Philippians 1

Eöm Se Vaßaus O Upöm Teß Me O Vaeö

Eöß e Pöl, ke Timotiß, emöm poß a poa teß kikiu pe Ieesuß Kristo.

To kiun ka nös neöm kurus a ma napan vivihan pe Ieesuß Kristo to teß nem pa vöön va Filipaë, vaßpeh me a nap susunön va po rotuß, me a ma teß kikiu va po kum teß poë varih to vaman ne e Ieesuß.

Eöß to hinhin noß e Sosoenën e Tamaara, me e Ieesuß Kristo se heß a neöm a taateß ururuan me a taateß moomo.

O Hin Pe Pöl

Eöß to sosoe vavihvih noß e Sosoenën peöß pa ma tëëm kurus nöß to kokoman a noß neöm. Ka manih pa ma hin kurus peöß, eöß to teß vaeö rakah e noß pa hin suk a neöm. Eöß to vavihvih me noß e Sosoenën po vaßaus ne eöm to heß a neoß pa ö nöß to vavatvus noß a Soe Vih. Ko vaßaus pamëh ne eöm to heß, po poen vamomoaan ne eöm to taneo vaman voh, keß öök non kuru. E Sosoenën to taneo voh en pa nok a kiu vih manih peöm, köß nat rakah e noß peß se nonok avoeß e non. Keß öök po Poen ne Ieesuß Kristo se hah maß, ka kiu vih pamëh se hik en.

Eöß to nat me e noß pan, eß to teß totoopin e non pa ö nöß to koman a noß neöm, suk eöß to pah iu vörep e noß peöm. Eöm kurus to avë me nem peöß po ururuan pe Sosoenën, pa öß ne eöß to teß noß pa nohnoh. Köm teß vaßpeh me nem a neoß pa kiu pa vaeh a taateß va pa vatvus a Soe Vih to vataare non pan, eöß to vavatvus noß a soe man va pa Soe Vih. E Sosoenën to nat e non peöß, to iu ep rakah a noß neöm. Suk, eöß to iu kurus rakah a noß neöm, o iu eh pamëh to taneß no maß pe Ieesuß Kristo.

O hin peöß ivëh, pan a taateß iu teß peöm se pupu vaßpuh oah nö rakah non, köm se teß natsean nem, ko kokoman peöm se teß maaka non vaßpeh me a taateß iu teß. 10 Ivëh, ke eöm se ep a vakëh pa taateß vih, me taateß hat, paröm kon varoe a ma taateß vivihan. Köm se teß vivihan nem ko hikta teß me nem ta hat po Poen ne Kristo se hah maß. 11 Ivëh, ke eöm se nonok tamoaan rakah nem a ma taateß totoopin, to taneß no maß pe Kristo, marën a heß o ëhnan apuh manih pe Sosoenën, me a kë a ëhnaneah.

A Nohnoh Pe Pöl To Vaßaus A Soe Vih

12 Eöß to iu a noß neöm, kën kea me kën vamen se nat nem pa tah to tanok voh manih peöß, a nohnoh peöß to vaßaus pa vatvus a Soe Vih, keß nö pet. 13 Ivëh, ka ma teß utut to matop ne a iuun pe Sisaß, me o upöm teß to nat e ne peöß, pan eöß to teß noß pa nohnoh, suk eöß to vaman noß e Kristo. 14 Eöß to teß noß pa nohnoh, ivëh, ka ma teß peo va po vaman to vaman vaeh rakah ee pe Kristo, ko hikta nanaöp ne a vatvus a soe pe Sosoenën.

15 Eß to teß man e non, a ma pah teß to vavatvus e ne pa soe suk e Kristo, suk ee to teß me ne a taateß puhioß, pare iu onoah e ne peöß. Ivëhkëk, o meoh upöm to vavatvus ne a soe pe Kristo, suk ee to iu vaßaus ne. 16 Ee to vavatvus ne a Soe Vih, suk ee to teß me ne a taateß iu teß, pare nat e ne pe Sosoenën to heß a neoß a kiu pa vaeh a taateß va pa vatvus a Soe Vih. 17 Ivëhkëk, o upöm teß to vavatvus ne a Soe Vih va pe Kristo, manih pa taateß amamun, me a taateß vaononoah. Ee to iu vatok ne maß ta ma meh punis, pa ö nöß to teß noß pa nohnoh.

