Philippians 4

Ea Se Vapöh Kokoman Ko Teß Vaeö No, Ko Kon O Kokoman Vih

Kën kea me kën vamen, eöß to iu a noß neöm, paröß iu ep a noß neöm. Eöß se vaeö pa ö nöß se ep a neöm, eöm to vavaeö me nem peöß. Ivëh, ke eöm se sun vakis po vaman manih pe Apuh, vamanih pa ö nöß to soe vavoh ka neöm.

Eöß to hi a poa köövo varih, e Yuodiaß pen Sintikeß pan, ee se vapöh kokoman vamanih pa poa tom kea manih pe Apuh. Eöß me to hi a oah, vakamöß peöß, ea to pet kikiu no, pan eën se vaßaus a poa köövo poë varih. Ee pon to vapa vavih me voh a neoß pa vatvus a Soe Vih. Ee, me e Klemen vaßpeh me o meoh upöm, to kiu me a no neoß, no a ma ëhnëëre to kiun e ne manih po puk va po toßtoß.

Eöm se teß vaeö tamoaan rakah nem manih pe Apuh. Eöß se soe hah, eöm se teß vaeö nem.

Koe ka napan ep ka neöm to teß me nem a taateß tö me a taateß vih. A siß ö ke Apuh hah en maß. Eöm se nat nem karë suk nem ta ma tah. Ivëhkëk, eöm se hinhin nem manih pe Sosoenën pa ma tah kurus neöm to iu nem. Ko vavihvih me nem eah. Ivëh, ka taateß moomo pe Sosoenën to apuh oah rakah, na to hikta onöt no a maaka vavih oah in eah. Eß se matop vavih a ma kupu, me kokoman peöm manih pe Ieesuß Kristo.

Kën kea me kën vamen, eöm se kokoman nem a ma tah varih to teß vih ne, na to antoen no a kë raoe. Eöm se koman nem a ma tah varih to teß man ne, na to kë no, kee teß totoopin ne, ko teß vivihan ne, me a ma tah ep vamanin, me a ma tah no a napan to ta ne. Eöm se vavatet a ma tah nöm to vavaasis taneß manih peöß, pa ma tah nöß to soe voh ka neöm, me a ma tah neöm to ep voh nem nöß to nonok noß. Ivëh, ke Sosoenën to heßheß non a taateß moomo, eß se teß vaßpeh me a no neöm.

E Pöl To Vaeö Me A Napan Pe Kristo To Heß Poë A Ma Heß

10 Eöß to vaeö vörep rakah me noß e Apuh pa ö neöm to vataare hah va ka nem neoß o vaßaus peöm. Eöm to iu vaßaus vatëh voh e nem peöß. Ivëhkëk, a hik voh ta ö nöm se vaßaus vah va ka neoß. 11 Eöß to hikta sosoe ka noß neöm a tah vëh, suk eöß to iu noß ta ma tah. Ahik. Eöß to vavaasis voh eoß ko teß vaeö me e noß pa ma tah nöß to öt noß. Me a ma moeh tah se tavus manih peöß. 12 Eöß to nat e noß pa ö nöß to teß toßtoß va noß, me pa ö nöß se teß arus noß. Ko nat e noß pa ö nöß to teß toßtoß va noß, me pa ö nöß to öt noß a ma tah peo. Eöß to vavaasis voh eoß pa ö nöß se teß va noß, me pa ö nöß se teß vaeö noß pa ma tëëm, no a ma tah kurus se tanok manih peöß, pa ö nöß se öt onöt noß a taëën, me pa ö nöß to haraß noß o maë. Me pa ö nöß to öt oah noß a ma tah peo, nöß to iu noß, me pa ö nöß to öt vakökööt noß. 13 Eöß to antoen e noß pa nok koe a ma tah kurus manih pe Kristo, suk eß to heß a neoß o kikis peß.

14 Ivëhkëk, eß to vih non peöm to vaßaus a neoß pa ö nöß to teß me voh noß a punis. 15 Eöm a ma napan va pa vöön apuh va Filipaë to nat koman e nem, pa ö nöß to taneo voh pa vatvus a Soe Vih manem. Po poen nöß to këh maß a muhin peöm Mësadoniaß, eöm varoe voh o pöh kum teß to vaman nem e Ieesuß to vaßaus voh nem neoß pa moniß. 16 A ma tëëm nöm to vanö voh ka maß neöß a ma tah nöß to iu noß, pa ö nöß to teß noß manih pa vöön va Tesaronaëkaß. 17 Oman rakah, eß to hikta teß voh non pan, eöß to iu kon taneß noß a ma heß manih peöm. Ivëhkëk, eöß to iu noß, ne eöm se kon taneß a ma tah vih pa taateß heß a ma tah peöm manih pa meh teß. 18 Kuru eöß to öt noß a ma tah kurus, ko öt oah e noß pa ma meh tah nöß to iu noß. Suk e Ëpafroditus to teß maß a ma heß peöm, ko heß a neoß. A ma heß to teß va ne manih po heß ovoavuh vih na to heß. E Sosoenën to kokon non a ma heß poë varih, pareß vaeö e non pa ma heß. 19 E Sosoenën peöß to teß me non a ma tah vihvih peo oah rakah neß se heß koe ka neöm manih pe Ieesuß Kristo. Eß se heß a neöm a ma tah kurus nöm to iu nem. 20 E Sosoenën, e Tamaara, ka se kë tamoaan no a ëhnaneah. Oman.

E Pöl To Soe Ataaton Ke Ra Napan Va Filipaë

21 Eöm se soe vavihvih nem a ma meoh upöm teß pe Sosoenën pa ëhnan e Kristo. O teß varih to teß vaßpeh me a no neoß, to vanö nös a soe vavihvih pee manih peöm. 22 A ma napan kurus pe Sosoenën to vanö nös a soe vavihvih pee manem peöm. A ma teß me varih to nonok ne a kiu manih pa iuun pe Sisaß. Ee me to vanö nös a soe vavihvih eh pee manih peöm.

23 Eöß to hinhin noß e Apuh pea Ieesuß Kristo, pan se heß a neöm o ururuan peß, ko teß vaßpeh me a no neöm kurus.

Copyright information for `TPZ