aAis 45:23

Romans 14

Koe A Kö O Upöm Teß

Eöm se vatompoan vavih me a teß vëh no vaman peß to hikta teß eh non, keß hop maß po kum peöm. Paröm koe a vasosöë suk a ma ö nöm to koman vakëkëh va nem. A pah teß to vaman va non manih pan, eß to teß vih e non peß pa ëën a ma moeh taëën kurus. Ivëhkëk, a meh teß vëh no vaman peß to töötö, eß to vaman va non manih pan, eß to vih e non peß pa ëën varoe a pöß. A teß vëh to nat va non manih pan, eß to teß vih e non peß pa ëën a ma moeh taëën, eß se nat non kökö non a teß vëh to ënëën varoe non sih a pöß. Ka teß vëh to ënëën varoe non sih a pöß, se nat non ep vöknah non a teß vëh to ënëën non sih a ma moeh taëën kurus, pan eß to nonok e non pa hat. Suk ataeah, e Sosoenën to vatompoan vavih me voh en pee pon. Eën eteh, kën kiiki nom a teß kikiu pa meh teß? Eß se keh sun vakis e non pa nok vavih a kiu peß, keß, eß se keh hikta sun vakis non pa nok vavih a kiu peß, eß a tah koman pe torara peß. Ivëh, keß se sun vakis e non pa nok a kiu peß, suk ataeah, e Sunön to toon vakis e non peß pa nok vavih a kiu peß.

O upöm teß to koman ne pan, o pöh poen to apuh oah e non pa ma meh poen. Ka meh to koman non pan, a ma poen kurus to vatoe e ne. Ivëhkëk, a ma papaeh teß se keh vaman va ne manih pan, o poen vëh neß to vaman non to teß vih e non peß, eß a tah koman peß pa ö neß to vaman va non. O teß varih to koman ne pan, o pöh poen to apuh oah e non pa ma meh poen, ee to koman va ne nën marën a vavaeö e Sunön. Ko teß varih to ënëën ne sih a ma moeh taëën kurus, to ënëën suk ne a ö nee se vavaeö e Sunön, pare sosoe vavihvih pet ke ne sih pe Sosoenën, pa ma taëën nee to ënëën ne sih. O upöm teß varih to kokoe ne sih a ëën a ma meh taëën, ee to kokoe suk ne a ö nee se vavaeö e Sunön, pare sosoe vavihvih pet ke ne sih pe Sosoenën, pa ma teß taëën varih nee to nat ne a ëën. A hikta pah teß to teß toßtoß suk non sih o iu koman peß. Ka hikta pah teß to mëtmët suk non sih o iu koman peß. Ivëhkëk, ea se keh teß toßtoß no, ea to teß toßtoß suk e no po iu pe Sunön. Ka se keh mët ro pet ee, ea to mët suk ee po iu pe Sunön. Ivëh, ka se keh teß toßtoß e no, keß, ea se keh mët ro ee, ea se teß avoeß e no a napan pe Sunön.

Ka pusun in a ö ne Ieesuß to mët, pareß sun taneß hah pa nap mët, eß marën a ö neß se tavus e Sunön pa nap mët, me ra nap toßtoß. 10 Eën eteh, kën kiiki nom a kën pömah manih pa ëhnan e Ieesuß Kristo? Parën koman suk nom ataeah pan, eën to vih oah e nom pee? Ea kurus se sun amot ee pa matan e Sosoenën marën a ö neß se kiiki a ra. 11 Peß to kiun va non manih po Puk pe Sosoenën, pareß soe non pan,

“A soe pe Sunön ivaßih,
‘Suk rakah a ö nöß to teß toßtoß noß’,
A napan kurus va po oeh se vatokon manih pa mataneoß,
pare soe tavus va ee manih pan,
‘Eën e Sosoenën.’” a 
12 Ivëh, ke ea papaeh se soe tavus koman ke Sosoenën a pusun in a ma taateß kurus na to nok voh.

Koe A Nok O Upöm Kee Kuß Pa Hat

13 Ivëh, ka se koe a kiiki a taateß po upöm teß va po vaman, para koman vahat no raoe. Para koe a nok ataeah to antoen non a miröß a ma kokoman pee, kee kuß pa taateß hat. 14 Eöß to vatös me noß e Ieesuß Kristo, ivëh, köß vaman rakah e noß pa hikta pah taëën to teß hat non pa ëën. Ivëhkëk, a teß se keh ep va non ta pah tah manih pan eß to hat, a tah pamëh to hat e non peß. 15 Eën se keh vaharaß vahat o vaman pa kën pömah manih pa ëhnan e Ieesuß, suk a ö nën to ënëën nom a taëën nee to hikta ënëën ne, eën hikta vavatët rakah nom a taateß iu teß. Koe a miröß o vaman po upöm peöm, pa ö nën to ënëën nom a taëën, nee to koman ne pan eß to hat, suk e Ieesuß Kristo to mët suk pet me voh en pee. 16 Ivëh, kën se koe a nok a tah nën to koman nom pan, eß to teß vih e non, keß tavus vamanih pa tah no upöm peöm to sosoe ne pan eß to hat. 17 Manih pa koman o Matop Vih pe Sosoenën, a ëën me a kaak to hikta teß apuh ne. A ma tah apuh oah ivarih pan, ea se vatet no a ma taateß totoopin, para vakamöß vavih me no o upöm pea, ko teß vaeö me no raoe. A ma tah kurus poë varih to taneß maß pa Tuvuh Vasioß. 18 Suk a teß vëh to vavatet non sih e Ieesuß Kristo pa tëëm neß to suksuk non a ma taateß poë varih, to vavaeö e non pe Sosoenën, ko upöm teß se ep va e ne peß manih pa teß vih.

19 Ivëh, ka se punöß rakah pa nok a ma tah varih se vakikis ne a taateß vakamöß, para vavaßaus koman hah a. 20 Koe a vaonöt a taateß ëën taëën, keß miröß a tah ne Sosoenën to nok voh po toßtoß pe kea pën, a ma taëën kurus to vih e ne pa ëën. Ivëhkëk, eß to hat e non pa ëën a taëën vëh se nok e kea pën keß kuß pa taateß hat. 21 Eß to paraß vih pa ö na se koe ee pa ëën a vönaß, keß a kaak o voaën, keß a nok a tah vëh se nok e kea pën keß e vameomah, keß kuß pa taateß hat. 22 O vaman peöm se suk a ma tah poë varih, pare teß varoe rakah ne topnin in ne eöm, ke Sosoenën, paröm nat nem toon o upöm peöm, kee suk a ö nöm to vaman va nem. O upöm teß va po vaman to teß vaeö e ne pa ö nee se keh nonok e ne pa ma taneah nee to koman ne pan, eß to teß vih e non, pare hikta se haraß ke ne pan, ee to teen ne ta tah. 23 Ivëhkëk, o teß varih to ënëën ne a ma taëën, pare teß me ne o pöök kokoman, ee to nonok e ne pa hat, suk ataeah, ee to hikta vaman va ne manih pan, ee teß vavih kov e ne, keß ahik. Ataeah no o teß to nonok ne, no vaman pee to hikta soe vaonöt ke non raoe, ee to nok ee pa hat.

Copyright information for `TPZ