18 Ivëhkëk, a hikta tah vi, pa ma ö kurus, ee to teß me ne pa ma kokoman vih, keß a ma kokoman hat, a tah apuh oah ivëh, ee to vavatvus e ne pa Soe Vih suk e Kristo. Ivëh, köß teß vaeö tamoaan rakah e noß.

E Pöl To Koman Non A Ö Neß Se Teß Toßtoß Non Pa Vaßaus A Napan Va Filipaë

19 Köß se teß vaeö avoeß e noß pa ö nöm to hinhin suk a nem neoß, ka Tuvuh pe Ieesuß Kristo vaßaus e non peöß. Ivëh, köß nat e noß pa ma punis varih se vaßaus a neoß, köß taihan eoß. 20 Ivëh, köß iu rakah noß, paröß vaman rakah noß pan, eöß hikta se nok vahat rakah noß ta pah tah pa vapoet hah öß. Ahik. Ivëhkëk, kuru eöß se sun vakis, pa ö nöß se teß noß, pa vataare o kikis pe Kristo manih po oeh, eöß he teß toßtoß avoeß e noß, keß, eöß se mët eoß. 21 Manih peöß a tah apuh oah ivëh, eöß se keh teß toßtoß e noß, eöß se teß me e noß pe Kristo. Keß, eöß se keh mët, a, eöß se kon a ma tah vih. 22 Eöß se keh teß toßtoß avoeß e noß, eöß se antoen e noß pa nok a kiu pe Apuh. Ivëhkëk, eöß to hikta nat noß, pa hanan taeah nöß se vatet, eöß se keh teß toßtoß e noß, keß, eöß se mët eoß. 23 Eß to hivaß ke non peöß pa vatet o pöök kokoman. Eöß to iu oah rakah noß pa këh o toßtoß vëh. Eß to vih oah rakah non peöß se nö, ko teß vaßpeh me noß e Kristo. 24 Ivëhkëk, eß to vih ke non peöm, peöß se teß avoeß e noß manih po oeh, köß se vaßaus a neöm. 25 Eöß to vaman vakis e noß pa ö nöß to teß me noß a kiu, ivëh, köß nat e noß peöß se teß avoeß e noß pa kiu vaßaus a neöm, ko vaman peöm se pu vaeh, köm se teß vaeö nem po vaman peöm. 26 Ivëh, ke eöm se vaeö vaßpuh oah manih pe Ieesuß Kristo po poen nöß se vavih hah nös pa ep ka neöm. Eöm se vaeö pet suk eöß to teß avoeß e noß.

E Sosoenën To Nok Vavih A Napan Va Filipaë, Kee Teß A Punis

27 A tah apuh ivëh, nöm se nat nem, eöm se teß vavih nem pa taateß totoopin peöm to kë non a Soe Vih pe Kristo. Eöß se keh vavih nös pa ep ka neöm, keß, eöß to teß varo këh e noß nös peöm. Keöß se tënan noß nös neöm to sun vakis nem, ko vapöh kokoman e nem. Ko kiu vaßpeh e nem pa kunkuin o vaman pa ma napan manih pa Soe Vih. 28 Ke eöm se koe a naöp o teß varih to vakihat me a no neöm. A ma tah poë varih to vëknöm ke non ro tövakihat a ö nee se kon vahat ee. Ivëhkëk, e Sosoenën se kon hah en peöm. 29 E Sosoenën to heß a neöm o ëhnan apuh pa ö nöm to vaman voh e Kristo, me pa ö nöm to kon kamis suk voh eah. Ka poa tah poë varih to kë non a ëhnan e Kristo. 30 Eöß to teß moaan me voh a noß neöm, ke eöm ep e nem peöß to vavapus me noß po tövakihat poë varih. Me o vapus pamëh to teß avoeß e non kuru. Eöm me to teß hop e nem po pöh vu punis, suk eöm to vatös me e nem peöß manih po vapus pamëh.

Copyright information for `TPZ