Revelation of John 8

A Soneß Sipsip To Kap O Tönim Me O Pöök Vaßtop Töön

A Soneß Sipsip to kap en po vatönim me o pöök kok in o këntör vëh po miu pëpaß, ka hikto vatoeßnën me a vaato manuh pa vöön va kin pa pah pap aoaß. Vasuksuk nöß to ep in a tönim me a pöök ankeroß varih to sun ne pa matan e Sosoenën, ee to kon o tönim me a pöök suvin.

Ka meh ankeroß to öt non a toep gol va pa ës a tah avoavuh vih. Eß to nö maß pareß sun non pa havin a pok, nee to nok voh pa gol. Ee to heß poë o kukuvun tah pamëh, neß se vatös me a ma hin pa ma napan vivihan kurus pe Sosoenën. Pareß ës ke na e Sosoenën o heß manih pa pok vëh to teß non matan a ö ihihoß pe Sosoenën. Ko öh ovoavuh vih pamëh me a ma hin pa ma napan kurus pe Sosoenën to këh a koren a ankeroß, ko peah en manuh pa matan e Sosoenën. Ka ankeroß kon en pa toep vëh no a ma tah ovoavuh vih to pet ne, pareß kon taneß o suraß manih pa pok ko vapuh manih pa toep. Eß to vi kunah manuh po oeh, ka muhin vakës, ka kara kon en, pareß vatoeßnën en, ka rikrik ip en.

A Taanaß Ankeroß To Piu A Ma Suvin

Ka tönim me a pöök ankeroß varih to öt ne a tönim me a poa suvin vamatop ee pa piu a ma suvin.

Ka ankeroß vavovoh piu en pa teß suvin peß, ka ruiß tutuvuh eh,
[... ruiß tutuvuh eh, ...] Ep manuh po Kölösöriß kusin o puk vëh.
me o suraß to hovën non po eraß to tavus en maß, ko vuß en manih po oeh. Eß se teß va non manih, pa ö nee to ki o oeh po kukön hum, ko pöh hum no a suraß pamëh to ës en, vaßpeh me a naon me a karas to teß ne manih koman o hum oeh pamëh.

Ka vapöök ankeroß piu en pa suvin peß. A tah to matan va non manih pa tope apuh to ës en. Kee vi kunah a tope pamëh to ësës non manuh tahiß. Eß se teß va non manih, pa ö nee to ki a tahiß po kukön hum, ko pöh hum tahiß tarih en o eraß. A ma pah tah toßtoß to teß ne komön o pöh hum tahiß vëh, to mëtmët ee, me a ma paröß varih to teß ne nën to hat ee.

10 Ka vakön ankeroß piu en pa suvin peß. Ka vesun apuh vëh to ësës va non manih po vauß, vuß taneß maß akis ko vuß en manih po oeh. Eß se teß va non manih, pee to ki o oeh po kukön hum, ko pöh hum no a vesun apuh pamëh to vuß manih pa ma ruen apaßpuh, me pa ma rën to teß ne nën. 11 A ëhnan a vesun pamëh, Eß To Pais Vörep, manih po to Grik, nee pokaß ne, “Wormwood”, eß to vuß manuh pa ma ruen to teß ne po pöh hum oeh, ka ma ruen ninin pais ee. Ka nap peo varih to kaak a ma ruen pais varih, ee to mëtmët vahik ee.

12 Ka vataanaß ankeroß piu en pa suvin peß. Eß se teß va non manih, pee to ki a potan, me a sivö, me a ma vesun po kukön hum. Ko pöh hum no a pah tah to miröß. Ivëh, ko pöh hum pa ma vesun, me a sivö, me a potan to hikta ëman ne. Ko pöh hum in a potan me a popoen to hikta teß me ne o tëkrea.

13 Köß ep na, paröß ep in a enen to atan vah non akis, paröß pënton a rivoneah to soe vamanih pan, “Vatamak, vatamak rakah pa ma napan varih to teß ne manih po oeh. O poen no a meh kukön ankeroß se piu a ma suvin pee, a punis apuh rakah se tavus manih pa ma napan!”

Copyright information for `TPZ