aKol 1:10
b1Kor 6:18; 2Kor 7:1; Ep 5:3
dEp 4:17+; Kol 3:5
eIgham 20:14; Hib 13:4
f1Pe 1:15+
gLu 10:16; 2Kor 1:22; Ep 4:30
hYo 15:12; Ep 5:2; 1Yo 3:11+
iEp 4:28; 2Tes 3:10+; 1Pe 2:12
jEp 2:12
kYo 11:25; 1Kor 15:13+
l1Kor 15:51+
mMt 24:30+; 2Tes 1:7+
nYo 12:26, 14:2+

1 Thessalonians 4

Taghur maat malep

Yam toŋvetaz, you naghaze nasavia saveeŋ tonene, ve isob. Ŋgar to Maaron lolo pani, yei nipatoot gham pani ve awatagi wa. Tauto laghooŋ tiam, yam irau ataghon ŋgar tonenen. Ve aazne, nighaze nipalot gham pani muul ila Tiina toit Yesu iza, leso ataghoni le ataghoni kat. a 

Tutuuŋ to nisavia di payam ila Tiina toit Yesu iza, yam awatag di wa. Maaron ighaze yam ataghon ŋgar patabuaŋ animale ye tau. Tovenen ŋgar to ghuruuŋ maat, yam aneep saguan pani. b 

Yam tamtoghon eŋaeŋa, irau matamim iŋgal taumim ndizwamim ve aneep toman di. Leso ataghon ŋgar patabuaŋ to poia ila Maaron mata, ve poia ila tamtoghon matadi paam.
(4:4) Ataam ite to tatoor saveeŋ waaro tonene nene vene: “Yam tamtoghon eŋaeŋa, irau aŋgin poian taumim, ve ataghon Maaron ŋgar toni pa vaiuuŋ. Leso ataghon ŋgar patabuaŋ to poia ila Maaron mata, ve poia ila tamtoghon matadi paam.”


Yes to tiwatag Maaron maau, matadi samsamia, ve moghon moghon ŋgar to ulidi ipapazaagh di. Yam ataghon di pa ŋgar todi tonowen malep. d 

Aghita. Ighaze aghur maat pa toŋvetaz tiam ndizwadi, yam agham sosor pa toŋvetaz tiam tonanan, ve agham kaarom padi. Tamtoghon tisob to ighaze tigham sosor tovene, Tiina toit pale ighur atia padi. Saveeŋa, yei nisavia payam ve alooŋa wa. Pasa muuŋ, nisaav ariaŋa payam pa ŋgar tonene. e 

Maaron ipoi ghiit tanim le pa tagham ŋgar samia maau. Ye ighaze tataghon ŋgar ŋgalaaŋa ve ŋgar patabuaŋ tanimale ye tau. f 

Tovenen ighaze ŋgeu eta izoor saveeŋ tonene, ye izoor saveeŋ to tamtoghon maau. Ye izoor Maaron to igham Avuvu Patabuaŋ payam ne aliŋa. g 

Lolood pa tamtoghon

Ŋgar to lolood pa toŋvetaz to Krisi, lemai saveeŋ eta pa nimbooda payam ne maau. Pasa, Maaron tau ipaghazoŋan gham pa ŋgar tonene ve aghazooŋ pani wa. Tauto lolomim pa toŋvetaz tisob to Krisi to tineep irau taan suruvu to Masedonia. Eemoghon nighaze nipalot gham pani muul, leso ŋgar tonene ivot inim tiina kat ila lolomim. h 

Taneep ila tamtoghon pida nimadi malep. Tauud tagham uraat

11 Yam azuaria gham pa taghoniiŋ ŋgar luuma ve ŋgar to orood maate, ve matamim iŋgal uraat tiam. Yam aneep ila tamtoghon eta nima malep, ve alaagh soroksorok malep. Nimamim iyaryaaŋ pa uraat, itaghon tutuuŋ to muuŋ nisavia payam. Leso ambool pa mbeb eta sob, ve ŋgar tiam deŋia ila yes to tighur ila maau ne matadi. i 

Mulaaŋ to Tiina toit ve mundigiiŋ to yes mateeŋa

13 Yam toŋvetaz, yes to tighur ila to Krisi ve timaat, yei nighaze yam awatag mbeb to pale ivot padi. Leso lolomim ipataŋan kat pa mateeŋa tiam inimale yes to tighur ila maau ne sob. Yes tighur matadi pa mundigiiŋ to yes mateeŋa maau. Tauto ighaze todi eta imaat, nene igham di lolodi ipataŋan kat. j 

14 Eemoghon iit taghur ila taghaze Yesu imaat ve imundig pa mateeŋ wa. Tovenen yes to tighur ila toni ve timaat, Maaron pale ipamundigin di ila Yesu tapiri, ve iyou di, ve yesŋa Yesu tiza tila toni. k 

15 Alooŋ. Nene Tiina toit Yesu tau aliŋa to nisavia payam: Sawa to ye imuul izi inim, iit to taneep mataad iyaryaar, irau tamuuŋ pa yes mateeŋa maau. l 

16 Pasa, sawa to Tiina toit Yesu imuul izi inim, Maaron pale isaav ariaŋa toman aliŋa tiina, ve daba to yes aŋela imboob, ve tavuur to Maaron itaŋ. Ghoro yes to tinim Krisi le ve timaat, pale timundig muuŋ. m 

17 Ghoro tiyou iit to taneep mataad iyaryaar ne paam, toman yes to timundig pa mateeŋ, ve rikia moghon tiit ghiit talooŋ tala yaghur tae lolo to sala we. Leso taghita Tiina toit, ve itiŋa taneep itaghoni taghoni gha ila. n 

18 Tovenen matamim iŋgal saveeŋ tonene, ve awapalotin gham pani.

Copyright information for `TUCO