Philippians 2

Ea Se Vapöh Kokoman No Ko Nonok Vavih No O Upöm Teß

O toßtoß peöm manih pe Kristo to vaeh e non po kokoman peöm. Ka taateß iu teß peß se heß a neöm o kokoman tö. Eöm to vatös me e nem pa Tuvuh Vasioß. Paröm teß me e nem pa taateß ururuan pe Kristo. Ko teß nem pa taateß nok vavih a ma upöm peöm. Ivëh, ke eöm se vavaeö rakah e nem peöß, pa ö nöm to vapöh kokoman nem. Ko vatös vavih me nem a pah taateß iu o upöm teß. Eöm se keh nonok nem a ma taateß poë varih, eöm se nat nem teß me nem a taateß amamun, vaononoah, me eöm se nat nem vavovoh nem a taateß kë koman hah ëm. Ivëhpëhkëk, eöm se teß vöknah nem, ko kë oah nem a ëhnëëro o upöm teß këh a ëhnëëneöm. Eöm se koe a kokoman vörep varoe o toßtoß koman peöm, ivëhkëk, eöm me se kokoman nem a ma toßtoß po upöm teß, ko vaßaus nem raoe pa teß vavih.

E Kristo To Vöknah Ea Ke Sosoenën Kë Poan

Manih po toßtoß peöm, eöm se kokoman va nem manih, ko teß va nem manih pa ö ne Ieesuß Kristo to teß va non.

E Kristo to teß vavoh non manih pe Sosoenën,
pa ma tah kurus neß to nonok non.
Ivëhkëk, eß to hikta koman voh non a nok a tah ne eß koman to iu non,
marën a vaßaus koman hah ea,
suk eß to vatoe me e non pe Sosoenën.
Ivëhkëk, eß to vöknah hah ea pa teß vamanih pe Sosoenën,
ko koe en pa tasun apuh vëh neß to teß me voh non.
Eß to koaß voh,
pareß kon o sionin vamanih pa teß,
ko tavus vamanih pa teß kikiu akuk.
Ka ö neß to teß va non manih pa teß,
eß to vöknah hah ea,
pareß vavatet varoe non a soe pe Sosoenën,
pa ö neß to mët,
a, keß öök rakah pa ö neß to mët manih pa kuruse.
Ivëh, ke Sosoenën vasunön poan,
keß vamomoaan non.
E Sosoenën to heß poan o ëhnan to apuh oah e non,
pa ma moeh ëhnan kurus,
10 ivëh, ka ma napan kurus se vatokon manih pa ëhnan e Ieesuß,
ka ma napan va pa vöön va kin,
me manih po oeh,
me manih paan o oeh se vatokon manih pa ëhnan e Ieesuß.
11 Ka napan kurus rakah se soe vamanih pan,
“E Ieesuß Kristo e Apuh.”
Ka taateß pamëh to heß non o ëhnan apuh manih pe Sosoenën Taman.

Ea Se Teß Va No Manih Po Maaka Topniira Ma Napan

12 Ivëh, ke eöm a ma vakamöß peöß, eöm to vavatet tamoaan voh e nem pe Sosoenën pa ö nöß to teß vaßpeh me a noß neöm. Eß to vih oah non peöm se tëtënan soe nem kuru pa ö nöß to teß ke këh noß nös neöm. Eöm se kikiu vakis nö nem, pa vavih rakah a ö teßteß po kum peöm, vamanih pa ö nöm to ta nem e Sosoenën ko heß avoes këm manih peß. 13 Ea to nat e no pe Sosoenën to kiu non po kokoman peöm, ivëh, köm iu e nem pa nok a ma taateß vih, ko antoen e nem pa nok a ma taateß poë varih. Ivëh, ka ma taateß poë varih to heß vaeö ne poë.

