aYo 1:12, 16:2+; Ro 8:15+
bMt 5:8, Ro 8:29; 2Kor 3:18
c2Kor 7:1
d2Kor 5:21; Hib 9:26; 1Pe 2:22+
eRo 6:1+,14; 1Yo 2:4
fRo 2:13; 1Yo 2:29
gYo 8:44; Hib 2:14
h1Yo 2:29, 4:8, 5:18
iYo 13:34, 15:12
jMbnp 4:8; Hib 11:4
kYo 15:18+, 17:14; 2Tim 3:12
lGa 5:19+; Syg 21:8
mYo 15:13; Ro 5:8; Ep 5:2
nYems 2:14+,22; 1Pe 1:22
oRo 5:1; Hib 4:16, 10:22
pMbo 34:15; Mt 7:7+, 21:22; Yo 9:31, 14:13
qYo 14:23, 15:10; Ro 8:9

1 John 3

Iit taneep tanimale Maaron ndinatu

Aghita. Tamaan Maaron lolo pait ve ipakur ghiit kat. Pasa, ye ipoi ghiit ighaze tau ndinatu iit. Ve saveeŋ tonene, nene deŋia. Aazne, Maaron igham ghiit tanim ye ndinatu. Eemoghon yes to titaghon ŋgar to taan, tighilaal ghiit maau. Pasa, yes tighilaal Maaron maau. a 

Yam ndiran tiou, lolog payam kat. Aazne, iit tanim Maaron ndinatu wa. Ve sa nepooŋ to muri pale taghami, nene takankaan pani. Pasa, Maaron ipaghazoŋan ghiit pa mbeb tonenen sone. Eemoghon iit tawatag: Sawa to Krisi imuul inim ve ipatooŋ tau ivot ighazooŋ, ve taghita katini, nene pale taneep tanimale ye tau. b 

Tamtoghon tisob to tighurghur matadi pa mbeb tonene, yes irau tigharaat taudi, leso tiŋgalaaŋ ila Maaron mata tinimale Krisi tau. c 

Yes to tineep tuŋia ila to Krisi, tinoknok ghamuuŋ ŋgar samia maau

Tamtoghon tisob to tigham sosor, tiyel pa tutuuŋ to Maaron. Pasa sosor, nene ŋgar to iyel pa Maaron tutuuŋ toni. Ve yam awatag: Krisi, ye le sosor eta maau, ve izi inim taan pa ireu sosor toit. d 

Tovenen ighaze tamtoghon eta ineep tuŋia ila to Krisi, ye irau inoknok ghamuuŋ ŋgar samia maau. Ve ighaze ŋgeu eta ighamgham ŋgar samia irau sawa isob, nene ipatooŋa ighaze ye ighilaal Krisi sone. Tamtoghon tovene, iwatag Krisi maau. e 

Ndinatug, ŋgeu eta itombaan gham ve ipaghau gham pa ataam to Maaron malep. Tamtoghon to titaghon ŋgar deŋia inimale Krisi itaghoni, nene yes moghon to tineep deŋiadi ila Maaron mata. f 

Eemoghon ighaze tamtoghon eta ighamgham ŋgar samia irau sawa isob, nene ye ŋgeu to Sadan. Pasa, muuŋ kat ve inim, Sadan ighamgham ŋgar samia. Eemoghon Maaron Natu izi inim taan, ve ipatooŋ tau ivot ighazooŋ, leso ireu uraat to Sadan isob ilale. g 

Tovenen yes to Maaron igham di tinim paghu, tighamgham sosor kat maau. Pasa, Maaron tapiri to igham di tinim paghu, nene inepneep todi irau sawa isob. Tovenen yes irau tinoknok ghamuuŋ ŋgar samia maau. 10 Tovenen ataam to taghilaal Maaron ndinatu ve Sadan ndinatu, nene vene: Ighaze tamtoghon eta inoknok ghamuuŋ ŋgar to deŋia ila Maaron mata maau, nene ye tamtoghon to Maaron maau. Ve ighaze ŋgeu eta lolo pa toŋvetaz to Krisi maau ve ighamgham poian di maau, nene ye paam, tamtoghon to Maaron maau. h 

