a1Kor 6:11; 2Tim 1:9
b1Kor 12:7+; 2Kor 8:7
cPil 3:20; 1Tes 1:10; Tit 2:13
dPil 1:6; 1Tes 5:23+; 1Pe 5:10
eRo 12:16; Pil 1:27, 2:2; 1Pe 3:8
f1Kor 3:4+
gMbaŋ 18:8; Ro 16:23
h1Kor 16:15
i1Kor 2:1+
jRo 1:16; 1Kor 2:14; 2Kor 4:3
kIs 29:14
lLu 10:21; Ro 1:22; 1Kor 3:18
mMt 11:25+
nYo 4:48; Mbaŋ 17:21
oYo 6:60+; 1Kor 2:2,14
pRo 1:16; Kol 2:3
r2Kor 13:4
sMt 11:25; Yems 2:5
tRo 3:27; Ep 2:9
uRo 3:24; 2Kor 5:21; Ep 1:7; Pil 3.9
vYer 9:23+; 2Kor 10:17

1 Corinthians 1

You Paulus. Maaron ipoi ghou nanim le, ve ighur ghou nanim mbaŋooŋa to Yesu Krisi itaghon tau lolo. Yeru toŋvetaz toit Sostenes nimbood rau tonene ilat to yam to aneep ila lupuuŋ to Maaron izi ndug Korin. Yam aneep tuŋia ila to Yesu Krisi, tauto anim tamtoghon toni patabuaŋa wa. Ye ipoi gham anim le, leso ataghon ŋgar patabuaŋ animale ye tau. Ve yam moghon maau. Ye igham tovene pa tamtoghon tisob to ndug ndug to tisuŋsuŋ ila Tiina toit Yesu Krisi iza. Ye tiina todi, ve tiina toit paam. a 

Poia to Tamaan Maaron ve Tiina toit Yesu Krisi iza tiam, ve tiŋgin gham aneep pooi toman lolomim luuma. Onoon.

Paulus ipait Maaron pasa, ye ighur poia toni tiina iza to yes Korin

Sawa isob, you napait Maaron payam toman lolog poia. Pasa, ila uraat to Yesu Krisi, Maaron ighur poia toni tiina iza tiam. Yam to aneep tuŋia ila to Krisi, Maaron Avuvu irei ŋgar popoia naol payam. Tauto aghazooŋ pa ŋgar popoia naol, ve avovotia Maaron aliŋa ila ataam naol. b 

Maaron Avuvu igham uraat toman tapiri ila lolomim. Tauto aghilaal aghaze saveeŋ to Krisi to nisavia payam, nene onoon, ve akisi ariaŋa. Tovenen aazne, ambool pa tapiri, ma ŋgar poia eta to Maaron Avuvu ireii pait ne maau. Ve asasaŋan aghaze le aghita sawa to Tiina toit Yesu Krisi imuul inim, ve Maaron ipatooŋa ivot ighazooŋ. c 

Maaron tau pale ipalot gham, ve igham gham ayoon ariaŋa le aza pa sawa to ye ighuri payam. Leso sawa to Tiina toit Yesu Krisi imuul inim, ye ighita gham ighaze lemim sosor eta maau. Iit irau tanumeer Maaron. Pasa, ye itaghon saveeŋ toni irau sawa isob. Ve ipoi gham anim le ve yamŋa Natu Yesu Krisi alup gham anim ee moghon wa. d 

Paulus isaav ariaŋa pa yes Korin ighaze tivalag di malep

10 Yam toŋvetaz, you naghaze napalot gham ila Tiina toit Yesu Krisi iza tovene: Avalag gham aneep lemim lemim malep. Yam asob alup lolomim ve ŋgar tiam inim ee moghon, ve azuaria gham pa taghoniiŋ ŋgar ee moghon. e 

11 Yam toŋvetaz, you nasavia saveeŋ tonene pasa, Kloe tamtoghon toni pida tinim, ve tipaesia varumim payou tighaze parzoraaŋ naol tivotvot ila lolomim. 12 Nene nasavia ŋgar tiam to avalag gham aneep lemim lemim, ve yam pida asavsaav aghaze: “You nataghon Paulus,” ve pida aghaze: “You nataghon Apolos,” ve pida aghaze: “You nataghon Petrus,” ve yam pida aghaze: “You nataghon Krisi.” Ŋgar tonanan, yam asob aghamghami. f 

13 Vena, yam aghaze arab motmotin Krisi anoŋa inim suruvu suruvu? Ma aghaze you Paulus nagham inamim, ve tirab ghou izala ai pambarooŋ payam? Ma yam agham ya ila you izag? Maau. 14 You lolog poia pa Maaron ve napaiti pasa, nagham ya pa yam ival maau. Nagham ya pa Krispus ve Gaius moghon. g 

15 Tovenen tamtoghon eta irau isaav ighaze: “Yei tonene nigham ya ila Paulus iza,” ne maau. 16 O, ŋgaramus matag iŋgal. You nagham ya pa Stepanas ve yes to tineep tomani ila ruum toni ne paam. Ve yam pida, lolog imaagh. Nagham ya payam, ma maau? h 

17 Pughu to you nagham ya pa yam ival maau, nene vene: Krisi imbaaŋ ghou pa nagham ya pa tamtoghon maau. Ye imbaaŋ ghou pa navotia varu poia. Ve ye ighaze sawa to navotia varu poia, you irau nasaav nanimale yes ŋgara to taan to tighamgham pa taudi izadi ne maau. Pasa ighaze nagham tovene, nene pale narab matin ai pambarooŋ to Krisi tapiri, ve tamtoghon tighita ai pambarooŋ toni inimale mbeb sorok. i 