14 Eöm se nonok nem a ma tah kurus, ko nat nem vavaarek nem, me eöm se koe a vaato vasukaß vatëh. 15 Ke eöm se teß vivihan nem, ka hikta hat se teß non peöm. Ke eöm se teß nem a ma koaß pe Sosoenën, no a hikta hat to teß non peöm. Ivëhkëk, eöm to teß me nem a napan to heß tonun ne a taateß totoopin, ko nonok ne a ma taateß hat peo. Ke eöm se teß va nem manih po vesun to tëtëkrea ne topniira ma napan to teß ne pa popoen manih po oeh, 16 pa ö nöm to heßheß nem o vavaasis vëh to heß non o toßtoß. Ivëh, ko Poen ne Kristo se hah maß, eöß se vaeö rakah, suk a ma kiu nöß to nok voh manih peöm, to hikta ro akuk. Eöß to nonok voh noß a ma kiu vëhvaß poë varih, paröß onoah voh eoß.

17 O vaman peöm to teß va non manih po heß peöm, nöm to heß vamanih po heß pa nok a kiu pe Sosoenën. Eöß se keh heß o eraß peöß vamanih po heß vaßpeh me a ma heß peöm, eöß se puh e noß po vaeö vaßpeh me a neöm. 18 Eöm pet me se teß vaeö nem, ko puh rakah nem po vaeö, ko vaeö vaßpeh me nem neoß.

E Pöl To Soe A Ö Neß Se Vanö E Timotiß Manuh Filipaë

19 Eöß to anoeh noß e Apuh e Ieesuß se keh iu non, eöß se vanö vëhöß nös e Timotiß manem peöm. Keöß se haraß vaeö rakah pa ö neß se hah maß ko soe ka neoß a ma tah nöm to nonok nem. 20 A hikta meh teß to teß me a no neoß to teß va non manih pe Timotiß. Eß to vapöh kokoman tamoaan me a no neoß, pareß kokoman tamoaan e non pa vaßaus a neöm. 21 O upöm teß to karë varoe ne a nok a ma tah koman pee, ko hikta iu rakah ne a vaßaus, pa nok a kiu pe Ieesuß Kristo. 22 Eöm to nat e nem pa taateß vih pe Timotiß. Paröm to nat e nem peß to vaßaus voh a neoß pa kiu va pa vatvus a Soe Vih, vamanih pe koaß to vaßaus non e tamaneah. 23 Ivëh, köß kokoman vovoh voh eoß pa vanö vëhöß nös eah manih peöm, pa ö nöß se nat ataeah se tavus manih peöß. 24 Eöß to vaman e noß pe Apuh se vaßaus a neoß, ke eöß me se nö nös pa ep a neöm.

E Pöl To Soe A Ö Neß Se Vanö E Ëpafroditus Manuh Filipaë

25 E Ëpafroditus, e kea peöß pa nok a kiu pa ëhnan e Kristo, me eß to kiu vaßpeh me a no neoß pa nap vëvënsun pe Kristo. Eöß to iu voh noß a vaßaus, köm vanö voh maß eah manih peöß. Kuru, eöß to koman noß a vanö hah nös eah manih peöm, 26 suk, eß to iu ep kurus rakah ka no neöm. Eß to karë, suk eß to nat e non pan, eöm to tënan voh em peß to haraß voh a hiinana apuh. 27 A, eß to haraß voh a hiinana pamëh, ko ö ra mët en. Ivëhkëk, e Sosoenën to ururuan poan, me eöß me. Ivëh, köß hikta se haraß vatamak itoeß hah noß. 28 Ivëh, köß iu rakah e noß pa vanö nös eah manem peöm, köm se ep hah in eah, paröm vaeö. Ke eöß me se nat noß haraß vakarë suk noß a neöm. 29 Ivëh, ke eöm se öt e Ëpafroditus pa ëhnan e Apuh, ko haraß vaeö vörep em. Eöm se kë nem a ëhnëëro teß to teß va ne manih peß. 30 Eß to ö ra mët voh en, pa ö neß to nonok voh non a kiu pe Kristo. Eß to kokoman varoe voh non a vaßaus a neoß, pa kiu vëh nöm to heß voh eah. A kiu pamëh ne eöm to hikta onöt voh nem a nok.

Copyright information for `TPZ