aAis 53:4

Matthew 8

E Ieesuß To Vatoß Hah A Pah Teß, To Teß Me Non A Mët Töpaß

Mak 1:40-45, me Luk 5:12-16

E Ieesuß to kunah taneß maß manuh pa tope, ka nap peo rakah vatet poë. Ka pah teß to teß me non a mët töpaß nö maß manih pe Ieesuß. Pareß vatokon, ko soe ke poan pan, “Sunön, eën se keh iu nom kën vatoß hah eom peöß.” Ke Ieesuß vaket en peß, pareß soe pan, “Eöß to iu e noß. Voon ah.” Ka varuß rakah vakomanih no a mët töpaß to hik këh en pa sionineah. Ke Ieesuß vuhvuh poan pareß soe pan, “Eën se nat nom vavatët ta meh teß a tah vaßih to tanok manih pa sioniumah. Ivëhkëk, eën se nö parën vataare varoe a sioniumah manuh pa teß ësës heß po Jiuß, köm ip ta vönaß paröm ës ke na e Sosoenën vamanih pa ö no Vavaasis pe Mosës to soe vavoh, ka tah pamëh se vataare non a napan a ö no mët pën to hik en, kën voon hah eom.”

E Ieesuß To Vatoß Hah A Teß Kikiu Pe Susun Pa Nap Vëvënsun Va Room

Luk 7:1-10

E Ieesuß to nö en manuh pa vöön va Kapaneam. Ko poen neß to vos nën ka pah teß susun pa 100 teß vëvënsun va Room nö en maß manih peß. Pareß hin poan o vaßaus, ko soe pan, “Sunön a teß kikiu peöß to haraß non a kamis pareß koroh e non maß iuun. Eß to hikta onöt non a riu a sionineah. Me eß to haraß suntan e non po kamis.” Ke Ieesuß soe ken pe susun pa nap vëvënsun pan, “Eöß se nö eoß nös paröß vatoß hah eoß peß.” Ivëhkëk, e susun pa nap vëvënsun to piun a soe pe Ieesuß, pareß soe pan, “Sunön sipoan, eöß to hikta teß vih onöt noß a ö sën nö na pa iuun peöß. Eën se soe varoe ko maß ka teß kikiu peöß toß hah. Suk ataeah, eöß me to teß noß paan in a teß vëh to vovoh ka non eoß pa heß a neoß a kiu. Eöß koman to teß me noß po teß vëvënsun to teß ne paan. Eöß se këh soe ke a teß pamëh, ‘Nö ah,’ keß nö en. Eöß se keh soe ke a teß pan, eß se nö maß, keß se nö en maß. Eöß se keh taß a teß kikiu peöß, ‘Nok a kiu vaßih’, eß se pënton en pa soe peöß. Pareß nok en pa kiu pamëh.” 10 E Ieesuß to pënton a soe vaßih, pareß pah kokoman vörep e non. Pareß soe ke ra napan varih to teß vaßpeh me ne poë pan, “O pöh man rakah, eöß to soe ka neöm, manih pa muhin va Israël eöß to hikta ep noß ta pah teß no vaman peß to eh va non manih pa teß susun pa nap vëvënsun vëh.

11 Eöß to soe vaman rakah keoß peöm, a nap peo rakah to hikta teß ne ro Jiuß se taneß maß manuh pa ö no a potan to pepeah ke non maß. Me manih pa ö no a potan to kukunah koe ke non, ee se nö maß pare ihoß ko vaëën me Abraham, ke Aësak, ke Jekop, manih pa koman a Matop Vih va pa Vöön va Kin. 12 O Jiuß varih to koman vapiun ne pan ee se hop ee pa Matop Vih va pa Vöön va Kin, ivëhkëk, e Sosoenën se vateß en pee pa vöön popoen. Ka manih pa vöön pamëh no a napan se okook kov e ne, ko vakuskus rivon me e ne po kamis o apuh rakah.

13 E Ieesuß to soe ken pe susun pa nap vëvënsun pan, “A teß kikiu pën se toß en, suk eën to vaman nom pan eß se toß hah en.” Ka varuß vakomanih no a teß kikiu to toß en.

E Ieesuß To Vatoß Hah E Noan E Pitaß

Mak 1:29-31, me Luk 4:38-39

14 E Ieesuß to nö en manuh pa iuun pe Pitaß, pareß taum e köövo noan e Pitaß to koroh non. Eß to haraß non a hiinana. 15 E Ieesuß to vaket pa koreneah ka hiinana pamëh hik këh en peß, keß sun ko vamatop ken pe Ieesuß pa taëën.