Lolood pa tauud

11 Sawa to aghur ila muuŋ ve inim, yam aloŋlooŋ saveeŋ tovene: Iit irau lolood pa tauud ve tagham poian tauud. i 

12 Tovenen iit tataghon Kain ŋgar toni malep. Ye, Ŋgeu Samia ighami inim le, tauto imundig ve irab sorokin tazi Abel imaat. Ve pughu vena to irabi imaat? Ye igham ŋgar tonenen pasa, ŋgar toni samia, ve tazi ŋgar toni poia ve deŋia ila Maaron mata. j 

13 Yam toŋvetaz, ighaze yes to titaghon taan ŋgara tighur koi payam, ruŋamim iza ve agham ŋgar naol malep. k 

14 Iit tawatag: Iit tapul ataam to mateeŋ wa. Ve aazne, tataghon ataam to Maaron tauto tagham nepooŋ poia ila toni. Pasa, lolood pa yes toŋvetaz to Krisi ve taghamgham poian di. Ve ighaze tamtoghon eta lolo pa yes toŋvetaz to Krisi maau, nene ye itaghon ataam to mateeŋ. 15 Tamtoghon tisob to tighurghur koi pa toŋvetaz to Krisi, nene Maaron ighita di tinimale ŋgeu to irab tamtoghon imaat. Ve yam awatag: Yes to tirab tamtoghon timaat, nepooŋ to mataad iyaryaar ineep todi maau. l 

16 Sawa to Yesu Krisi ipul tau imaat pait, ye ipatooŋ ŋgar to lolood pa tamtoghon ivot ighazooŋ pait. Iit paam irau tataghon ŋgar raraate, ve tarei tauud pa yes toŋvetaz to Krisi. m 

17 Ighaze ŋgeu eta le mbeb katindi to taan, ve ighita mbolaaŋ igham toŋvetaz eta to Krisi, eemoghon lolo isamini ve iuuli maau, nene pale vena? Ŋgar to Maaron to lolo pa iit tamtoghon ve ighamgham poian ghiit, ineep to ŋgeu tonenen? Maau. 18 Ndinatug, ighaze tasavsaav sorok ila avood uli taghaze lolood pa tamtoghon, ve saveeŋ toit le anoŋa maau, nene poia maau. Ŋgar tovene, nene kaarom. Iit irau tataghon saveeŋ toit, ve tagham anoŋa ivot. Leso avood onoon. n 

Ataam to tayoon ila Maaron mata toman tiniid iza

19 Tovenen iit lolood pa tamtoghon ve tagham poian di. Leso tawatag taghaze iit tataghon saveeŋ onoon. Ve sawa to tayoon ila Maaron mata, iit pale lolood poia. Irau tamatughez ma mayaad ne maau. 20 Onoon, sawa pida, tayamaan tauud taghaze taneep deŋiaad ila Maaron mata maau. Eemoghon poia to Maaron, nene tiina kat ve ŋgar toni ilib pa ŋgar toit. Ighaze mataad kisin mbeb ru tonene, nene pale ipalot ghiit, leso tamatughez pa tayoon ila Maaron mata sob.

21 Yam ndiran tiou, lolog payam kat. Ighaze tayamaan tauud taghaze leed sosor eta ila Maaron mata maau, nene pale tamatughez pa tayoon ila mata maau. o 

22 Ve ighaze taghasoni pa mbeb eta, ye pale ilooŋ ghiit ve igham pait. Pasa, mataad kisin tutuuŋ toni ve tataghon di, ve taghamgham ŋgar to ighami lolo poia. p 

23 Tutuuŋ toni, nene vene: Iit irau taghur ila to Natu Yesu Krisi, ve lolood pa tauud ve tagham poian tauud itaghon tutuuŋ to Yesu tau isavia pait. 24 Tamtoghon tisob to matadi kisin tutuuŋ toni ve titaghon di, yes pale tineep tuŋia ila to Maaron, ve Maaron ineep tuŋia ila todi, ve tilup di tinim ee moghon. Ve Avuvu to Maaron igham pait, tauto igham ghiit taghilaal taghaze Maaron ineep toman ghiit irau sawa isob. q 

Copyright information for `TUCO