aMbaŋ 17:15
bYo 16:33; Mbaŋ 14:22; 2Tim 3:12
dPil 2:16
eMbaŋ 18:5
fRo 1:10+
g1Pe 1:22
h1Kor 1:8+; 1Tes 5:23

1 Thessalonians 3

Paulus ipaes pa pughu to ye imbaaŋ Timoti ila iŋgig yes Tesalonika

Sawa to ninepneep izi ndug Atens, yei nigham ŋgar naol payam nighaze: Yam aneep pooi, ma maau? Nineep le maau, tauto nimbaaŋ toŋvetaz toit Timoti ilat tiam. Ve yei pida nineep to sualen. Yeiŋa Timoti niluplup ghei pa uraat to Maaron ve nivovotia Krisi varu. Tauto nimbaaŋa ilat tiam, leso ipalot ghurla tiam, ve ayoon ariaŋa. a 

Pasa, nimatughez naghaze pataŋani to ighamgham gham ne, pale igham tamtoghon tiam pida titap ve tipul ghurla todi. Eemoghon yam awatag: Iit to tataghon ataam to Maaron, pale tambaad pataŋani tovene. b 

Pasa, sawa to itiŋa tanepneep, yei nisavsaav payam nighaze: “Apatum gham. Pasa, tamtoghon pale tighur pataŋani pait.” Saveeŋ tiei tonenen ighur anoŋa ve aghita wa.

Tovenen sawa to naneep izi Atens, you nagham ŋgar naol payam. Naneep le maau, tauto nambaaŋ Timoti ilat. Leso iŋgabiiz ghurla tiam: Iyaryaaŋ, ma maau? Pasa, namatughez kat. Pa vene, Ŋgeu To Tovaaŋ
(3:5) Ŋgeu To Tovaaŋ, nene Sadan iza ite.


itoov gham ve atap, ghoro uraat tiei ighur anoŋa maau. d 

Paulus ilooŋ yes Tesalonika varudi le lolo poia kat

Tauto Timoti ilat iŋgig gham. Ve ŋgaramus, ye inim ivot tiei muul, ve ipaesia varumim poia payei ighaze yam akis ghurla tiam tuŋia, ve lolomim pa Maaron ve tamtoghon paam. Ve isaav payei ighaze yam lolomim poia pa sawa to nilat nineep toman gham ve itiŋa taluplup ghiit. Tauto akausim payei irau sawa isob aghaze le aghita ghei muul, raraate inimale yei paam lolomai nighaze le nighita gham. e 

Tovenen yam toŋvetaz, onoon, aazne pataŋani tiina igham ghei, le nikaal ataam kat. Eemoghon sawa to nilooŋ varumim tighaze yam ayoon tuŋia ve aghur ila to Tiina toit ariaŋa, nene ipalot ghei, ve igham ghei lolomai poia kat.

Tovenen sawa isob to nisuŋ ila Maaron toit mata ve matamai iŋgal gham, lolomai poia kat ve nipaiti pa poia toni. Eemoghon nikankaan: Pale nisavia sa saveeŋ, leso ipatooŋ lolomai poia tonene? Pasa, saveeŋ eta iraua maau. 10 Mboŋ ve ndag, yei nisuŋsuŋ Maaron ariaŋa nighaze ye igham ataam eta ivot, leso nilat nighita gham muul ve nipalot ghurla tiam. Ve ighaze yam ambool pa ŋgar pida, ghoro nipatoot gham pani. f 

Paulus ighason Maaron pa ipalot yes Tesalonika

11 Tovenen you nasuŋ Tamaan Maaron yesuru Tiina toit Yesu naghaze tigham ataam eta ivot payei, leso nilat tiam. 12 Ve naghaze Tiina toit ipalot gham, leso lolomim pa taumim ve lolomim pa tamtoghon tisob. Naghaze ŋgar tonene ivot inim tiina le raraate inimale yei lolomai payam. g 

13 Leso ŋgar patabuaŋ to Maaron ineep ariaŋa ila lolomim. Ve sawa to Tiina toit Yesu imuul inim toman tamtoghon toni patabuaŋa tisob, ve yam ayoon ila Tamaan Maaron mata pa iŋgabiiz gham, ye pale ighita gham ighaze yam lemim sosor eta maau. h 

Copyright information for `TUCO