aYo 21:15+; Mbaŋ 20:28; 1Tim 3:3; Tit 1:7
b2Kor 1:24; Pil 3:17; 1Tim 4:12; Tit 2:7
c1Kor 9:25; 2Tim 4:8; 1Pe 1:4
dMt 23:12; Yems 4:6
eLu 1:52, 14:11; Yems 4:10
fMbo 55:22; Mt 6:25+; Pil 4:6
gEp 4:27, 6:11+; 1Tes 5:6; Yems 4:7
h2Kor 4:17; 1Pe 1:6
jMbaŋ 12:12, 13:5,13, Mbaŋ 15:37+; 2Tim 4:11
lRo 16:16

1 Peter 5

Ŋginiiŋa irau tiŋgin poian Maaron tamtoghon toni

Yo, you naghaze napalot ŋginiiŋa tiam pa saveeŋ pida. Pasa, you paam ŋginiiŋ nanimale yam. Ve pataŋani to Krisi imbaada, taug naghita katini pa matag. Ve sawa to Krisi imuul inim ve ipatooŋ tapiri ve iza tiina ivot ighazooŋ, nene pale you paam itiŋa taneep ila Krisi ŋguruba lolo. Tovenen yam ŋginiiŋa irau alooŋ aliŋag tonene, ve ataghoni. Maaron ighur uraat ilat nimamim wa ighaze aŋgin sipsip toni. Tovenen matamim padi ve aŋgin poian di. Uraat tiam tonanan, ighaze tamtoghon tizoorndug payam pa aghami, nene poia maau. Aghami toman lolomim, ghoro poia. Leso ataghon Maaron lolo. Ve agham ŋgar tiina pa lemim atia malep. Pasa ŋgar tovene, taghita poia maau. a 

Yes to Maaron ighur di tilat nimamim pa aŋgin di, agham taumim anim tiina padi ve atatan di tizi malep. Yam taumim irau anim patoŋaaŋ poia pa Maaron sipsip toni. Leso tighita gham, ve titaghon gham pa ŋgar tiam. b 

Ighaze agham tovene, sawa to Ŋginiiŋ tau to sipsip imuul inim, ve ipatooŋ tapiri ve iza tiina ivot ighazooŋ, Maaron pale igham gham aneep ila tau ŋguruba lolo le alok inim lemim atia. Atia tovene, irau isami, ma isob ne maau. c 

Tatatan tauud izaad, ve taghur pataŋani toit ila Maaron nima

Yam ndipain aneep ila ŋginiiŋa tiam sambadi, ve alooŋ saveeŋ todi. Ve yam asob irau atatan taumim izamim, ve ambees pooi pa taumim. Pasa, Maaron aliŋa isaav tovene:

“Yes to tipait taudi izadi, Maaron ighurghur koi padi ve itatan di.
Ve yes to titatan taudi izadi, ye ighurghur poia toni izaza todi.” d 
Tovenen atatan taumim, ve aneep ila Maaron ariaŋa nima samba. Ighaze agham tovene, ye pale ipait gham ila sawa to ye tau ighuri. e 

Pataŋani tiam naol to lolomim imbumbu padi, aghur di tisob tila Maaron nima. Ye pale iuul gham. Pasa, ye igham ŋgar tiina payam ve mata payam. f 

Agham ŋgar pooi ve matamim iza. Pasa, koiamim Ŋgeu Samia ilaghlaagh inimale laion to itaŋtaŋ ve ikalkaal tamtoghon pa ighani. Tovenen akis ghurla tiam tuŋia, ve aparab ariaŋa. Leso atatani. Pasa, yam awatag: Toŋvetaz tiam to Krisi to tineep irau ndug ndug, timbaad pataŋani raraate inimale yam ambaada. g 

Saveeŋ palotiiŋ pida

10 Maaron toit to poia pughu, ye ipoi gham anim Krisi le, leso igham gham ala aneep tomani ila ŋguruba lolo le alok. Pataŋani to aazne ambaada ne, mala maau pale isob. Ve muri, Maaron tau pale igham gham aneep poia muul ve ipalot gham, leso ayoon tuŋia ve akis ghurla tiam ariaŋa. h 

11 Ye ariaŋa, ve tapiri toman pooz toni, nene inepneep tovene irau sawa isob. Onoon.

Paesiiŋ pida

12 Silas iuul ghou pa bodeeŋ rau tuku tonene. You naghita naghaze ye toŋvetaz toit eez to lolo ineep tuŋia ila to Krisi ve tini imbees kat pa uraat toni. Nambood rau tonene ilat tiam pa napariaaŋ gham. Leso aghur ila aghaze poia to Maaron to nasavia ila rau tonene, nene mbeb tau. Tovenen akisi tuŋia.

13 Nditamim to Maaron isia di tinim le tinimale yam ve tineep izi ndug tiina Babilon,
(5:13) Petrus isavia saveeŋ tonene iza to lupuuŋ eez to Krisi to tineep izi ndug tiina Rom.


tigham ndag poia todi ilat payam. Ve natug Markus paam, igham ndag poia toni payam. j 

14 Yam asob awakisin nimamim
(5:14) Petrus imbood saveeŋ tovene: ‘Aghan avomim itaghon ŋgar to lolood pa tauud.’ Nene ataam todi to tipatooŋ tighaze lolodi pa taudi. Ve iit tagham tovene maau. Tayaŋin pa tamtoghon, ve tawakisin nimaad.


itaghon ŋgar to lolood pa tauud.

Yam to aneep tuŋia ila to Krisi, Maaron pale igham gham asob aneep poia toman lolomim luuma. Onoon. l 

Copyright information for `TUCO