E Ieesuß To Vavatoß Hah A Ma Nap Peo To Haraß Ne A Ma Vu Mët

Mak 1:32-34, me Luk 4:40-41

16 Pa matan poen no a napan to teßteß kov e ne maß po teß öt po oraß manih pe Ieesuß. Ke Ieesuß taß o oraß, kee këh ee po teß. E Ieesuß to vavahik a ma vu mët varih to öt ne a napan. 17 E Ieesuß to nok a ma tah vatoksean poë varih, marën a vapuh a to to tavus taneß voh manih pa rivon a teß vanënën soe vëh, e Aisaëaß. Eß to soe voh pan,

“Eß to teß a ma kamis pea,
pareß vahik en pa ma vu mët pea.” a 

A Pah Teß To Kehkeh Vatet Non E Ieesuß

Luk 9:57-62

18 Manih Kapaneam e Ieesuß to ep a napan to parin a peo vörep to tönun töön ne poë, pareß soe ke ra ma vamomhë peß pan, “Ea se pahan ee manuh pa pap tonon vöh.” 19 Ivëhkëk, a pah teß vavaasis to nat non o Vavaasis pe Mosës to nö maß manih pe Ieesuß, pareß soe ke poan pan, “Apuh, a ma vöön kurus nën to nönö nom, ne eöß se suk eoß pën.” 20 Ke Ieesuß soe ke poan pan, “O këh poa to teß me ne a ma koveß teßteß pee, ko növan teß me ne pa ma heß teßteß pee. Ivëhkëk, eöß e Koaß Teß pa Napan Kurus to hikta teß me noß ta ö ne eöß se koroh ko vanot.” 21 Ka meh teß, eß e vamomhë koman pe Ieesuß to soe ke poan pan, “Topoan, vaonöt ka neoß ah, köß nö paröß pe voh maß e tamön.” 22 Ivëhkëk, e Ieesuß to piun poan pareß soe pan, “Ahik, suk a maß neoß ah, parën koe o teß varih to hikta kon avoeß ne o toßtoß tamoaan, kee nö, pare pe o upöm teß mët pee.”

E Ieesuß To Soe Ka Tuvuh Keß Tö

Mak 4:36-41, me Luk 8:22-25

23 E Ieesuß to tok po paröß me a ma vamomhë peß, kee nö ee. 24 Ka ivat ip maß, ka supa susurap hop e non manih po komön o paröß. Ivëhkëk, e Ieesuß a koroh varo. 25 Ka ma vamomhë nö, pare kunkuin poë, pare soe pan, “Topoan, Topoan, hehe a ra ah, a siß ö hat, ko paröß rokoß me en pea.” 26 E Ieesuß to piun rapoë pareß soe pan, “Eöm nanaöp suk nem ataeah? Eöm to teß me nem o vaman to parin a soneß.” Ke Ieesuß sun, pareß taß a tuvuh me a supa, ka tuvuh tö en, ka supa hikta ririu hah non. 27 Ka ma vamomhë peß pah töhkak vahat ee, pare soe ee pan, “A teß vëh, eß rakah eteh? Ka tahiß me a tuvuh tënan ee pa soe peß?”

E Ieesuß To Veo Këh A Poa Teß Pa Tuvuh Hat

Mak 5:1-20, me Luk 8:26-37

28 E Ieesuß to pahan pet en manuh pa pap tonon vöh, pareß takin en pa muhin pa napan va Gadaraß. Nën no a poa teß no oraß hat to teß ne manih pee, to nö ee maß pe Ieesuß. A poa teß poë varih to teßteß ne sih po vapeepe. Ee pon to vavaßnaöp ne sih a napan. Ka napan hikta onöt ne a suk a hanan to koe ke non po vapeepe pamëh. 29 Ee pon to nö maß manih pe Ieesuß, pare kokoeß vakis rakah ee maß pan, “Koaß pe Sosoenën, eën se nok ataeah manih pemöm? Eën to nö pöß maß pa vakmis a möm, ha? O poen pën pa vakmis a möm to meß avoeß e non maß.” 30 Ee to teß vatët ne pa ö no vasun kuß peo to ënëën ne. 31 Ko oraß hat hin vakis ee pe Ieesuß, pare soe maß pan, “Eën se keh veo a möm, emöm se nö ko hop em po kuß varuh.”

32 Ke Ieesuß soe ke rapoë. “Nö öm.” Ka ma oraß hat poë varih këh ee pa poa teß pare nö ko hop ee po kuß poë varih. Ko vasun kuß poë varih vavaveo kunah ee pa ö vaere, ko susurap ee na pa tonon, pare vuk, ko mët vahik ee.

33 Ka napan varih to matop ne sih po vasun kuß pamëh ep a tah vaßih, pare varurusin ee. Ee to vos manuh pa vöön apuh, pare vahutët ee pa ma taneah to tanok töön rapoë manih pa poa teß poë varih. 34 Ka napan kurus va pa vöön apuh pamëh nö ee pa ep këh e Ieesuß. Ee to ep ee peß, pare hin vakis poë, pan eß se këh tavus a muhin pee, pareß nö pa ta meh muhin.

Copyright information for `TPZ