Revelation of John 22

E Jon To Ep In A Ruen, Me O Naon Va Po Toßtoß

A ankeroß to vataare me en peöß pa pah ruen apuh, a ruen va pa heß o toßtoß tamoaan. Eß to ëman va non manih pa ö no siroak to ëman va non. Eß to koko taneß no maß pa ö ihihoß pa teß sunön vaßpeh me a Soneß Sipsip, pareß koko topnin non a hanan va pa vöön. Manih sinten a poa pap ruen, o naon to heß non o toßtoß manih pa ma napan, to sun non. Komön o pöh kirismas pa ma sivö kurus, o naon pamëh to vovoaß non. Ka ma paß naon, eß marën a vatoß hah a ma napan kurus. Ka ma tah kurus ne Sosoenën to rës rakah non, ko iu vahik non raoe, a ma tah poë varih hikta se teß ne.

A ö ihihoß pa teß sunön vaßpeh me a Soneß Sipsip to teß non pa vöön pamëh. Ka ma teß kikiu pe Sosoenën se kiu ne manih peß.
Ee se teß vaßpeh me ne peß, ko kuteß e ne pa mataneah. Keß kiun a ëhnaneah manih pa ma naire. Ka popoen hikta se teß hah non, kee hikta se iu hah ne o ëman va pa potan me o ram. Suk e Sosoenën, e Apuh se heß e non po ëman manih pa ma napan. Ka napan poë varih se teß va ne manih po teß susunön pa ma tamoaan.

E Ieesuß Se Hah En Maß

Ka ankeroß soe ka neoß pan, “A ma soe varih to paraß man, eöm a ma napan to se vaman rakah. E Sosoenën, e Apuh to vanö maß a Tuvuh Vasioß peß pa kunkuin o kokoman po teß vanënën soe, marën a vatvus a ma soe peß. Eß to vanö maß a ankeroß peß pa vataare a ma nap kiu peß a ma tah kurus se tavus vëvëhöß ee. E Ieesuß to soe pan, “Pënton öm, eöß se nö vëvëhöß eoß maß manih peöm. A ma napan to vavatet ne a soe pe Sosoenën to teß non komön o puk vëh, pa ma tah se tavus amot, a ma napan poë varih se vaeö.”

Eöß e Jon, to tënan ko ep a ma tah kurus varih, paröß vatokon havin mon a ankeroß vëh to vataare a neoß a ma tah varih pa vasunön eah. Ivëhkëk, eß to soe pan, “Eën se koe a nok va nën! Eöß a meh teß kikiu to teß va e noß pën, me a ma kea pën varih o teß vanënën soe, me a napan varih to vavatet ne a soe to teß non komön o puk vëh. Eën se vasunön varoe nom e Sosoenën a paeh”. 10 Eß to soe ka neoß pan, “A soe pe Sosoenën to teß non komön o puk vëh sën nat nom koaan nom. Suk o poen ne Sosoenën to iu nok non a ma tah poë varih to öök vatët en. 11 Ivëh, ka napan varih to nonok vatëh ne a ma taateß hat, ee se pah teß ne pa nok a ma taateß hat. Ka napan varih to nonok ne a taateß teßteßvaasiß, eße se pah teß ne nën. Ka napan varih to nonok ne a taateß vih, eße se teß ne pa nok a taateß vih. Ka napan varih to teß ne pa taateß vivihan, ee se pah teß vivihan ne, pare nat ne nonok hah ne a taateß hat, suk ataeah, e Ieesuß se keh nö vëvëhöß en maß, ahik hah, ta tëëm nee se panih a ma taateß hat pee.”

12 E Ieesuß to soe pan, “Pënton öm, eöß se nö vëvëhöß maß, eöß se teß maß o voen marën a heß papaeh a ma napan to onöt non a ma taateß nee to nok voh. 13 Eöß varoe kuru a taneo pa ma moeh tah, ko se teß noß pa vahik pa ma moeh tah. Eöß a pusun in a ma tah kurus, paröß vavahik hah nö noß a ma tah nöß to nok voh.

14 A ma napan varih to vaman voh e Ieesuß ko eraß peß pupui a ma ohop pee, ee se vaeö. Ee to onöt e ne pa kon a taëën manih po naon va po toßtoß, me ee to onöt e ne pa ho manuh po hopaß va pa vöön. 15 A ma nap ororaß teß, me a napan to teß ne pa taateß rëhrëh, me a nap ipip vamët teß, me a napan varih to vasunön ne a tah nößnës, me a nap pikpiuk, me a napan varih to teß ne pa taateß popoen, a ma napan kurus varih se teß tavus këh e ne pa vöön pe Sosoenën, a vöön Jerusalëm.

16 Eöß e Ieesuß, to vanö voh nös a ankeroß peöß manih peöm, keß vatvus ka neöm a soe manih peöm o kum teß varih to vaman a no neoß. Eöß e koaß, to taneß voh maß po vuteß pe Devit. Eöß a toviaß vëh, to ëman vamaaka noß sih pa pöstakah.

17 A Tuvuh Vasioß me e köövo pa Soneß Sipsip to soe pan, ‘Nö mah!’ Ka ma napan to pënton a soe pamëh se soe pet ee pan, ‘Nö mah!’ Keteh to manoe ko iu kaak non, eß se nö maß ko kaak, eß se kaak taneß pa rën to heß non o toßtoß to teß va non manih po heß akuk pe Sosoenën.

18 Eöß to heß a soe kikis manih pa napan varih to pënton a soe pe Sosoenën to teß non komön o puk vëh. Ta pah teß se keh vatom pet ta meh soe manih pa soe vëh, a ma tah hat vörep varih ne Sosoenën to sosoe non komön o puk vëh, eß se ununun ken pa teß pamëh. 19 Ka teß se keh kon ke ta pah ö soe va pa soe pe Sosoenën to kiun non komön o puk vëh, e Sosoenën se kon këh en peß pa taëën va po naon to heß non o toßtoß. Eß se hikta teß hop non pa vöön pe Sosoenën vëh no puk to vavahutët e non.”

20 A teß vëh to vatvus a soe va pa ma tah kurus varih, eß to soe pan, “O pöh man rakah, eöß se nö vëvëhöß eoß maß.”

Oman! Apuh Ieesuß, eën se nö rakah maß.

21 O ururuan pe Apuh e Ieesuß se teß vaßpeh me non a napan kurus pe Sosoenën. Oman!

Copyright information for `TPZ