aAmo 3:13
bSng 111:2
cSng 145:17
dJer 10:7
eSng 86:9-10
fLo 32:4

Revelation of John 15

O Tönim Me A Poa Ankeroß To Öt Ne O Tönim Me A Poa Tah Hat Oah

Köß töhkak in o meoh vëknöm apuh to tavus manih akis, paröß pah kokoman vörep suk e noß peß. A tönim me a poa ankeroß to öt ne o tönim me a poa tah hat rakah, marën a miröß a ma napan. Eß o vahik in o vakmis pe Sosoenën.

Eöß to ep in a tah to matan va non manih pa tahiß apuh, to nok non po karas, nee to hovën po suraß. Eöß to ep me a napan varih to onoah voh o vapus pa tah poa, me a tah nößnës va peß, me a nampaß pa ëhnaneah. Ee to sun ne sinten tahiß vëh to teß va non manih po karas ko öt nee a gitaß ne Sosoenën to heß raoe.

Ee to vahëh ne o vahëh pe Mosës, a teß kikiu pe Sosoenën, me o vahëh va pa Soneß Sipsip. O vahëh pamëh to teß va non manih pan,

“Apuh, eën e Sosoenën A Kikis Vi, a 
A ma kiu kurus nën to nok eß to apuh,
emöm to ep eah to paraß apuh
pamöm kokoman vörep nem. b 
ka taateß pën totoopin pareß man. c 
Eën a teß Sunön pa ma vuteß kurus.
Ivëh, keteh hikta se naöp no moah,
keteh hikta se kë non a ëhnöömah? Ahik. d 
Apuh, eën varoe kuru a vivihan.
A napan kurus se nö maß pa vasunön a oah. e 
Suk ataeah, a taateß totoopin pën to tavus vamaaka en.” f 
O vaëhëh to hik en, köß ep in a Iuun Hinhin Apuh pe Sosoenën manuh pa vöön va kin, eß a ö vasioß peß. Ka tönim me a poa ankeroß varih to öt ne pa tönim me a poa ta hat marën a miröß a napan, ee to këh tavus ee maß pa ö vasioß pe Sosoenën. Ee to ohop ne a ma ohop maaka voon matan vavih rakah. Pare voh ne a ma voh to nok non pa gol manih pa poeere. Ka paeh va pa taanaß tah toßtoß heß en po tönim me a poa toep gol manih pa tönim me a poa ankeroß. O toep poë varih to puh ne po vakmis pe Sosoenën to teß tamoaan e non. O öh va po kikis, me o tëkrea pe Sosoenën to puh rakah non manih pa ö vasioß pamëh. Ka hikta teß to onöt non a ho pa ö vasioß. Ee se anoeh ne a tönim me a poa ankeroß se vahik a kiu manih pa tönim me a poa tah hat poë varih.

Copyright information for `TPZ