Mateeŋ to Krisi izala ai pambarooŋ ipatooŋ ghiit ighaze Maaron ŋgar toni, nene ite kat pa ŋgar to iit tamtoghon

18 Onoon, saveeŋ to isavia mateeŋ to Krisi izala ai pambarooŋ, tamtoghon to titaghon ataam to tilaledi, tighita tighaze nene saveeŋ to borouŋa. Eemoghon iit to Maaron ighamgham uraat pa igham mulin ghiit ne, taghilaala taghaze saveeŋ tonowen, Maaron tapiri ineep ila. j 

19 Saveeŋa, Maaron isavia ve timbooda pataghaaŋ wa. Ighaze:

“Ndiran ŋgara to taan, you pale nawaghamun ŋgar todi le tiwaghamgham.
Yes to tighaze tighazooŋ kat pa ŋgar tintina, you pale nagham ŋgar todi inim mbeb sorok, ve le anoŋa maau.” k 
20 Ighaze venen, pale tasaav vena pa yes ŋgara to taan, ve yes to ledi ŋgar tintina pa tutuuŋ to Mose, ve yes to aazne tiwazoran di pa savsaveeŋ ma ŋgar? Pale tapait di? Maau. Pasa, ŋgar to tamtoghon to taan tipakur taudi pani, nene Maaron ipatooŋa ighaze nene ŋgar to borouŋa. l 

21 Maaron ŋgar toni tiina, ve ighita ighaze poia pa ipoon ataam pa tamtoghon to taan, leso tipait taudi izadi sob. Tauto yes ŋgara to taan ŋgar todi irau iuul di pa tiwatag Maaron maau. Maaron ighaze igham mulin tamtoghon itaghon ataam ite. Nene saveeŋ to Krisi to nivovotia. Onoon, tamtoghon to titaghon ŋgar to taan, tighita saveeŋ tonene tighaze nene saveeŋ to borouŋa. Eemoghon yes to tighur ila saveeŋ tonene, Maaron pale igham mulin di. m 

22 Yes Yuda tizoorndug tighaze tighita mbeb gharatooŋadi tivot tinim ghilalooŋ padi, ghoro tighur ila. Ve yes Grika tizuaria di pa loŋaaŋ saveeŋ to yes ŋgara to taan to tighita tighaze le pughu tiina. n 

23 Eemoghon yei nivovotia saveeŋ pa mateeŋ to Krisi izala ai pambarooŋ. Saveeŋ tonene, sawa to yes Yuda tilooŋa, tirere pani ve tighur ila maau. Ve sawa to yes Grika tilooŋa, tivelegi tighaze nene saveeŋ to borouŋa. o 

24 Eemoghon yes to Maaron ipoi di tinim le, yes Yuda ve Grika paam, yes tighilaal tighaze Krisi ipatooŋ Maaron tapiri ve ŋgar toni tiina ivot ighazooŋ pait. p 

25 Onoon, tamtoghon to titaghon ŋgar to taan, tiveleg Maaron ŋgar toni tighaze nene inimale ŋgar to borouŋa. Eemoghon maau. Ŋgar toni tiina. Ilib kat pa ŋgar to iit tamtoghon. Ve uraat to Maaron ighami,
(1:25) Uraat to Paulus isavia, nene mateeŋ to Krisi ve mundigiiŋ toni.


tovene paam. Tamtoghon tivelegi inimale mbeb sorok, ve tighita tighaze le tapiri maau. Eemoghon uraat tonowen, tapiri tiina kat. Ilib pa iit tamtoghon tapiriid. r 

Ŋgar to Maaron ene ite kat pa ŋgar to taan

26 Yam toŋvetaz, agham ŋgar pa taumim. Sawa to Maaron ipoi gham anim le, gabuamim ne vena? Ndiran to titaghon ŋgar to taan, tighita tamtoghon tiam katindi tighaze ledi ŋgar tiina maau. Ve tighaze yes ledi izadi ve tapiridi pa ghamuuŋ mbeb eta maau, ve siŋ todi paam, ledi izadi maau. 27 Tovenen aghita. Yes to tamtoghon to taan tiveleg di tighaze ledi ŋgar maau tinimale borouŋa, tauto Maaron igham di tinim le, leso ipamayaŋin ndiran ŋgara to taan. Ve yes to tamtoghon to taan tighita di tighaze tapiridi iraua maau, tauto Maaron igham di tinim le, leso ipamayaŋin yes to tapiridi tintina. s 

28 Ve yes to ledi izadi maau, ve tamtoghon to taan matadi velegin di, ve tighita di tinimale mbeb sorok, tauto Maaron igham di tinim le. Leso ipatooŋ yes to izadi tintina ighaze izadi tonowen, mbeb sorok. Pasa, ye lolo pa tamtoghon eta ipait tau iza ila mata malep. t 

30 Maaron tau to igham gham aneep tuŋia ila to Yesu Krisi. Ye ighur Yesu Krisi pa ipaghazoŋan ghiit pa ŋgar toni, leso taneep pooi. Ve Krisi to igham ghiit taneep deŋiaad ila Maaron mata, ve igham ghiit tanim tamtoghon toni patabuaŋa, ve ipas ghiit tavot pa ŋgar samia tapiri, leso tanim mbesooŋa pani muul sob. u 

31 Tovenen tataghon saveeŋ to timbooda pataghaaŋ wa.

“Tamtoghon to lolo pa ŋgar to pakuruuŋ, ye irau ipakur Ŋgeu Tiina pa ŋgar to ye ighami.” v 
Copyright information for `TUCO