon to poßpoß o meon hat, eß e susun po oraß hat. Ko poen oes a voaß poë varih, eß o poen no oeh vëh se hik. Ko teß kikiu, ee o ankeroß pe Sosoenën.”

40 “Ko meon nee se pö, pare ës po suraß, eß to vataare non a ö ne Sosoenën se nok amot va, po poen no oeh vëh se hik. 41 Eöß e Koaß Teß pa Napan Kurus se vanö maß o ankeroß peöß, kee nö, pare veo tavus o teß varih to taßtaß ne a napan, kee mimiröß ne a ma vaman pee, me o teß varih to nonok vatëh ne a ma taateß hat. Kee tavus këh a Matop Vih va pa Vöön va Kin. 42 O ankeroß se vi e na pee manuh po suraß ësës tamoaan. Manih po suraß pamëh no a napan se okook kov e ne, ko vakuskus rivon me ne po kamis o apuh rakah. 43 Ka nap totoopin se ëman va ee manih pa potan koman a Matop Vih pe Tamëëre. A teß to teß me non a tenaneah se a pënton a soe peöß.”

A Soe Vapipinoß Va Pa Pokis Moniß To Koaan Non Manih Pa Koman A Rak

44 “A Matop Vih va pa Vöön va Kin to teß va e non manih pa pokis moniß no a teß to koaan manih pa koman a rak. Ka meh teß nönö vah non manih pa koman a rak, pareß taum en pa pokis moniß pamëh. Pareß koaan pet en. Eß to pah vaeö suntan rakah en, pareß nö ko vavoen vahik en pa ma moeh tah neß to vaneah non, pareß kon a moniß ko voen en pa rak pamëh.”

A Soe Vapipinoß Va Pa Teß To Voen O Kuri To Parin A Voen Vapeah

45 E Ieesuß to vavaato avoeß e non, pareß soe pet en pan, “A Matop Vih va pa Vöön va Kin to teß va i non manih pa teß öt ö to iu voen non ta ma kuri mamatan vavih. 46 Eß to taum en maß po kuri o pöh voen vapeah rakah, pareß nö ko vavoen vahik rakah en pa ma moeh tah peß. Pareß hah poß ko voen en po kuri pamëh.”

A Soe Vapipinoß Va Pa Kë

47 E Ieesuß to vavaato avoeß e non, pareß soe pan, “A Matop Vih va pa Vöön va Kin to teß va ennon manih pa kë nee to vöknah tahiß, pare vaon a ma vu iian. 48 A kë to puh ka nap tatanaß iian rëh takin ee pa kë sinten tahiß, pare ihoß, ko pitöß ee o iian, a ma teß o vihvih nee to vahoß po kove, ka ma teß o hat nee to vi ee na pee. 49 Eß to ep va i non nën po poen no oeh vëh se hik. O ankeroß pe Sosoenën se nö maß, pare pitöß taneß maß a nap vatösoe manih pa nap tëtënan soe. 50 O ankeroß pe Sosoenën se vi kunah en pa nap vatösoe manih po suraß ësës tamoaan. Manih po suraß pamëh no a nap vatösoe se okook kov e ne, ko vakuskus rivon me e ne po kamis o apuh rakah.”

51 Ke Ieesuß hi en pa ma vamomhë peß pan, “Eöm nat vavih kës e nem pa pusun in a soe vaßih?” Kee soe maß pan, “A, emöm to nat kurus e nem pa ma soe poë varih.” 52 Ke Ieesuß soe ke rapoë pan, “O teß vavaasis varih to nat voh ne o Vavaasis pe Mosës ee to nat vahik voh ee pa pusun in a soe va pa Matop Vih va pa Vöön va Kin. Eß to teß akuk va kov e non manih pe tövaneah pa iuun to ho koman iuun, pareß teß tavus maß a ma tah voon me a ma teß tah vamoaan, pareß heß en po upöm teß. Ivëh, ke eöm a ma vamomhë peöß se nö, paröm vatvus ke ra napan a soe va po ururuan vih pe Sosoenën me a Soe Vih va pa Matop Vih va pa Vöön va Kin.”

A Ta Nasarët To Heß Tonun E Ieesuß

Mak 6:1-6, me Luk 4:16-30

53 E Ieesuß to hutët vahik ke ra napan a ma soe vapipinoß poë varih, pareß këh en pa ö vëh neß to teß non. 54 Eß to hah en pa vöön vëh neß to apuh voh, pareß vavatvus non a soe pe Sosoenën manih pa napan koman a iuun hinhin soneß pee. Ka napan tënan a ma soe peß, pare pah töhkak vahat rakah ee, pare vaiihi koman e ne pan, “A teß vëh kon taneß maß o nat me o kikis vëh nih, marën a nok a ma tah vatoksean? 55 Eß e koaß poß pa teß ekeok toh, ke sinaneah e Mariaß, ka ma kea peß ivarih, e Jëmis, ke Jeosëp, ke Saëmon, ke Jiutas. 56 Ka kën vameneah teß vaßpeh me e ne pea manih, ka teß vëh se poß kon taneß maß o nat me o kikis vëh nih?” 57 Keß ivëh, a tah no a napan va pa vöön peß to heß tonun suk poë. Ivëhkëk, e Ieesuß to soe ke rapoë pan, “A teß vanënën soe no a ma muhin kurus to ta e ne peß. Ivëhkëk, manih pa vöön koman peß, me manih pa kën poaneah, me manih pa tapaiuun koman peß, ee to hikta ta ne poë, pare heß tonun e ne peß.” 58 Ivëh, neß to hikta nok suk voh ta ma tah vatoksean apuh nën. Suk ataeah, a napan to hikta vaman ne poë.

Copyright information for `TPZ